1 Samueli 6 - Gourmanchéma Bible

¹ Li Miali Diedo *ŋantaadikpaku den tieni ŋmaali lele Filisiti yaaba diema nni.

² Filisiti yaaba den yini bi kopadicianba leni a lingida ki yedi ba: «Ti baa tieni Li Miali Diedo ŋantaadikpaku lede? Waani ti mani tin baa tieni maama ki guani gu ku kaanu.»

³ Bi kopadicianba leni a lingida yeni den goa ki yedi ba: «Yi yaa baa guani Isalele yaaba Tienu ŋantaadikpaku, yin da guani gu bonkuongu, yin padi U Tienu po yaa padili n baa mia yi biadima sugili. Yeni yi baa faabi, yi go baa bandi yaala yaa po ke o nuu miabi yi ki naa cedi.»

⁴ Filisiti yaaba den goa ki yedi: «Tin pa U Tienu be yaa paabu buolu?» Bi den goa ki yedi ba: «Yin duadi a sinakpina nannana bona muu ŋan yaa tie wula, leni a dapola yaa nannana bona muu ŋan moko n yaa tie wula, nani Filisiti yaaba koanbala n de maama, kelima falabuoliyendo cuo yikuli, taliginba leni a koanbala kuli.

⁵ Yin duadi mani a sinakpina nannana leni a dapola yaa nannana, yaa dapola n bolindi yi diema. Yin go kpiagi Isalele yaaba Tienu. Daalinba o baa faabi yi leni o nuu n miabi yi maama, yinba leni yi *buli leni yi diema kuli.

⁶ Be yaa po ke yi baa juagi yi pala nani Ejipiti yaaba leni *Falono n den juagi bi pala maama yeni? U Tienu ki den soani o buudi bikani te? Laa yogunu baa den cabi Isalele yaaba ki cedi ke bi ñani?

⁷ Moala yin tagi mani teligupangu ki taa ki maani naamadi lie po. Yaaba ke teligu daagu daa maani bipo, yin taa teligu ki doali ba, ki cuo bi bila yaaba n ŋua ba yeni, ki kuani ba u naapagu nni.

⁸ Lani yin taa U Tienu ŋantaadikpaku ki maani gu ku teligu po, ki taa yin duadi yaa nannana ke a tie wula yin padi yaa ki puni U Tienu yi *tuonbiadi po yeni, ki kpieni ki kpagibiga nni ki bili ki balini U Tienu ŋantaadikpaku. Li yaa puoli yin cedi gu gun gedi.

⁹ Yin yaa se ki diidi. Gu yaa cubini gu denpo sanu, ki cuubi Isalele yaaba dogu Beti-Semesi po, li tie U Tienu n luni ti laa falaciamo. Li yaa tua yeni mo, ti baa bandi ke wani yaa nuu ka mabini ti, ke li cua tikani fanma fanma.»

¹⁰ Bi den tieni yeni. Bi den taa naamadi lie ki taa teligu ki doali ba. Bi den luoni bi bila u naapagu nni.

¹¹ Bi den taa Li Miali Diedo ŋantaadikpaku leni yaa kpagibiga n pia a dapola leni bi sinakpina nannana ki maani ku teligu po.

¹² A naañuana den taa Isalele yaaba dogu Beti-Semesi sanu. Bi den kubi laa sanu ki mua. Baa den jadi ganu bi jienu. Filisiti yaaba koanbala den ŋua bi puoli po hali ki ban pundi Beti-Semesi tinbianu kani.

¹³ Li den sua ke Beti-Semesi yaaba ce *ŋalikama ku joaloangu nni. Bi den yaadi ki diidi ki laa ku ŋantaadikpaku ki mangi bi pala leni ban laa gu.

¹⁴ Ku teligu den pundi Beti-Semesi yua Josue kuanu nni ki sedi. Likani den pia ku tanciangu. Bi den yagidiyagidi ku teligu daadi ki taa a naañuana ki padi ba li padijuukaali Li Miali Diedo po.

¹⁵ Lefi buolu yaaba den jiini Li Miali Diedo ŋantaadikpaku leni yaa kpagibiga n baali gu ki pia yaa nannana n tie wula, ki maani likuli ku tanciangu yeni po. Laa daali Beti-Semesi yaaba den padi a padijuukaana leni a padifana Li Miali Diedo po.

¹⁶ Filisiti yaaba koanbamuuda n den laa lani kuli, bi den lebidi ki guani Ekiloni landaali go.

¹⁷ Filisiti yaaba n den puni Li Miali Diedo yaa wula sinakpin-nannana ki mia bi tuonbiadi sugili n tie ane: sinakpin-nannanyenli den tie Asidodi dogu yaaba po, yenli Gasa dogu yaaba po, yenli Asikaloni dogu yaaba po, yenli Gati dogu yaaba po, yenli mo Ekiloni yaaba yaa po.

¹⁸ A wula daponannana moko den ye ke bi coali de leni Filisiti koanbamuuda n die yaa dogi n de maama, i bilinciami n lindi ki cebini yaa dogi leni yaa dogi n ki pia bilini kuli. Ban den maani Li Miali Diedo ŋantaadikpaku yaa tanciangu po yeni baa ye hali dinla Beti-Semesi yua Josue kuanu nni ki tie siedi laa bonla kuli po.

¹⁹ Li Miali Diedo den pua ki ku Beti-Semesi yaaba siiga niba piilele kelima bi den noanli o ŋantaadikpaku. Bi niba den ye leni li paboanli kelima Li Miali Diedo den luni ba yaa fala n bia.

²⁰ Lane Beti-Semesi yaaba den yedi: «Ŋme baa fidi ki yaa ye ki fo Li Miali Diedo, U Tienu Yua n Gagidi ki ŋani nintuali? Ku ŋantaadikpaku baa gedi le ki foagidi ti kani?»

²¹ Bi den soani a tonda ban ban yedi Kilijati-Jealima dogu yaaba: «Filisiti yaaba guani Li Miali Diedo ŋantaadikpaku. Yin cua mani ne ki taa gu ki gedini gu yi po.»