1 Samueli 7 - Gourmanchéma Bible

¹ Kilijati-Jealima yaaba den cua ki taa gu ki ban kuani gu Abinadabi diegu nni, li juali po. Bi den gagidi o bijua Eleyasala ke wan yaa guu Li Miali Diedo *ŋantaadikpaku yeni.

Isalele yaaba paadi Filisiti yaaba

² Ban den gedini ku ŋantaadikpaku Kilijati-Jealima, gu den waagi ki bili lipo, ki den pundi bina piilie likani. Isalele yaaba kuli den buudi ki goa ki nuali Li Miali Diedo.

³ Samueli den yedi Isalele yaaba kuli: «Yi yaa guani Li Miali Diedo kani leni yi pala kuli, yin ñani yi siiga o bulo *Asitate leni bi nilanba n ŋua yaa *buli kuli. Yin ŋoadi mani U Tienu leni yi pala kuli ki yaa tuuni wani bebe yaa po, lani o baa faabi yi Filisiti yaaba nuu nni.»

⁴ Lanwani Isalele yaaba den ñani bi buli, *Baali leni Asitate nannana bi siiga, ki ŋua Li Miali Diedo bebe.

⁵ Samueli den yedi: «Yin taani mani Isalele yaaba kuli Mitisipa dogu nni ke n baa mia yipo Li Miali Diedo.»

⁶ Bi den taani Mitisipa ki luuni mi ñima ki wuli Li Miali Diedo nintuali. Bi den loli bu ñoabu laa daali ki yedi: «Ti tudi Li Miali Diedo po.» Samueli den ye Mitisipa ki gobidi Isalele yaaba.

⁷ Filisiti yaaba n den gbadi ke Isalele yaaba taani Mitisipa, bi koanbala den doni ki baa tuogi leni Isalele yaaba bu toabu. Isalele yaaba n den gbadi laa laabaalo, bi den jie Filisiti yaaba,

⁸ ki yedi Samueli: «Ŋan da cedi tipo bu miabu Li Miali Diedo ti Tienu kani, ke wan faabi ti Filisiti yaaba nuu nni.»

⁹ Samueli den taa yaa pebiga n da ŋaani ki padi ga ki juu ga bonmunli li padijuukaali Li Miali Diedo po. O den kpaani ki mia Li Miali Diedo Isalele yaaba po ke wani Li Miali Diedo ga o miabu.

¹⁰ Samueli n da den padi li padijuukaali yaa yogunu, Filisiti yaaba den nagidi ki baa baa Isalele yaaba. Li Miali Diedo den teni ke i tatantani tieni ke Filisiti yaaba jie ki duodi ki sani. Isalele yaaba den paadi ba.

¹¹ Isalele yaaba toatieba den ñani Mitisipa ki deli Filisiti yaaba ki pundi hali yaa kaanu n yi Beti-Kadi liiga, ki paadi ba cain.

¹² Samueli den taa li tancianli ki bili li Mitisipa leni Sena siiga ki yini li Ebeni-Eseli, lani n tie: “Mi todima Tanli”, ki yedi: «Li Miali Diedo todi ti ki pundi hali ne.»

¹³ Bi den paadi Filisiti yaaba yene. Baa go den kpendi Isalele yaaba diema nni. Li Miali Diedo nuu den miabi Filisiti yaaba hali Samueli miali banlu kuli.

¹⁴ Isalele yaaba den goa ki ga Filisiti yaaba n den fie bikani yaa dogi, ki cili Ebiloni ki yaa caa hali Gati. Bi den goa ki ga laa tinbuona kuli Filisiti yaaba kani. Mi yanduanma den tieni Isalele yaaba leni Amola yaaba siiga mo.

¹⁵ Samueli den gobidi Isalele yaaba hali o miali banlu kuli.

¹⁶ Binli kuli o den yen gaani Betela dogu leni Giligali dogu leni Mitisipa, ki gobidi Isalele yaaba laa kaantaadi kuli.

¹⁷ Li yaa puoli o den yen guani Lama, o diegu n den ye naani. Lankani moko o den gobidi Isalele yaaba. O den maa likani li *padibinbinli Li Miali Diedo po.