1 Samueli 31 - Gourmanchéma Bible

¹ Filisiti yaaba den tuogi leni Isalele yaaba bu toabu ki paadi ba ke bi den lebidi ki sani. Ban den ku yaaba den baa Giliboa juali po.

² Filisiti yaaba den ŋoadi Sayula leni o bijaba. Bi den ku Jonatan leni Abinadabi leni Malikisua, bani Sayula bijaba yeni.

³ Bu toabu kuli den jigidi ki sedi Sayula yaa kani. A dabantuada den laa o, ke o jie ki digibi hali boncianla bi nintuali.

⁴ Lane Sayula den yedi yua n tugi o toatiadi: «Noadi a jugisiega ki muu ki kpa nni ke a jifola ne n da cua ki muu nni ki yuali nni.» Ama yua n den tugi o toatiadi naa den bua ki kpa o kelima o moko den jie hali boncianla. Lanwani Sayula den noadi o yaa jugisiega ki sieni ga, ki baa kipo.

⁵ Yua n den tugi o toatiadi n den laa ke o kpe, omoko den sieni o yaa jugisiega ki baa kipo ki taani ki kpe leni o.

⁶ Li tie yeni ke Sayula leni o bijataadiba, leni yua n den tugi o toatiadi, leni o toatieba kuli den taani ki bodi yenma laa daali.

⁷ Isalele yaaba, yaaba n den ye ku joaloangu duoli leni yaaba n den ye Judana kpenu yaa duoli n den laa ke Isalele toatieba sani, ke Sayula leni o bijaba mo kpe, bi den fii ki ŋaa bi yaa dogi ki sani ke Filisiti yaaba den gedi ki kua ki kali bi dogi nni.

⁸ Lan den fii ki faa, Filisiti yaaba den cua ki baa fagi yaaba n kpe, bi den laa ke Sayula leni o bijataadiba bili ki kpe Giliboa juali po.

⁹ Bi den jia Sayula yuli, ki landi o toatiadi. Lanwani bi den soani likuli i kaani kuli bani Filisiti yaaba diema nni ki waani laa laabaaliŋamo bi *buli diena nni leni bi diema yaaba kuli siiga.

¹⁰ Lani yaa puoli bi den kuani Sayula toatiadi ban den kpiedi ki sieni o bulo *Asitate nannana yaa dieli nni ki joani Sayula o kpiemo bi dogu Beti-Sani yaa bilinciamu po.

¹¹ Ama Isalele diema nni, yaa Cagili n yi Galaadi yaa dogu Jabesi yaaba n den gbadi Filisiti yaaba n tieni Sayula maama,

¹² bi jakoanda kuli den fii ki taa u sanu. Bi den cuoni ñamungu kuli ki ban joandi Sayula o kpiemo leni o bijaba kpiema Beti-Sani bilinciamu po, ki tugi ki guani Jabesi po. Bi den sia bi gbanandi lankani.

¹³ Bi den taa bi kpaba ki piini a Jabesi, Tamalisa tibu tinga. Lanwani bi den loli bu ñoabu dana lele.