1 Samueli 4 - Gourmanchéma Bible

¹ Samueli mo den soagindi laa maama Isalele yaaba kuli po. Isalele yaaba den ñani ki baa tuogi bu toabu leni Filisiti yaaba. Bi den kpa bi toanagili ki kuu leni Ebeni-Eseli dogu, Filisiti yaaba mo den kpa bi yaa toanagili Afeka dogu.

Filisiti yaaba fie U Tienu ŋantaadikpaku

² Filisiti yaaba den caligi ki baa tuogi leni Isalele yaaba bu toabu. Bu toabu den cili. Filisiti yaaba den paadi Isalele yaaba ki ku yaa jaba n bua ki pundi tudanaa (4 000) laa toabu nni.

³ Isalele toatieba n den guani bi toanagili po, bi nikpela den yedi: «Be n tieni ke Li Miali Diedo cedi ke Filisiti yaaba paadi ti dinla? Tin gedi Silo ki ban taa Li Miali Diedo *ŋantaadikpaku ki cuani gu ti siiga gun ga ti ti yibalinba nuu nni.»

⁴ Isalele yaaba den soani Silo ke bi ban taa Li Miali Diedo, U Paaciamu Daano yua n kaa o bali kalikaanu po*selubanba tanpoli yaa ŋantaadikpaku. Eli bijaliediba Ofini leni Finea moko den yegi leni U Tienu ŋantaadikpaku.

⁵ Ban den kuani Li Miali Diedo ŋantaadikpaku li toanagili nni, Isalele yaaba kuli den kpaani li pamanli kpaani hali ke ki tinga ban digibi.

⁶ Filisiti yaaba den gbadi bi kpaani yeni ki yedi: «Yaa kpaani n kpaani Ebilu yaaba toanagili nni ne bua ki yedi be?» Ban den bandi ke U Tienu ŋantaadikpaku n pundi Isalele yaaba toanagili kani,

⁷ ti jawaandi den cuo ba kelima bi den yieni ke U Tienu cua Isalele yaaba toanagili nni. Bi den yieni: «Ti bia, kelima hali moala laa bonbuolu daa bi tieni.

⁸ Ti bia. Ŋme baa ga ti i naa bupaali nuu nni? Laa*buli n den luni Ejipiti yaaba i falacianbuoli kuli mi fanpienma nni.

⁹ Tin paagi mani ti pala, Filisiti yaaba, tin koani mani mi jama, ke tin da ti tua Ebilu yaaba yonbi nani ban den tua ti yaa yonbi maama. Tin paagi mani ti pala ki koani mi jama.»

¹⁰ Lanwani Filisiti yaaba den fiini bu toabu. Isalele yaaba den gbali. Yua kuli den sani ki kuni ki ban kua o gbandieli nni. Bi den paadi Isalele yaaba cain hali ke bi minteela siiga taacenda tudapiitaa (30 000) den kpe.

¹¹ Filisiti yaaba den fie U Tienu ŋantaadikpaku ki ku Eli bijaliediba Ofini leni Finea.

Eli kuuma

¹² Laa daali Benjamina buolu jayendo den ñani bu toabu po ki sani ki pundi hali Silo. O pabiidili po o den padi o tiadi ki wuli o yuli po mi tama.

¹³ Eli den kaa li bonkalikaala po ki kuu leni u sanu ki guu kelima o yama den yagini U Tienu ŋantaadikpaku po. O ja yeni n den pundi ki kua u dogu nni ki puni bu toabu po laabaali, u dogu yaaba kuli den buudi.

¹⁴ Eli n den gbadi laa bubula o den yedi: «Ku naa fuugu bua ki yedi be?» Lanyogunu o ja yeni den cua ki puni Eli laabaali.

¹⁵ Li den sua ke Eli kpeligi ki pundi piiyia n bina nii. O nuni den lindi ke waa go nua.

¹⁶ O ja yeni den yedi Eli: «N da li ña bu toabu po nne. Dinle ke n da li ñani lipo ki sani.» Eli den yedi o: «N bijua, be n tieni?»

¹⁷ Yua den cua ki puni laabaali yeni den goa ki yedi o: «Isalele yaaba den gbali Filisiti yaaba ki sani. Bi paadi ti cain. Bi ku baa a bijaliediba Ofini leni Finea. Bi fie U Tienu ŋantaadikpaku mo.»

¹⁸ Wan li taa ku ŋantaadikpaku yeli, Eli n ña o bonkalikaala po ki baa yanyanli o buliñoabu kani. O bunkpanli den mudi ke o kpe, kelima o den podi ki go kpiagi mo. O den gobidi Isalele yaaba hali bina piinaa.

¹⁹ Li den sua ke o biyuaga, Finea pua, punbi ke o maayogunu pundi. Wan den ga laabaali ke bi fie U Tienu ŋantaadikpaku, ke o calo baa leni o calo kuli kpe, u maditugukoanu den cuo o ke o gbaani ki mali lanyogunu.

²⁰ O pua yeni n den bua ki kpe, yaa puoba n den ye leni o den yedi o: «Da jie, a mali bonjaga.» Ama waa den guani liba, waa faami ban yedi yaala mo.

²¹ O den yini ki biga Ikabodi, ki yedi: «Ti kpiagidi ñani Isalele yaaba siiga.» Li den tie kelima bi den fie U Tienu ŋantaadikpaku ke o calo baa leni o calo mo kpe.

²² O den yedi: «Bi fie U Tienu ŋantaadikpaku, lani yaa po ti kpiagidi ñani tinba Isalele yaaba siiga.»