2 Samueli 12 - Gourmanchéma Bible

¹ Li Miali Diedo den soani Natan Dafidi kani. Natan den cua o kani ki yedi o: «Jaba lie den ye u dogu nni. Yendo den tie piado, o lielo mo luodo.

² O piado den pia i pe leni i ne boncianla.

³ O luodo naa den pia pu se pesiayenga wan den daa yaaga. O den wubi ga ke ki yabidi o dieli nni leni wani o bondaano bila. Ki den di o jiema ki ñu o tadiñokaaga nni, ki dua o benli po ke o nua ga nani o bisalo yeni.

⁴ Dayenli o caano den cua ki cani o piado yeni. Waa den bua ki ñani o pe bi o ne siiga bonyendo ki candi o caano. O den fie o luodo pebiga ki kodi ki candi o.»

⁵ Dafidi pali den beni boncianla laa piado po ke o yedi Natan: «Hali Li Miali Diedo po, yua n tieni yeni, li pundi ban kpa o.

⁶ O go baa pa o luodo pesali naa mo kelima o tieni yeni kaa gbadi opo niñima.»

⁷ Natan den yedi Dafidi: «Fini n tie laa nilo. Li Miali Diedo, Isalele yaaba Tienu yedi mine: ‹Mini Li Miali Diedo den dini a li bali ke a tua Isalele yaaba bado, n den faabi a Sayula nuu nni.

⁸ N den puni a a daano Sayula diegu yaaba, ki puni a o puoba ke a die ba, ki go puni a Isalele leni Juda yaaba kuli ke a die. Lani kuli yaa bi dagidi, n bi baa pugini a.

⁹ Lanwani be teni ke a fali mini Li Miali Diedo maama, ki tieni yaala n *joagini n nintuali? A pedi ki kpa Heta buolu yua Uli leni ki jugisiega. Yeni de, a teni ke Amoni yaaba ku o leni mu jugisiemu, ki taa o pua mo ke o tua a yaa pua.

¹⁰ Kelima lani kuli yaa po, ki jugisiega kan foagidi leni a diegu nni yaaba hali abada, kelima a fali nni ki taa Heta buolu yua Uli pua ke o tua a pua.

¹¹ Mini Li Miali Diedo yedi: Diidi ki le, n baa fiini apo fala a diegu nni, n baa taa a puoba ke a nua, ki teni nitoa wan taani leni ba u yensiinu, asala nni.

¹² Fini a den tieni ŋasiili nni, mini wani n baa tieni la asala nni ke a niba kuli nua.› »

¹³ Dafidi den yedi Natan: «N tieni ti *tuonbiadi ki tudi Li Miali Diedo po.» Natan den yedi Dafidi: «Li Miali Diedo tieni apo sugili a tuonbiadi po, a kan kpe.

¹⁴ Ama yaa biga n mali yeni baa kpe, kelima ŋan tieni yaala yeni teni ke Li Miali Diedo yibalinba sugi o.»

¹⁵ Natan den fii ki kuni o denpo. Li Miali Diedo den luni Uli kpepuoli n den mali Dafidi po yaa biga u yianbiadu.

¹⁶ Lanwani Dafidi den jaandi ki miadi U Tienu ki biga po ki luo bu ñoabu. O yaa kua o dieli nni o yen duani tinga nni hali lan ban faa.

¹⁷ O diegu nni nikpela den cua ki se o kani ki moandi ke wan fii, ama waa den tuo, waa den dini leni ba mo.

¹⁸ Li daleleeli daali ki biga den kpe. Dafidi naacenba den jie kaa bua ki waani o ke ki biga kpe, kelima bi den yedi: «Diidi ki le, tin den maadi leni o ke ki biga daa kpe, waa den cengi ti. Ti baa tieni lede ki waani o ke ki biga kpe? Li fidi wan tieni o yuli yaala n bia.»

¹⁹ Ama Dafidi n den laa ke o naacenba soabidi leni biyaba o den bandi ke ki biga kpe. O den buali ba: «Ki biga kpe yo?» Bi den goa ki yedi o: «O kpe!»

²⁰ Lane Dafidi den fii ki wali ki sogi tulale, ki lebidi o tiadi. O den gedi Li Miali Diedo diegu po ki labini ki jaandi. Wan den kuni o denpo, o den teni ke bi cuani opo mi jiema ke o dini.

²¹ O naacenba den yedi o: «Ŋan tieni yaala ne mo bua ki yedi be? Ki biga n den ye yaa yogunu a den luo bu ñoabu ki buudi. Moala mo wan kpe yeni, a fii ki dini.»

²² O den goa ki yedi ba: «Ki biga n den ye, n den luo bu ñoabu ki buudi kelima n den yedi: ‹Ŋme bani Li Miali Diedo yaa kan gbadi npo mi niñima ki teni ki biga n yaa ye?

²³ Moala ke o kpe, be yaa po ke n go baa yaa luo bu ñoabu? N baa fidi ki teni wan go faadi bi? Mini, n baa gedi opo, ama wani, o kan go cua mini yaa kani.› »

Salomono madi

²⁴ Dafidi den baagi o pua Bati-Seba, ki taani leni o ke o mali bonjaga. Dafidi den yini o Salomono. Li Miali Diedo den bua o,

²⁵ ki teni ke o sawalipualo Natan yini o Jedija, kelima wani Li Miali Diedo po.

Dafidi baa Laba dogu bu toabu

²⁶ Joabi den lindi ki cebini Amoni buolu yaaba dociamu Laba, ki cuo u.

²⁷ O den soani a tonda Dafidi kani ki yedi o: «N tuogi bu toabu leni Laba ki cuo mi ñima n ye yaa ñianli.

²⁸ Ŋan taani yaa toatieba n sieni ki cua ki tuogi leni u dogu ki cuo u, kelima mii bua ki cuo u ki paadi u ti kpiagidi n tua n yaadi.»

²⁹ Lani yaa po Dafidi den taani yaa toatieba n sieni kuli ki gedi hali Laba ki tuogi leni u ki cuo ki diedi u.

³⁰ O den cibidi bi bado badifogiliga. Ki den tie wula ke ki kpiagu cie kilo piitaa. Ki den jabi ki lindi leni yaa tanbila n ŋani ki pia mi jawaama ke a dunga pa boncianla. Bi den cibini ga Dafidi. O den fie u dogu nni yaa fagidi n yaba boncianla.

³¹ O den ñani bi dotieba u dogu nni ki teni ke bi tuuni leni ti sasaadi, leni a cecela, leni a yala, ki go teni ke bi pua i tankonkuomi ki juugi i. O den tieni Amoni buolu dogi niba kuli yeni. Lani yaa puoli Dafidi leni bi toatieba kuli den kuni Jelusalema.