2 Samueli 10 - Gourmanchéma Bible

¹ Lan den waagi waamu, Amoni buolu yaaba bado den guani. O bijua Anuni den tua bado ki ga o baa kaanu.

² Dafidi den yedi: «N baa ŋanbi Nahasi bijua Anuni po nani o baa n den ŋanbi npo maama.» Lanwani Dafidi den soani o naacenba ban ban baagi o o baa kuuma po. Dafidi naacenba n den pundi Amoni buolu yaaba diema nni,

³ Amoni buolu yaaba koanbala den yedi bi canbaa Anuni: «A tama ke Dafidi bua ki kpiagi a baa yo ki soani o naacenba ban baagi a? Laa tie ke ban gaani u dogu nni ki bandi u, ki yuandi ki bolini u ka ke o soani o naacenba a kani?»

⁴ Lanwani Anuni den teni ke bi cuo Dafidi naacenba ki kuo bi langbiadi boagidima, ki jiajia bi tiayiekaadi siiga nni ki pundi hali bi pana juodima. Li yaa puoli o den cabi ba.

⁵ Dafidi den ga laabaali ki soani a tonda ke bi tuogi ba kelima bi den ye leni i fe hali boncianla. Dafidi den teni ke bi waani ba ke ban sedi Jeliko hali bi langbiadi n goa ki pudi no, ban nan yuandi ki kpeni.

Dafidi tieni bu toabu Amoni leni Sili yaaba

⁶ Amoni buolu yaaba den laa bi yama nni ke bi fiini Dafidi pali, ki teni ke o nandi ba. Lani yaa po bi den taa Sili yaaba yaaba n ye Beti-Lehobi leni yaaba n ye Tisoba siiga taacenda tudapiilie (20 000), Maaka bado yaa kani minteela tudili, Tobi yaa niba yaa kani mo piiga n tudalie (12 000) ki baa pa ba i ligi.

⁷ Dafidi n den gbadi lani, o den teni ke Joabi, a minteela leni a jakoanda kuli, gedi ki ban tuogi ba.

⁸ Amoni buolu yaaba den ñani ki sedi ki caligi bu buliñoabu kani bu toabu po. Sili yaaba yaaba n ye Tisoba leni yaaba n ye Lehobi, leni Tobi yaa niba leni Maaka yaaba mo den paadi biba ki ban ye li fuali nni.

⁹ Joabi den sua ke o baa yaa tiendi bu toabu o nintuali leni o puoli kuli. Lanwani o den gandi Isalele jakoanda siiga yaaba n paa ki cie ki tieni toagoli yaali n baa tuogi leni Sili yaaba.

¹⁰ O den tuni o naataanu Abisayi yaa toatieba n sieni kuli yuli, ki teni ke bani mo baa tuogi leni Amoni buolu yaaba.

¹¹ O den yedi o naataanu: «Sili yaaba yaa paa ki cie nni, ŋan cua ki todi nni. Amoni buolu yaaba mo yaa paa ki cie ŋa, n baa cua ki todi a.

¹² Ŋan paagi aba. Tin moa leni mi jama ti niba po, leni ti Tienu dogi po. Li Miali Diedo mo n tieni yaala n dagidi opo.»

¹³ Joabi leni o toatieba den nagini ke bi baa tuogi leni Sili yaaba. Sili yaaba den lebidi ki sani.

¹⁴ Amoni buolu yaaba n den laa ke Sili yaaba lebidi ki sani, bani moko den lebidi ki sani Abisayi nintuali, ki kua u dogu nni, Joabi den lebidi ki cedi Amoni buolu yaaba ki guani ki kuni Jelusalema.

¹⁵ Sili yaaba n den laa ke Isalele yaaba paadi ba, bi den taani bi toagola kuli.

¹⁶ Hadadeseli den soani ke bi ban yini Sili yaaba yaaba n den ye u kpenciamu Yufilata duoli. Bi den cua Elami. Hadadeseli toatieba yudaano Sobaki den tugi bi yuli.

¹⁷ Bi den waani Dafidi. O den taani Isalele yaaba toatieba, ki duodi Judana kpenu ki gedi Elami. Sili yaaba den bogini ki tuogi leni Dafidi.

¹⁸ Ama Sili yaaba den gbali Isalele yaaba ki sani. Dafidi den ku toateliti kobilele gobidikaaba leni tanjagiba tudapiinaa (40 000). O den poagili bi yudaano Sobaki ke o kpe lankani.

¹⁹ Hadadeseli n den die yaa batieba kuli n den laa ke Isalele yaaba paadi ba, bi den goa ki mangi leni bani Isalele yaaba ki teni ke bi diedi ba. Sili yaaba ki go den tuo ki todi Amoni buolu yaaba.