2 Samueli 13 - Gourmanchéma Bible

¹ Diidi yaala n den yuandi ki tieni. Dafidi bijua Abisalomi den pia o naataanu ke o tie bonpuoga ki yi Tamala. O den ŋani hali boncianla. Dafidi den pia bonjatoaga ke o yi Aminoni. Wani Aminoni yama den kua Tamala niinni.

² Aminoni yama den yagi hali ke o yiagi kelima wan bua Tamala maama yaa po, kelima wani Tamala n da ki den bani ja yeni, Aminoni den nua ke o kan baa ki taani leni o.

³ Aminoni den pia o danli ke o fani hali bonŋanla ki yi Jonadabi. O den tie Dafidi naataanu Simea yaa bijua.

⁴ O danli Jonadabi den yedi o: «Li ga lede ke fini ki badibiga dondi nande tiŋaagu kuli? A kan waani nni?» Aminoni den goa ki yedi o: «N bua n nataanu Abisalomi waalo Tamala.»

⁵ Jonadabi den yedi o: «Ŋan duani ki kpali ke a yia. A baa yaa cua ki baa le ŋa, ŋan yedi o: ‹Teni n waalo Tamala n cua ki tieni npo mi jiema min je. Wan ŋanbi ma ke n nua, ki taa ma wani oba ki teni nni min je.› »

⁶ Aminoni den duani ki kpali ke o yia. O bado den cua ki baa le o ke o yedi o: «Teni n waalo Tamala n cua ki ŋanbi npo mi jiema waamu ke n nua ki taa ma wani oba ki teni nni min je.»

⁷ Dafidi den soani ke bi kua ku diegu nni liiga po ki ban yedi Tamala: «Gedi a kpelo Aminoni po ki ban ŋanbi opo mi jiema wan je.»

⁸ Tamala den gedi ki kua o kpelo Aminoni dieli nni, ke omo dua. O den buuni mi yoma ki kondi ki luoni.

⁹ Mi jiema yeni n den beni, o den ŋaadi ki kuodi tiatoagu nni ki sieni Aminoni nintuali. Aminoni den yie ke o kan je ki yedi ke ban ñani bi niba kuli. Bi niba kuli den ñani.

¹⁰ Lanwani o den yedi Tamala: «Kuani mi jiema yeni n dieduadili nni ne. Fini aba n taa ma ki teni nni min je.» Tamala den taa mi jiema yeni ki kua ki teni o kpelo Aminoni o dieduadili nni.

¹¹ Wan den taa ke o baa teni o mi jiema yeni, Aminoni den cuo o ki yedi: «Tamala, cua tin taani.»

¹² O den goa ki yedi: «A-a, Aminoni, ŋan da fiagi nni, kelima laa bonla kua Isalele nni. Da tieni laa cagindi.

¹³ Laa bonla yaa tieni, n baa kua le leni n fe? Amo, bi baa yaa nua ŋa nani o cancaginnilo yene Isalele nni. Lanwani ŋan mia o bado, o kan yie min kuni a.»

¹⁴ Ama Aminoni ki den cengi o maama. O den cuo o ki tieni o u paalu ki taani leni o.

¹⁵ Li yaa puoli Aminoni den nandi Tamala. Wan den nandi o maama den cie wan den bua o maama. O den yedi o: «Fii ki yaa caa!»

¹⁶ Tamala den goa ki yedi o: «Ki deli nni baa yaa tie yaa tagili n bia ki cie ŋan tieni nni yaala ne.» Ama Aminoni ki den cengi o maama.

¹⁷ O den yini yaa jawaalo n den tuuni opo ki yedi o: «Ñani ki bonpuoga ne n dieli nni. A yaa ñani o ŋan luoni bu buliñoabu.»

¹⁸ O naacemo den ñani o ki luoni bu buliñoabu. Wani Tamala den laa yaa tiagu n tie tiaŋmadikaagu, o bado bisiaba yaaba n ki bani ja n yen laa yaadi.

¹⁹ O den taa mi fantanpienma ki wuli o yuli po, ki ban buudi ki kuudi ki caa.

²⁰ O naataanu Abisalomi den buali o: «Naani Aminoni ñi ŋa yo? Diidi Tamala, ŋan da yedi liba kuli kelima a kpelo naane. Ŋan da kuani la a pali nni.» Tamala den kali o kpelo Abisalomi diegu nni ki ye nani ban yie yaa pua yeni.

²¹ Dafidi den gbadi yaala n tieni ke o pali beni boncianla.

²² Abisalomi ki go den yieni Aminoni liba kuli. Ama o den nani o hali boncianla kelima o den biidi o waalo Tamala.

Abisalomi teni ke bi kpa Aminoni ki sani oba

²³ Bina lie den pendi, yaaba n moagi i pe kobidi den baa moagi Abisalomi po o pe Baali-Atisodi dogu nni ki kuu leni Efilayima. O den yini o bado bijaba kuli.

²⁴ O den gedi ki laa o bado ki yedi o: «Bi baa moagi npo n pe. N mia ŋa fini leni a badibaanba n cua mi jaanma yeni.»

²⁵ O bado den yedi Abisalomi: «A-a, n bijua. Tikuli kan gedi, kelima tikuli yaa gedi ti baan tua apo tugili.» Abisalomi den tigini o ke wan gedi, ama o den yie ke o kan gedi, ki gaali o.

²⁶ Abisalomi den yedi: «Cedi baa n naataanu Aminoni wani n nan ciani ti.» O bado den goa ki yedi: «O baa ga lede ki ciani a?»

²⁷ Abisalomi den miamia hali ke o bado den cedi ke Aminoni leni o bila yaaba n sieni kuli ciani o.

²⁸ Abisalomi den teni o naacenba li ñoabonli ki yedi: «Yin yaa kpaagi Aminoni. Mi daama yaa cuo o ke n yedi: ‹Pua mani Aminoni›, yin kpa o. Yin da jie, mini n puogi yi. Yin paagi yi pala ki koani mi jama.»

²⁹ Bi naacenba den tieni Abisalomi n yedi ba yaala ki kpa Aminoni. Lanwani o bado bijaba yaaba n sieni den fii ki jagini bi *buomi ki sani.

³⁰ Hali ke bi da ye u sanu nni ki tiini ki kuni, Dafidi den ga laabaali ke Abisalomi ku o bijaba kuli, kaa sieni baa yendo leni miali.

³¹ O bado den fii ki papadi o tiadi, ki bali ki duani tiipo. O badibaanba kuli den ye likani ke bi tiadi papadi.

³² Dafidi naataanu Simea bijua Jonadabi den yaadi ki yedi: «O bado, ŋan yaa bani ke a bijaba kuli ka kpe, Aminoni bebe n kpe. Abisalomi den jagi laa jagili hali Aminoni n den biidi o waalo Tamala yaa daali.

³³ Lanwani ŋan da kuani a yama nni ki yaa tama ke a bijaba kuli kpe ka. Aminoni bebe n kpe.»

³⁴ Abisalomi den sani. Yaa jawaalo n den se ki diidi yibalinba n da ludi ba den noanli ki laa ke li nigoli tagi o puoli po yaa sanu ki jii li juali. O den cua ki yedi o bado: «N laa ke bi niba tagi puoli po yaa sanu ki jii li juali ki kpendi ne.»

³⁵ Lanwani Jonadabi den yedi o bado: «A bijaba n kpendi. Li saa min yedi yaala po moamoani.»

³⁶ Wani Jonadabi n maadi ki jiini yaa yogunu, o bado bijaba den nagini ki pundi. Bi den buudi. O bado leni o badibaanba kuli moko den buudi boncianla.

^37-38 Abisalomi den sani ki gedi Amihudi bijua Talimayi, Gesuli diema bado po. O den tieni lipo bina taa. Dafidi den buudi o bijua po daali kuli.

³⁹ Ama o yama den ti jiidi ke o pali kuugi Abisalomi po.