1 Timote 2 - Gourmanchéma Bible

¹ Min kpa tundi yi yaala tie ke yin yaa jaandi U Tienu, ki miadi o ki tuondi o bi niba kuli po,

² leni bi badiba leni bi yudanba kuli po, ke tin baa ki yaa ye leni mi yanduanma leni mi yansoangima, ki ŋua U Tienu ke li dagidi ki go tiegi.

³ Lani n ŋani ki go mani U Tienu ti Candaano po,

⁴ wani yua n bua bi niba kuli n tindi, ki go bandi i moamoani.

⁵ Kelima U Tienu ye ki tie yendo bebe, o *candanbaalo moko ye ki tie yendo bebe U Tienu leni bi niba siiga, lani n tie Jesu Kilisiti yua n den tua nisaalo.

⁶ Wani n den puni o yuli ki kpe ki pani mi *faabima panli bi niba kuli po. Laa siedi n den tieni u yogunu n den pundi.

⁷ Li tie lani yaa po ke U Tienu den puogi nni ke min yaa tie mawangika leni tondo ki bangi bi nilanba li *dandanli leni i moamoani nni. N maadi i moamoani, mii pua faama.

Bi jaba leni bi puoba maama

⁸ Lanwani n bua ke bi jaba n yaa jaandi i kaani kuli ki yugidi yaa nii n ŋani cain, ki naa pia pabienli leni niamaba kuli.

⁹ N go bua ke bi puoba n yaa yie yaa tiadi n dagidi, ki pia li fangili leni li yukubili, ki da sibidi biba leni i yupiani leni wula tiadi, leni yaa lanbima yaa dunga pa, leni tiatoadi moko yaadi yaa dunga n pa.

¹⁰ Ama ban yaa sibidi biba leni a tuonŋama, lan dagidi yaa puoba n tieni siedi ke bi ŋua U Tienu n yaa tiendi maama.

¹¹ Pua kuli n yaa cengi mi bangima leni li yumiinmoanli ki ŋmini.

¹² Mii puni o pua u sanu wan bangi, bi wan diedi o ja, ama wan yaa ŋmini.

¹³ Kelima U Tienu den kpa tagi Adama ki yuandi ki tagi Awa.

¹⁴ Li naa tie Adama ka den kua mi tulinma nni, ama li tie o pua n den kua mi tulinma nni ki miidi li *bali maama ki tua i tagili daano.

¹⁵ Baa yeni, o baa faabi kelima o maalu po, li yaa tie ke o se li dandanli nni, leni mi buama, leni mi gagidiŋanma leni li yukubili kuli nni.