2 Pieri 3 - Gourmanchéma Bible

¹ N buakaaba, line n tie min diani yipo yaa tilieli. A tilieda yeni kuli nni n moandi ki tiadi yi yaala n baa tigini yi yantiana yin yaa tia yaala n tiegi bonŋanla.

² Yin yaa tiadi bi sawalipuaba yaaba n gagidi ki ŋani n den soagindi yaa maama hali yogu po, ki go yaa tiadi o Diedo ti Candaano*balimaama, yi tondiba n den wangi yaama.

³ Yin tuodi ki bandi ke mi juodima yogunu, li ñuali danba baa cua leni bi ñuali, bani yaaba n ŋua bi gbanandi bonbuakaala.

⁴ Bi baa tua yi: «Waa den niani u ñoanianu ke o baa goa ki cua te? O nan ye le? Kelima hali ti yaajanba n kpe, ki taa ki pundi hali moala, li bonla kuli tie nani lan den tie maama mi tagima cilima yogunu yeni.»

⁵ Baa ke bi bani, bi yen sundi bi yama po ke hali yogu U Tienu den maadi o maama ke tanpoli tagi, ke ki tinga mo ñani mi ñima nni, ke mi lindi ki cebini ga.

⁶ Li tie laa bonla po ke o ŋandunkpialo den bodi kelima mi ñima den milini o cain.

⁷ U Tienu maama yeni baa kubi yaa tanpoli leni yaa tinga n ye moala, ki sieni la mi fantama po hali ti buudi daali leni U Tienu yiekaaba bolinma daali.

⁸ N buakaaba, yaa bonyenla n ye na, laa pundi yin sundi la, o Diedo po dayenli tie nani bina tudili, ke bina tudili mo tie nani dayenli yeni.

⁹ O Diedo baa kuani o ñoanianu li kan waagi, baa ke bi nitianba nua ke o waagidi. Li tie ke o pia yipo li juunle, kelima waa bua baa niyendo n bodi, ama ke bi niba kuli n lebidi bi yama.

¹⁰ O Diedo daali baa cua ki ludi bi niba nani li conconli yeni. Laa daali tanpoli baa bodi leni ku fuciangu. Yaala n ye lienni kuli baa cuo mi fantama ki nandi. Ki tinga leni yaala n ye lienni kuli mo baa cuo ki buodi.

¹¹ Lanwani, nani laa bonla kuli n baa nandi ki bodi yeni, li pundi yi tagu n gagidi ki yaa ŋani, ki go tuo U Tienu n yaa die yi cain.

¹² Yin yaa gu wani U Tienu daali cuama, ki yaa tiendi yaala n baa teni li daali yeni n jaligi ki cua. Laa daali tanpoli kuli baa cuo ki buodi, yaala n go ye kuli mo baa nandi.

¹³ Ama ti guudi o tanpopaano leni ki tinpanga, mi *teginma n baa ye naankani, nani o ñoanianu n yedi maama.

¹⁴ Lanwani n buakaaba, kelima yi gu laa bonla kuli, yin yaa moandi ke o yaa cua, wan sua ke yii pia joagindiba leni tagiliba kuli, ama ke yi pia mi yanduanma leni o.

¹⁵ Yin yaa nua mani ke ti Diedo n pia yaa juunli tie yi *tindima po, nani ti kpibuado Polo moko n den diani yipo maama ki ŋua U Tienu n den puni o yaa yanfuoma.

¹⁶ O dangi yeni o tila kuli nni o yaa maadi laa bonla maama, baa ke lienni pia yaa maama yaa gbadima n pa. Bi nitianba, yaaba n tie yanboandanba ki naa go se ke li pa, ŋmiagidi ki golindi li bundima nani ban tiendi maama leni yaa Diani n sieni bi bodima po.

¹⁷ Lanwani n buakaaba, kelima yi tuodi ki bani laa bonla kuli, yin yaa fangi mani yi yula ke U Tienu yiekaaba n da dadi yi bi yaadima nni, ke yi kan go yaa se ke li pa.

¹⁸ Ama yin yaa suagi liiga ti Diedo leni ti Candaano Jesu Kilisiti yaa *ŋanbili nni leni o yaa bandima nni ki pugidi. Wani n yaa baadi ti kpiagidi moala leni hali yaa yogunu kuli. Amina.