2 Samueli 11 - Gourmanchéma Bible

¹ Li binli lebidima, bi badiba n yen caa bu toabu yaa yogunu n den pundi, Dafidi den soani o guudikaaba yudaano Joabi, wani leni o naacenba leni Isalele toatieba kuli, ke ban ban bolini Amoni buolu ki lindi ki cebini bi dociamu Laba ki paadi u. Ama Dafidi den sedi Jelusalema.

² Yenjoyengu Dafidi n den fii o duanu po ki goadi wani o bado diegu yuli po, o den laa o pua ke o wuu. O den ŋani boncianla.

³ Dafidi den soani ki buali o pua yeni n tie yua, ke bi yedi o: «Eliami bisalo Bati-Seba yo, Heta buolu yua Uli pua.»

⁴ Dafidi den soani a tonda ke bi ban yini o. O den cua o kani ke o taani leni o ke o lebidi ki kuni o denpo. Lii den sua ke o pua yeni da li wali ki ñani li kuali.

⁵ O den punbi ki soani ke bi waani Dafidi ke o punbi.

⁶ Lani Dafidi den soani Joabi po li ñoabonli ki yedi: «Ŋan teni ke Heta buolu yua Uli n kpeni ne.» Joabi den teni ke Uli kuni Dafidi po.

⁷ Uli den pundi Dafidi kani ke o buali o Joabi leni bi toatieba kuli leni bu toabu laabaalo.

⁸ Li yaa puoli Dafidi den yedi Uli: «Kuni a denpo ki ban fuodi.» Uli n den ñani o bado diegu nni, o bado den ŋuani o puoli bu paabu.

⁹ Ama Uli den duani o bado diegu nintuali leni wani Dafidi naacenba kuli, waa den kuni o denpo.

¹⁰ Bi den waani Dafidi ke Uli ki kuni o denpo. Dafidi den yedi Uli: «A ñani banfoagili ki kpeni. Be yaa po ke ŋaa kuni a denpo?»

¹¹ Uli den goa ki yedi Dafidi: «U Tienu *ŋantaadikpaku leni Isalele yaaba leni Juda yaaba kuli ban ye a gbandiena nni, bi guudikaaba yudaano Joabi leni fini n daano naacenba kuli ban ye li toanagili nni. Mini mo, min kua n diegu nni, ki je ki go ño ki duani leni n pua? Hali U Tienu po n kan tieni laa bonla.»

¹² Dafidi den yedi Uli: «Go sedi dinla, saala n baa cabi a.» Uli go den sedi Jelusalema laa daali leni li dalieli.

¹³ Dafidi den yini o wan je ki ño leni o o saajekaanu kani, ki teni ke o ñuni ki gaadi. Ku ñiagu Uli den ñani ki duani leni Dafidi naacenba. Waa den kuni o denpo.

¹⁴ Lan den fii ki fa, Dafidi den diani Joabi po li tili ki teni Uli n ban teni o.

¹⁵ O den diani laa tili nni ki yedi: «Yin gedini Uli bu toabu n bia naankani ki cie, ki fuadi ki ŋa o ban pua o wan kpe.»

¹⁶ Li den sua ke Joabi lindi ki cebini u dogu ki bua ki cuo u. O den gedini Uli wan bani ke bi yibalinba jakoanda ye naankani ki guu.

¹⁷ U dogu jaba den ñani ki tuogi leni Joabi bu toabu. Bi den ku Heta buolu yua Uli mo.

¹⁸ Joabi den soani Dafidi kani o tondo wan waani o yaala n tieni kuli.

¹⁹ O den yedi o tondo yeni: «A yaa togidi o bado yaala n tientieni kuli ki gbeni,

²⁰ li fidi o pali n fii wan yedi: ‹Be yaa po ke yi nagini u dogu yeni ki tuogi leni ba? Yii bani ke bi se u dogu bilinciamu yuli po ki toa i piemi yoo?

²¹ Ŋme den ku Jelubeseti bijua Abimeleka? Pua ka den se u dogu bilinciamu yuli po ki lugidi o li bindicabili? Laa poagilima ka den kpa o Tebetisi dogu nni? Be yaa po ke yi nagini u bilinciamu?› Lanwani ŋan yedi o: ‹A naacemo Uli, Heta buolu yua yeni moko kpe!› »

²² O tondo den fii ki gedi. Wan den pundi Dafidi kani, o den togidi o Joabi n den yedi o yaala kuli.

²³ O den yedi Dafidi: «Bi niba yeni den pa ki cie ti ki ñani ki tuogi leni ti bu toabu i kuani nni. Ama ti den deli ba hali ki pundi u dogu bilinciamu buliñoabu kani.

²⁴ A dabantuada den sedi u bilinciamu yuli po ki toani ti ke fini o bado naacenba siiga bi nitianba kpe. A naacemo Uli, Heta buolu yua yeni moko kpe.»

²⁵ Dafidi den yedi o tondo: «Goa ki ban paagi Joabi pali ki yedi o: ‹Da yagi a yama laa bonla po, kelima yogunuba ki jugisiega baa kpa nepo yaa niba, yogunuba mo nepo yaa yaaba. Paagi aba ki go tuogi leni u dogu yeni ki bolini u.› »

²⁶ Uli pua n den gbadi ke o calo kpe, o den mua opo i kumoe.

²⁷ O calo Uli kuuma pabiidili n pendi, Dafidi den soani ke bi taa o ki cuani o o deni. O den tua o pua ki mali opo bonjaga. Dafidi n den tieni yaala yeni den biidi Li Miali Diedo pali.