2 Samueli 17 - Gourmanchéma Bible

¹ Ahitofeli den yedi Abisalomi: «Cedi min gandi piiga n jaba tudalie (12 000). N baa fii ki ŋoadi Dafidi ku naa ñiagu liga.

² N baa nandi ki ludi o wan coagi ki tadigi yaa yogunu. N baa jieni o, yaa niba n ye leni o kuli baa sani. N baa kpa o bado bebe,

³ ki guani bi niba kuli a kani. A yibali yeni kuuma baa teni ke bi niba kuli n goa ki ŋoadi fini ki yaa ye leni mi yanduanma.»

⁴ Laa tundi den mangi Abisalomi leni Isalele nikpela kuli pala.

⁵ Ama baa yeni Abisalomi den yedi: «Go yini mani Alika yua Usayi tin gbadi wani mo n baa yedi yaala.»

⁶ Usayi den cua Abisalomi kani ke o yedi o: «Diidi ki le Ahitofeli n yedi yaala, li pundi tin tieni wan yedi yaala bi, bi tin da tieni? Amo n waani ŋan laa yaala.»

⁷ Usayi den goa ki yedi Abisalomi: «Mine wani Ahitofeli n tundi yi yaa tundi daa ŋani.

⁸ A bani a baa leni o niba jama. Bi pala fii nani yaa fuayanbiadiga n yi ulisi yaa pali n baa fii maama bi yaa cuo o bila li fuali nni. A baa tie yaa ja n maani bu toabu, o kan duani ki guani bi toatieba siiga.

⁹ Baa moala o wuo buoguba niinni, yaaka kaantogu. Li tuogikpiali nni, Dafidi yaaba yaa ku ti yaa niba, li kan waagi bi niba baa gbadi ki yaa tua mine: ‹Bi paadi ki deli yaaba n ŋua Abisalomi.›

¹⁰ Lanwani baa a jakoanda yaaba n pia li papaali nani i yangbanli yeni tugusoama baa sani, kelima Isalele yaaba kuli bani ke yaaba n ye leni o tie jakoanda.

¹¹ Lanwani mini yaa tundi tie ŋan cili hali jienu, Dana dogu, ki pundi hali ganu, Beli-Seba dogu, ki taani Isalele yaaba kuli a kani ban tua yaa goli n yaba nani yaa tanbiima n ye mi ñincianma kunu yeni. Fini aba mo n ga bi liiga ki gedi li tuogili.

¹² Ti baa nandi Dafidi tin laa o naankani kuli, ki baa opo nani ku mangu n baa ki tinga po maama yeni. Wani oba leni yaaba n ye leni o siiga nni baa niyendo kan sani ki cia.

¹³ O yaa kua ki wuoni doguba niinni, Isalele yaaba kuli baa taa i baabi ki gedi laa dogu. Ti baa dadi o leni yaaba n ye u niinni kuli ki lu ku joaloangu nni hali ke bi kan go le baa tanyenli u kaanu.»

¹⁴ Abisalomi leni Isalele yaaba kuli den yedi: «Alika yua Usayi yaa tundi cie Ahitofeli yaa yi.» Ama li tie ke Li Miali Diedo den jagi ke o baa bolini Ahitofeli tundiŋami yeni, ki cuani o falaciamo Abisalomi po.

Dafidi duodi Judana kpenu

¹⁵ Usayi den yedi bi kopadicianba Tisadoki leni Abiata: «Ahitofeli tundi Abisalomi leni Isalele nikpela nande leni nande. Nmo tundi ba nande leni nande.

¹⁶ Moala yin soani mani tontoni ban ban waani Dafidi ke wan da duani Judana tiali nni, ke wan duodi u kpenu ke ban da ti bolini wani o bado leni o yegininlieba kuli.»

¹⁷ Jonatan leni Ahimaatisi den se Eni-Logeli dobiga po kelima bi kan den tuo ki kua Jelusalema nni ke ban da ti le ba. Jafaano n den yen cua bikani ki caa i tondi, bani mo n ban waani Dafidi yaala n tieni.

¹⁸ Ama o jawaalo den laa ba ki waani Abisalomi. Bi den jaligi tontoni bani bonba lie kuli ki pundi Bahulimi dogu nni ki kua niyendo deni. O den pia li caali o diegu nni. Bi den kua ki wuoni li caali yeni niinni.

¹⁹ Ku diegu yeni daano pua den baa ku pangu ki pii li caali ñoabu ki ladi deni i difabidike ke niloba n da ti maali liba.

²⁰ Abisalomi naacenba den kua laa diegu nni o pua yeni kani ki buali o: «Ahimaatisi leni Jonatan ye le?» O den waani ba ke bi duodi ki fuanbiga. Ban den lingilingi kaa laa ba, bi den goa ki kuni Jelusalema.

²¹ Ban den lebidi ki kuni, Ahimaatisi leni Jonatan den ñani li caali nni ki gedi ki ban waani Dafidi Ahitofeli n yeyedi yaala, ki yedi o: «Fii mani ki duodi u kpenu kelima Ahitofeli tundi ba ban tieni yi line leni line.»

²² Dafidi leni yaaba n den ye leni o kuli den fii ki duodi Judana. Lan den fandi yaa yogunu baa niyendo ki den sieni kaa duodi Judana.

²³ Ahitofeli n den laa ke baa ŋoadi o tundi, o den paani o ŋunbo li gaali ki fii ki kuni o denpo. O den teni o niba o ñoamabona ki yuandi ki soadi o yuli. O den kpe yeni ke bi piini o o baa kuli nni.

Dafidi n tieni yaala Mahanayima dogu nni

²⁴ Dafidi n den pundi Mahanayima dogu nni yaa yogunu, Abisalomi den duodi Judana wani leni Isalele minteela kuli.

²⁵ Li den sua ke Abisalomi teni ke Amasa lebidi Joabi ki tua bi toatieba yudaano. Wani Amasa den tie Isalele buolu yua Jitila yaa bijua. Jitila yeni den taa Nahasi bisalo Abigayili, Joabi naa Tiseluja naataanu.

²⁶ Abisalomi leni Isalele yaaba den kpa bi toanagili Galaadi diema nni.

²⁷ Dafidi n den pundi Mahanayima, Amoni buolu yua, Laba dogu nni yua Nahasi yaa bijua Sobi, leni Lodebali dogu yua Amiyeli yaa bijua Makili, leni Galaadi dogu Logelimi yua Balisilayi

^28-29 den cuani i duani leni ti tadiciandi leni a boba leni a cuana, leni ban taa i pe leni i ne naaŋanguankaama ki ŋanbi yaa jekpaga leni *ŋalikama, leni *olije, leni mi yoma, leni i disagidi, leni a tuuna, leni yaa tuubuolu n yi lantiyi, leni ti siadi, leni mi naaŋankpama, leni i pe. Bi den cuani lankani Dafidi leni o yegininlieba po ke ban je, kelima bani yaaba n den cuani yeni den yedi: «Laa pia kuli tama, ban tagini li fuali nni yeni, mi koma leni u ñunñuunu leni li coagili gbadi ba.»