1 Timote 5 - Gourmanchéma Bible

¹ Ŋan da tundi o nikpelo leni ku fuugu. Ama ŋan tundi o nani o tie a baa yeni. Ŋan tundi bi jawaaba nani bi tie a waamu yeni,

² ki tundi a pociana nani bi tie a naanba yeni, bi jafanba mo nani bi tie a naataanpola yeni leni ku yantugupiengu kuli.

³ Ŋan yaa jigindi yaa kpepuona n kaa go pia kubikaaba.

⁴ Li kpepuoli yaa pia a bila, yaaka a yaabila, li pundi ban bandi ki yaa tiendi yaala n pundi yua n ŋua U Tienu n yaa tiendi yaala o danba po, ki guani bi danba bi ŋanma. Kelima lani n tie yaala n mani U Tienu po.

⁵ Yaa kpepuoli n ye obebe kaa pia kubika bili o suginma U Tienu kani ki miadi o u yensiinu leni ku ñiagu kuli ke wan yaa todi o.

⁶ Yaa kpepuoli n puni o yuli ŋanduna jeligu po kpe, baa ke o da fo.

⁷ Ŋan yaa wangi ba lankuli, ki tundi ba ke ban da pia ban baa fidi ki kuli ba leni yaala.

⁸ O nilo yaa kubi o niba, yaala n tugi li yuli tie o dieceli niba, o nia li *dandanli, o go bia ki cie yua n kaa daani.

⁹ Ŋan da diani kpepuoli yeli a kpepuona tili nni kali o pundi bina piiluoba, ki den pia jayendo,

¹⁰ ki tie bi niba n pagi yua o tuonŋama po, ki go tie yua n den wubi a bila, ki gaani bi canba cangu leni mi buama, ki nigidi bi*nigagidiŋanba taana, ki todi yaaba n ye leni fala, ki tieni a tuonŋama buoli kuli.

¹¹ Ŋan da tuo ki diani yaa kpepuoli n da paani kelima o gbanandi yaa paadi o ke o bua ki kuni o ja, o baa lebidi ki ŋa Kilisiti,

¹² ki baa i tagili nni ki ŋa wan den kpa niani yaa ñoanianu.

¹³ Bi go tua bi kpadijedanba yaaba n goadi ki tuadi ti diedi. Laa tie lani bebe, bi go tua bi lanpaadanba leni a tingbangbaaba, ki maadi lan kaa pundi ban maadi yaa maama.

¹⁴ Lani yaa po, n bua ke yaa kpepuona n da paani n kuni bi jaba, ki maa a bila, ki kubi bi diegu ŋantaadi, ki da pa yibali u sanu ban sugi ba.

¹⁵ Kelima baa moala a kpepotiama lebidi ki ŋua Sutaani.

¹⁶ Yaa pua bi yaa ja n daani yaa pia o danba ke bi tie kpepuona, wan yaa todi ba, ki da tuni Kilisiti n yini yaaba laa tugili, ke bi baa fidi ki todi yaa kpepuona n kaa pia kubikaaba.

¹⁷ Li pundi ke Kilisiti n yini yaaba nikpeliba yaaba n gobidi bonŋanla n baa ti jigidi ki cie. Lan pundi yaaba n baa yeni ki cie tie yaaba n kuandi bi yama U Tienu maama wangima nni leni U Tienu maama bangima nni.

¹⁸ Kelima li diani i Diani nni ki yedi: «Ŋan da yilini o nua ñoabu takunkumi wan ŋmaadi ki suodi ti siandi yaa yogunu.» Li go diani ki yedi: «Li pundi o tuonsoanlo n baa o panpaani.»

¹⁹ Ŋan da ga makuligaba kuli Kilisiti n yini yaaba nikpelo po, li yaa tie siedinba lie yaaka siedinba taa yaa ñoana nni.

²⁰ Ŋan fu leni yaaba n tieni ti *tuonbiadi bi niba kuli nintuali, ke yaaba n sieni n jie.

²¹ N teni a yaa ñoabonli n tie na U Tienu nintuali leni Jesu Kilisiti nintuali, leni bi maleki-gandikaaba yaa nintuali, ke ŋan yaa ŋua laa maama kuli ki da gagidi bi niba leni biyaba, ŋan tieni bikuli po yenma.

²² Ŋan da jaligi ki maani a nii niloba po, ki da taani leni nitoa o tuonbiadi nni. Fini aba mo n kubi a yuli ki yaa ŋani.

²³ Ŋan da go ñu mi ñima bebe, ŋan yaa ñu duven waamu waamu, yaala n baa todi a a tugukoanu po leni yaa yiani n lindi ki co ŋa po.

²⁴ Bi nitianba tuonbiadi doagidi bi niba kuli po baa ke bi daa biigi ba. Ama nitianba yaa tuonbiadi kan doagidi kali bi biigi ba.

²⁵ Li go tie yeni leni a tuonŋama, ya n doagidi bonŋanla bi niba kuli po ye, ya n duagi mo kan yaa wuo hali yaa yogunu kuli.