2 Samueli 15 - Gourmanchéma Bible

¹ Lani yaa puoli, Abisalomi den baa toateligu leni i taami, leni jaba piimuu ke bi tiini o liiga.

² O den yen yagidi ki fii ki sedi u sankunu u dogu bilinu buliñoabu kani. Nilo yaa den pia buudi ki tagi ki caa o bado po ki baan bu, Abisalomi den yen yini o ki buali o: «A ñani u laa dogu yo?» O nilo yeni yaa den goa ki yedi: «N tie Isalele buoli nni u naa buolu yua,»

³ Abisalomi den yen yedi o: «Diidi, a maama yeni niinni a pia i moamoani, a cima tiegi. Die o bado kan baa oba kuli n cengi a.»

⁴ Wani Abisalomi den yen suagi ki yedi: «A! N yaa bi tie mi diema ne niinni bujialo, yaaba n pia janjanma bi buudi kuli baa yen cua ki le nni. Nmo bi baa yen jia bipo bi buudi ke li tiegi.»

⁵ Nilo yaa den nagini ki baa labini ki pugi o mo, o den yen tandi o nuu ki cuo o ki gobini o leni mi buama.

⁶ Abisalomi den tiendi yene leni Isalele yaaba yaaba n caa o bado po ki baan mia wan jia bipo bi buudi kuli. O den tiendi yene ki dia Isalele yaaba.

⁷ Bina naa n den pendi, Abisalomi den yedi o bado: «Pa nni u sanu min gedi Ebiloni ki ban kuani min den niani Li Miali Diedo yaa nianli.

⁸ Kelima min den ye Sili diema Gesuli dogu nni, n den niani Li Miali Diedo li nianli ki yedi ke o yaa guani nni Jelusalema, n baa padi opo a pada.»

⁹ O bado den yedi o: «Gedi leni mi yanduanma.» Lanwani Abisalomi den fii ki gedi Ebiloni.

¹⁰ O den soani bi niba ŋasiili nni ke ban gedi Isalele buoli yaaba kuli siiga ki ban yedi bi niba: «Yi yaa gbadi ke bi piebi kakaci, yin yedi ke Abisalomi ye Ebiloni ki tie bado.»

¹¹ Jelusalema yaaba jaba kobilie, Abisalomi n den mia yaaba, den ciani o. Bi den ciani o leni tugupiengu, kaa bani Abisalomi n bogindi yaa janbi po.

¹² Abisalomi n den padi yaa yogunu, o den soani Gilo dogu nni ke bi ban yini Ahitofeli, Dafidi tundika. Yaaba n den taa Abisalomi po den yabidi ki pugidi, o jajanbidi-yanjagili yeni den baa u paalu ki pugini.

Dafidi sani ki ñani Jelusalema

¹³ O nilo den gedi ki waani Dafidi ki yedi o: «Isalele yaaba pala jigidi ki ŋua Abisalomi.»

¹⁴ Dafidi den yedi o badibaanba yaaba n den ye leni o Jelusalema nni kuli: «Fii mani tin sani, lani yaaka Abisalomi kan cedi ti. Tin jaligi mani, yeni yaaka o baa nandi ti tontoni ki waani ti fala, ki kpa u dogu nni yaaba.»

¹⁵ O bado badibaanba den yedi o: «Ti daano o bado, ti baa tieni ŋan bua yaala kuli.»

¹⁶ Lanwani o bado den fii ki ñani u dogu nni ke o deni yaaba kuli ŋua o. O den ŋa o ponanbandi siiga bonba piiga ban yaa guu ku diegu.

¹⁷ O bado den ñani u dogu nni ke bi niba kuli ŋua o. Bi den sedi yaa diegu n ban juodi kani.

¹⁸ Bi naacenba kuli leni Keleta yaaba leni Peleti yaaba kuli den tagini ki pendi o bado nintuali. Gati dogu po yaaba yaaba n den yegi leni o ki ñani Gati den pundi kobiluoba. Bimoko den tagini ki pendi o nintuali.

¹⁹ O bado den yedi Itayi, Gati yua: «Be yaa po ke amo baa ŋoadi ti? Lebidi ki goa ki sedi leni o badipaano, kelima a tie caane, ŋaa ye a diema nni.

²⁰ Li daa waagi leni ŋan cua n kani, ke dinla n baa taa ŋa ŋan yaa kpaagi ki liani leni ti, tinba yaaba n daa bani tin caa naani? A-a, lebidi fini leni a deni yaaba ki yaa goa! Li Miali Diedo n ŋanbi yipo, ki gbadi yipo mi niñima.»

²¹ Itayi den goa ki yedi o bado: «Hali Li Miali Diedo po, fini n daano n baa yaa ye naani, nmoko baa yaa ye lankane. N yaa baa kpe, n yaa baa yaa ye, n baa yaa yegi leni a.»

²² Dafidi den yedi Itayi: «Lanwani pendi ki yaa ŋua!» Itayi den pendi wani leni o minteela leni o deni yaaba kuli.

²³ Yaaba n den yegi leni Dafidi den tagi ki pendi ke mi diema nni bi niba buudi. O bado den duodi Sediloni kpenu. Yaaba n den yegi leni o moko den duodi. Bi den tagini yaa sanu n caa li fuali po.

²⁴ Tisadoki den ye likani, wani leni yaa Lefi buolu yaaba n bugi U Tienu *ŋantaadikpaku. Bi den bili U Tienu ŋantaadikpaku yeni. Abiata den padi a pada hali yaa niba n den ñani u dogu nni kuli n do ki gbeni.

²⁵ Lani yaa puoli o bado den yedi Tisadoki: «Go bugi U Tienu ŋantaadikpaku ki guani gu u dogu nni. U Tienu yaa gbadi npo mi niñima o go baa guani nni ki teni min goa ki le o ŋantaadikpaku leni ku yekaanu.

²⁶ Ama U Tienu yaa yedi nni: ‹N pali ki mani leni a,› to, mini Dafidi n tie na, wan tieni nni nani wan bua maama.»

²⁷ O bado go den yedi o kopadiciamo Tisadoki: «A gbadi, ŋan lebidi ki goa u dogu nni leni mi yanduanma, fini leni a bijua Ahimaatisi leni Abiata bijua Jonatan.

²⁸ Diidi ki le, n baa yaa ñuagidi u tialu nni ki guu hali yin baa soani npo laabaali.»

²⁹ Lani Tisadoki leni Abiata go den bugi U Tienu ŋantaadikpaku ki guani gu Jelusalema po ki guani ki kali likani.

Dafidi soani Usayi wan diidi Abisalomi ŋasiili nni

³⁰ Dafidi den doni *Olifie Tiidi juali po. O den do ki buudi ke o yuli liibi, ki cuoni taafana. Yaaba n den yegi leni o kuli moko den libini ki do ki buudi.

³¹ Bi den cua ki yedi Dafidi: «Ahitofeli taani leni mi janjanma danba ki ŋua Abisalomi.» Dafidi den mia U Tienu ki yedi: «Li Miali Diedo, teni ke Ahitofeli tundi kuli n tua fanma.»

³² Dafidi n den pundi li juali po ban kpiagidi U Tienu naani, o den laa yaa tinbuoli n yi Alika yua Usayi ke o togidi o ke o liadili padi, ke o yuli kuli tie tama.

³³ Dafidi den yedi o: «A yaa yegi leni nni, a baa tua npo tugili.

³⁴ Ama ŋan guani u dogu nni ki ban yedi Abisalomi: ‹O bado, n baa tua a naacemo. N den tie a baa naacemo, ama moala n di baa tua a yaa naacemo.› Yeni a baa biani Ahitofeli tundi fanma ki todi nni.

³⁵ Bi kopadicianba Tisadoki leni Abiata baa yaa ye leni a likani. Ŋan bandi yaala o bado diegu nni kuli, ŋan togidi ba.

³⁶ Bi bijaliediba ye likani, Tisadoki bijua Ahimaatisi leni Abiata yaa bijua Jonatan. Yi yen baa soani bane ban waani nni yin pia yaa laabaali.»

³⁷ Lanwani Dafidi danli Usayi den guani ki kua Jelusalema nni Abisalomi n den pundi ki kua yaa yogunu.