1 Samueli 5 - Gourmanchéma Bible

¹ Filisiti yaaba den fie U Tienu *ŋantaadikpaku ki ñani gu Ebeni-Eseli dogu ki gedini gu Asidodi dogu.

² Bi den ban kuani ki sieni gu bi *bulo Dagona dieli nni, ki kuli gu leni o bulo yeni nannanli.

³ Lan den fii ki faa, Asidodi yaaba den fii ku tiŋapanpangu ki sua ke Dagona baa ki laabi Li Miali Diedo ŋantaadikpaku nintuali. Bi den fiini Dagona ki goa ki sieni o o kaanu.

⁴ Lan go den fii ki faa ke bi fii ku tiŋapanpangu, bi go den sua ke Dagona laabi Li Miali Diedo ŋantaadikpaku nintuali. Dagona yuli leni o nibualiediti den kua ki bibili li buliñoakoali kani. Liba kuli ki den sieni se o siiga bebe.

⁵ Li tie lani yaa po ke hali dinla Dagona kopadicianba leni yaala n kua Dagona dieli nni Asidodi dogu nni kan ŋma laa dieli buliñoakoali.

⁶ Li Miali Diedo den mabini Asidodi yaaba. O den luni bani Asidodi yaaba leni u tinkundogi yaaba kuli a sinakpina.

⁷ Asidodi yaaba n den sua ke li tie yeni, bi den yedi: «Isalele yaaba Tienu ŋantaadikpaku kan yaa ye ti kani, kelima o mabini tinba leni ti bulo Dagona kuli.»

⁸ Lane bi den soani ke bi yini Filisiti yaaba koanbala kuli ke bi taani bi kani ke bi yedi ba: «Ti baa tieni mani Isalele yaaba Tienu ŋantaadikpaku lede?» A koanbala den goa ki yedi ba ke ban gedini gu Gada dogu nni. Lanwani bi den gedini gu lipo.

⁹ Ama ban den taa ki gedini gu, Li Miali Diedo nuu den mabini laa dogu yaaba ke ti jawaanciandi cuo ba. O den luni bimoko a sinakpina, a bila leni a nikpela kuli.

¹⁰ Lane bi den gedini U Tienu ŋantaadikpaku yeni Ekiloni dogu. Gun den kua laa dogu nni yaa yogunu, u dogu yaaba den buudi ki yedi: «Bi cuani U Tienu ŋantaadikpaku ti kani ki baa kpa ti, tinba leni ti niba kuli.»

¹¹ Lane bi den soani ke bi yini Filisiti yaaba koanbala kuli ke bi taani ke bi yedi ba: «Yin guani mani Isalele yaaba Tienu ŋantaadikpaku gu denpo, gun da kpa ti, tinba leni ti niba kuli.» Bi den yedi yeni kelima u dogu nni yaaba kuli den ye leni ti jawaandi boncianla kelima U Tienu nuu den miabi ba hali hali boncianla.

¹² Yaa niba n ki den kpe, a sinakpina den cuo ba. U dogu yeni yaaba bubula den pundi hali tanpoli.