1 Samueli 9 - Gourmanchéma Bible

¹ Benjamina buolu yua den ye ki yi Kisi. O yaaja Afia den tie Benjamina buolu yua ki mali Bekola, Bekola mo den mali Selo, Selo mo n maa Abieli, Kisi yeni yaa baa. Kisi den tie nikpiagili ki pia.

² O den pia o bijua ke o yi Sayula. O den tie jabiemo ki pia mi jawaama. Isalele yaaba siiga yua den cie o jawaama ki den ye. O go den caadi bikuli li yuli.

³ Sayula baa Kisi ŋunñoe den yaadi. Kisi den yedi o bijua Sayula: «Ŋan taa naacenyendo ki fii ki gedi ki ban lingi i ŋunbi.»

⁴ Sayula den fii ki tagini Efilayima juana po ki poandi Salisa diema, waa laa i ŋunbi. Wani leni o naacemo den tagi Salimi diema kaa laa ba lanpo mo. Lanwani bi den poandi Benjamina diema nni, baa didi laa ba.

⁵ Ban den pundi Tisufi diema, Sayula den yedi o naacemo yua den yegi leni o: «Tin lebidi ki kuni ke n baa n da ti sundi i ŋunbi po ki yagi o yama tinba yaa po.»

⁶ O naacemo den yedi o: «Diidi ki le, U Tienu nilo ye u dogu yu tie na niinni. O tie nikpiagili. Wan yedi ke yaala n baa tieni kuli baa tieni. Lanwani tin gedi o kani. Daalinba o baa waani ti tin baa tagini naani ki lingi ki le ba.»

⁷ Sayula den yedi o naacemo: «Ama ti yaa gedi U Tienu nilo yeni kani, ti baa pa o be? Kelima ti naa go pia jiema ti boaga nni, tii pia tin baa pa o yaala. Ti pia be?»

⁸ O naacemo den yedi Sayula: «Diidi, n kubi ŋanjilifa waamu ke o kpiagu pundi sikili boagidima. N baa pa la U Tienu nilo wan waani ti ti sanu.»

⁹ Hali yogu, Isalele diema nni bi yaa den bua ki gedi ki mia U Tienu wan doagidi bipo bonla, bi den yen yedi: «Tin gedi yua n nua saala bonla po.» Kelima moala ban yi yua o sawalipualo, kpiama bi den yi o yua n nua saala bonla.

¹⁰ Sayula den yedi o naacemo: «A maadi moamoani, cua tin gedi.» Lane bi den gedi U Tienu nilo n den ye yaa dogu nni.

¹¹ Ban den caa u dogu yeni po, bi den tuogi leni bi jafanba ke bi ñani ki baa luuni mi ñima. Bi den buali ba: «Yua n nua saala bonla ye ne bii?»

¹² Bi jafanba den goa ki yedi ba: «Mm, o da li pundi u dogu nni moala nne. O cua dinla kelima u dogu nni pia li padili li juali po. Lanwani yin gedi tontoni.

¹³ Yi yaa kua u dogu nni yi baa le o hali ke o daa gedi li juali po ki baan je, kelima bi niba kan je se o cua, wani n baa jaandi ki mia U Tienu n seligi li padili, ban yini yaaba n nan yuandi ki je. Gedi mani ke moala yi da baa le o.»

Sayula laa Samueli

¹⁴ Lanwani Sayula leni o naacemo den kua u dogu nni. Ban den pundi u dogu siiga bi den tuogi leni Samueli ke o caa u kaangagidikaanu po.

¹⁵ Li den sua ke Sayula n den baa faa ki cua yaa daali, Li Miali Diedo den tuodi ki yedi Samueli:

¹⁶ «Saala, u naa yogunu, n baa soani a kani Benjamina diema yua. Ŋan wuli o yuli po li bali kpama ki gagidi o wan tua n niba Isalele yaaba yudaano. O baa faabi bani n niba yeni Filisiti yaaba nuu nni, kelima n noanli ki laa n niba fala, bi bubula mo pundi hali n kani.»

¹⁷ Samueli n den laa Sayula yaa yogunu, Li Miali Diedo den yedi wani Samueli: «Min den maadi a o ja yua yaa maama yeni nne. Wani n baa diedi n niba.»

¹⁸ Sayula den nagini Samueli kani u dogu bilinu buliñoabu siiga ki yedi o: «Min le yua n nua saala bonla n ye yaa diegu?»

¹⁹ Samueli den goa ki yedi Sayula: «Mini n tie yua n nua yaala n baa faa ki tieni saala. Ga liiga ki yaa cuoni tin gedi u kaangagidikaanu po. Mini leni yinba n baa taani ki je dinla. Saala n baa waani a ŋan kpaagi yaala a pali nni kuli, ki yuandi ki pa ŋa u sanu.

²⁰ Ŋan da yagi a yama yaa ŋunbi n den bodi dinla dana taa yeni yaa po, kelima bi laa ba. Bi bili Isalele diema nni yaala n tie bonmoanla kuli ŋme yaa po yo? Laa tie a yaa po leni a baadiegu yaaba yaa po kaa?»

²¹ Sayula den goa ki yedi o: «Mii tie Benjamina buolu yua kaa, Isalele buoli kuli siiga yaa buolu n wa ki cie? N yaa diegu mo ka wa ki cie Benjamina diedi siiga kuli? Lanwani be yaa po ke a maadi nni mine?»

²² Lanwani Samueli den taa Sayula leni o naacemo ki kuani ba li dieli nni, ki teni ke bi kali yaa kaanu n pia ti kpiagidi ki cie ban yini yaaba mi jiema po kuli n kaa yaa kaani. Ban den yini yaaba den bua ki pundi niba piitaa.

²³ Samueli den yedi yua ŋanbi mi jiema: «Cuani min bi teni a yaa biinu ki yedi ŋan paadi ki bili yeni ne.»

²⁴ Yua ŋanbi mi jiema den taa li taali leni li juoli ki cuani ki sieni Sayula nintuali. Samueli den yedi Sayula: «Ban bi sieni a yaa biinu n yeni. Taa ki nagini aba ki yaa ŋmani kelima bi bi bili la a yaa po hali min yini bi niba ke ban cua ki je yaa yogunu.» Yeni Sayula den dini leni Samueli laa daali.

²⁵ Ban den ñani u kaangagidikaanu kani ki kua u dogu nni, Samueli leni Sayula den doni ku doangu yuli po ki boni.

²⁶ Bi den faa ki fii hali ku tiŋapanpangu. U yienu n pudi yaa yogunu, Samueli den yini Sayula ki yedi o ku doangu tanpoli: «Fii min piadi a.» Sayula den fii ke bikuli yegi ki ñani, wani leni Samueli.

²⁷ Ban den pundi u dogu banlu, Samueli den yedi Sayula: «Waani a naacemo wan kua liiga.» O naacemo den kua liiga. Samueli den yedi: «Moala ŋan sedi, n baa waani a U Tienu n yedi yaala.»