1 Timote 6 - Gourmanchéma Bible

¹ Yaaba n ye ti yonbidi yaa lolima nni n yaa nua ke li pundi ban yaa jigindi bi canbaanba, ke bi niba n da sugi U Tienu yeli leni o bangima.

² Yaa yonbi n tuuni yaa canbaanba n daani po n da fali ba kelima bi tie bi kpiiba. Ama ban yaa tuuni bipo bonŋanla ki cie, kelima bi tie yaaba n daani ki go tie bi buakaaba. Lani n tie ŋan baa bangi ki go bili ban yaa tiendi yaala.

Mi bangifaama leni ŋalimanbuama

³ Niloba yaa bangi bangitoama, kaa ŋua ti Diedo Jesu Kilisiti mamoanma yaama tuugi leni U Tienu tuoma,

⁴ o gbie leni ti japaadi ki naa bani pu. O pia i buali leni mi niama mi maama po ke li tie opo nani u yianu yeni. Lankuli cuani li nunponli leni li koanli leni ku tuotabigu leni mi yanmaalibiadima,

⁵ ki go teni ke yaaba yaa yama n biidi, bani yaaba n kaa go kubi i moamoani, n yaa nia leni biyaba yogunu kuli. Bi tama ke U Tienu tuoma tie ti ñuadi.

⁶ Moamoani, U Tienu tuoma pia ti ñuadi boncianla, li yaa tie ke o nilo mangi o pali leni wan pia yaala.

⁷ Kelima tii den cua leni liba kuli ŋanduna nni, ti yaa ña lienni mo ti kan fidi ki taa liba kuli.

⁸ Lanwani, ti yaa pia mi jiema leni ti tiayiekaadi, li baa dagidi tipo.

⁹ Ama yaaba n bua ki tua piada baa baa mi tulinma nni. Bi yankuabiada, ya n kaa pia yanfuoma ki baa biidi ba yeni, cuo ba nani u jogidu yeni, ki teni ke bi feli ki bodi, ke li bolini ba cain.

¹⁰ Kelima i ligi buama tie bonbiadila buoli kuli yaa jiinu. Bi nitianba den kuani bi yama mi ligibuama nni, ki yaadi ki ŋa li *dandanli ki kuani bi yula li pabiidicianli nni.

Polo n tundi Timote yaa tundi

¹¹ Ama fini U Tienu nilo, ŋan sani ki ŋa laa bonla ki yaa ŋua mi*teginma, leni U Tienu tuoma, leni li dandanli, leni mi buama, leni li juunli, leni mi dingima.

¹² Ŋan yaa moa li dandanli yaa muaŋanli, ki cuo yaa miali n kan gbeni, U Tienu n den yini a ke ŋan baa yaali, ŋan go den tieni yaa siediŋamo bi niba boncianla nintuali kelima yaali yaa po.

¹³ N teni a li ñoabonli U Tienu yua n puni yaala n fo kuli li miali yaa nintuali, leni Jesu Kilisiti nintuali, wani yua n den tieni o siediŋamo Ponisa Pilata nintuali,

¹⁴ ke ŋan yaa ŋua min teni a yaa ñoabonli na cain, ki da tudi baa waamu hali ti Diedo Jesu Kilisiti n baa doagidi o yuli yaa yogunu.

¹⁵ Li yogunu yaa pundi, U Tienu baa teni ke o doagidima yeni n tieni, Wani U Tienu yua bebe n pia ti kpiagidi, Yua yaa bali n cie batoali kuli, Wani bi badiba kuli Badiciamo Leni bi diediba kuli yaa Diedo.

¹⁶ Wani bebe n ki pia kuuma, Ki ye miali kuli n kan nagini yaa yenma nni. Miali kuli n daa laa yua Ki kan fidi ki le o mo. Wani n pia yaa jigidi leni yaa paaciamu N ki pia gbenma hali yaa yogunu kuli. Amina!

¹⁷ Ŋan tundi yaaba n tie a piada ŋanduna na niinni ke ban da pia ti japaadi, ki da piani bi yula bi piama po, yaama n naa pia dugidi. Ama ban piani bi yula U Tienu po, wani yua n puuni ti li bonla kuli ke li kandi, ki bua tin mangi ti pala lipo.

¹⁸ Ŋan go tundi ba ke ban yaa tiendi yaala n ŋani, ki tiendi a tuonŋama ke li yaba, ke lani n yaa tie bi piama. Ŋan go tundi ba ke ban yaa pia ti bulicindi, bi nii mo n yaa tiani.

¹⁹ Ban yaa tiendi yeni ki biliti bi yula po o ŋalimanmoano yaa yogunu n baa ti cua po ki fidi ki cuo li miamoanli.

²⁰ Fini Timote, ŋan yaa gu U Tienu pianli, ki paadi leni yaa mafanma n ki yegi leni li dandanli leni yaa niama n ñani bi niba bandima yaama n ki tie moamoani kani.

²¹ Bi nitianba ŋoadi laa bonla ki yaadi ki ŋa li dandanli. U Tienu *ŋanbili n yaa ye leni yikuli.