2 Samueli 16 - Gourmanchéma Bible

¹ Dafidi n den pendi li juali yuli po waamu, Mefiboseti naacemo Tisiba den tuogi o ki pia ŋunbi lie ke bi paani ba i dafieli ke bi tugi dupen kobilie, leni i duven tiidi bonluonkaala bonfiidi kobiga, leni a kankankuoma bonkona kobiga, leni duven dayuayengu.

² O bado den buali Tisiba: «A caani line le?» Tisiba den goa ki yedi o: «N cuani i ŋunbi ke fini o bado niba n jagini, dupen leni li bonluonkaala mo tie a minteela jiema. N cuani duven mo yaaba n ban coagi li fuali nni n ño.»

³ O bado den buali o: «A canbaa bijua Mefiboseti nan ye le?» Tisiba den goa ki yedi o: «O sedi Jelusalema kelima o yedi: ‹Dinla Isalele buolu yaaba baa goa ki dini nni li bali min diedi n baa diema.› »

⁴ O bado den yedi Tisiba: «Mefiboseti n den die yaala kuli tua a yaala.» Tisiba den yedi: «N pagi a. Ŋan suagi ki yaa ŋanbidi npo.»

Simeyi soli Dafidi

⁵ Dafidi n den kua Bahulimi dogu nni yaa yogunu, Gela bijua Simeyi, Sayula buolu nilo, yua n go tie o diegu nni yua, den ñani ki togidi leni ba. O den solini o bado Dafidi

⁶ ki lugidi wani leni o badibaanba kuli a tana. A jakoanda leni yaaba n sieni kuli den cuoni ki baali o bado ganu leni o jienu.

⁷ Simeyi den solini Dafidi ki tua: «A caa, a caa! O nikpalo leni o nibiado ne!

⁸ Li Miali Diedo n teni ke Sayula diegu nni yaaba soama kuli goa ki baa fini Dafidi yuli po. A den ga o kani li bali ki dini, lani yaa po yo ke Li Miali Diedo taa mi diema bali ki teni a bijua Abisalomi ke amo di ye leni fala moala kelima a tie nikpalo.»

⁹ Lanwani Tiseluja bijua Abisayi den yedi o bado: «Be yaa po ke o naa sangbankpiemo solini fini n daano o bado nande? N mia ŋa, cedi min gedi ki jia o yuli.»

¹⁰ Ama o bado den goa ki yedi: «Yinba Tiseluja bijaba, yi maama ki ye lienni. O yaa soli nni, li tie kelima Li Miali Diedo n yedi o: ‹Ŋan soli Dafidi.› Lanwani ŋme baa fidi ki fu leni o.»

¹¹ Dafidi go den yedi Abisayi leni o badibaanba kuli: «N bimadiga yaa bua ki kpa nni daa, yaa ja n tie Benjamina buolu na mo te? Cedi mani wan yaa solini kelima Li Miali Diedo n puogi o yeni.

¹² Li fidi ke Li Miali Diedo baa le npo n fala ki lebidi ban solini nni yaa solindi dinla ne lan tua npo seli.»

¹³ Dafidi leni o niba den suagi liiga leni bi cenli. Simeyi den cuoni li juali balinma ki baali Dafidi ki solini o, ki lugidi o a tana leni mi tama.

¹⁴ O bado leni yaa niba n den yegi leni o kuli den pundi ki coagi, ki sedi lankani ki fuodi.

Usayi gedi Abisalomi po

¹⁵ Abisalomi den kua Jelusalema leni Isalele yaaba nigocianli. Ahitofeli moko den yegi leni o.

¹⁶ Dafidi danli Alika yua Usayi n den pundi Abisalomi kani, o den yedi: «O bado n yaa ye ki fo! O bado n yaa ye ki fo!»

¹⁷ Abisalomi den yedi Usayi: «Ŋan bua a danli maama nne? Be yaa po ke ŋaa yegi leni o?»

¹⁸ Usayi den goa ki yedi Abisalomi: «Li tie kelima n bua ki ŋoadi Li Miali Diedo leni yaa niba n ye ne leni Isalele yaaba kuli n gandi yua yo. N bua ki yaa ye leni wane.

¹⁹ N baa yaa tuuni ŋme yaa po yo? Laa tie n danli bijua po kaa? N di baa yaa tuuni a yaa po nani min den tuuni a baa po maama.»

Abisalomi kua Dafidi ponanbandi kani

²⁰ Abisalomi den yedi Ahitofeli: «Yin juogi mani yi siiga ki le tin baa tieni yaala.»

²¹ Ahitofeli den yedi Abisalomi: «Gedi ki kua a baa ponanbandi kani, wan ŋa yaaba ke bi guu ku diegu yeni. Yeni Isalele yaaba kuli baa bandi ke a fiini a baa pali ki teni ke o nani a. Lane, yaaba n ye leni a kuli baa paagi bi pala.»

²² Bi den kpaa li gbandieli o bado doangu tanpoli Abisalomi po ke o kua o baa ponanbandi kani ke Isalele yaaba kuli nua.

²³ Laa yogunu Ahitofeli n den tundi yaa tundi den pia li bali nani U Tienu wani oba n tundi yeni. Ahitofeli tundi kuli den tie yene, o yaa tundi Dafidi bi o yaa tundi Abisalomi.