1 Samueli 8 - Gourmanchéma Bible

¹ Samueli n den kpeligi, o den teni ke o bijaba tua Isalele yaaba gobidikaaba.

² O bijakpelo den yi Joeli, o bonlielo mo Abiya. Bi den ye Beli-Seba ki ja ti buudi.

³ Baa den ŋua bi baa Samueli fuuli, bi den bua mi piama boncianla ki gaani a suuna. Baa den gobidi ke li tiegi.

⁴ Lane Isalele yaaba nikpela kuli den taani ki cua Lama, Samueli kani

⁵ ki yedi o: «Diidi, a kpeligi, a bijaba mo naa ŋua a fuuli baa waamu. Lanwani ŋan dini tipo o bado wan yaa die ti, nani i nibuoli kuli n pia maama.»

⁶ Samueli pali den biidi leni ban mia o bado wan yaa die ba. Lanwani Samueli den jaandi ki mia Li Miali Diedo.

⁷ Li Miali Diedo den yedi Samueli: «Cengi bi maama ki tieni ban yedi yaala kuli. Kelima laa tie ke bi yie fini ka, bi yie mine, ke min da go die ba.

⁸ Bi tieni a nani ban tieni mini maama hali min ñani ba Ejipiti nni ki cuani ba ne, hali ki pundi hali moala. Bi ŋaa nni ki ŋoadi i *buli.

⁹ Lanwani ŋan cengi bi maama, ama ŋan tuodi ki waani ba yaa bado n baa ti yaa die ba n baa yaa pia yaa bali.»

¹⁰ Samueli den togidi Isalele yaaba, bani yaaba n den miadi o o bado yeni, Li Miali Diedo n yedi yaala kuli.

¹¹ O den yedi: «Diidi mani yaa bado n baa yaa die yi n baa yaa pia yaa bali. O baa ga yi bijaba ki teni bine n yaa gobidi o toateliti, bine n yaa jagi o toataami, bine mo n yaa tiini wani oba yaa toateligu liiga.

¹² O baa teni bi tianba n yaa die toatieba tudili, bi tianba mo n yaa die toatieba piimuu. O go baa teni bine n yaa ko o kuani ki yaa taagi o jetaagu, bine mo n yaa tagi o toatiadi leni o toateliti yaa tiadi.

¹³ O baa ga yi bisiaba ki teni tianba n yaa ŋanbidi tulale, bine n yaa ŋanbidi mi jiema, bine mo n yaa pua dupen.

¹⁴ O baa ga yi kuani leni yi duven tiidi leni yi*olifie tiidi kuli siiga yaala n ŋani ki cie, ki teni o naacenba.

¹⁵ O baa ga yi kpaandi leni yi duven tiidi yaa *dim ki teni o naacenba.

¹⁶ O baa ga yi naacenba leni yi yuali leni yi jawaaba leni yi ŋunbi ban yaa tuuni o tuona.

¹⁷ O baa ga yi yandi yaa dim, yinba yiba mo baa tua o yonbi.

¹⁸ Laa yogunu yi baa yaa buudi ki yenbidi yi bado po, yin den gandi yua yinba yiba, ama Li Miali Diedo kan cengi yipo.»

¹⁹ Baa lankuli Isalele yaaba den yie, baa den cengi Samueli maama. Bi den yedi: «A-a, ti bua ki baa o bado yua baa yaa die ti,

²⁰ ke timoko baa yaa naani leni i nibuoli kuli. Ti bado yeni baa yaa ja tipo ti buudi. O baa yaa ye ti liiga ki gobidi ti bu toabu nni.»

²¹ Samueli n den gbadi Isalele yaaba maama kuli, o den togidi ma Li Miali Diedo.

²² Li Miali Diedo den yedi Samueli: «Cengi ban yedi a yaala ki dini bipo o bado.» Samueli den cabi Isalele yaaba ban kuni.