1 Samueli 30 - Gourmanchéma Bible

^1-2 Dafidi leni o toatieba n den pundi Sikilagi li dataali daali, bi den sua ke Amaleki yaaba baa Filisiti yaaba diema ganu po leni Sikilagi kuli. Bi den cuo bi puoba leni yaaba n den ye lienni kuli, a nikpela leni a bila kuli, ki mudi Sikilagi ki sia u. Baa den ku baa niyendo. Bi den cuo bikuli, ki suagi liiga.

³ Dafidi leni o toatieba den pundi u dogu nni ki sua ke u sia, ke bi cuo bi puoba leni bi bonjala leni bi bonpola kuli.

⁴ Lanwani Dafidi leni yaa niba n den ye leni o kuli den buudibuudi hali ke bi fidu kuli den gbeni ke baa go fidi ki buudi.

⁵ Bi den cuo ki gedini Dafidi poliediba Jisileeli yua Akinoami, leni Nabali kpepuoli Abigayili, Kalimeli.

⁶ Dafidi den ye leni li paboancianli kelima o toatieba den yedi ke bi baa lugidi o a tana, kelima bikuli pala den biidi kelima bi bijaba leni bi bisiaba po. Ama Dafidi den goa ki paagi o pali kelima Li Miali Diedo o Tienu po.

⁷ Dafidi den yedi o kopadiciamo Ahimeleki bijua Abiata: «Taa o kopadiciamo liadibiga, *benŋuunu, ki cuani ne.» Abiata den taa u benŋuunu yeni ki cuani Dafidi kani.

⁸ Dafidi den buali Li Miali Diedo ki yedi: «Min ŋoadi li toagoli yeni bi? N baa nandi ba bi?» Li Miali Diedo den goa ki yedi o: «Ŋoadi ba kelima a baa nandi ba ki faabi yi niba.»

⁹ Lanwani Dafidi den taa u sanu, wani leni yaa nikobiluobidi n den ye leni o. Bi den pundi Besola kpenu ke yaaba n den ŋua puoli den sedi lankani.

¹⁰ Dafidi leni jaba kobinaa den suagi liiga ki ŋoadi bi yibalinba, jaba kobilie mo den sedi kelima bi den coagi ki kan fidi ki duodi u kpenu yeni.

¹¹ Bi den laa Ejipiti yua li fuali nni ki cuani o Dafidi kani. Bi den puni o dupen ke o dini ki go puni o mi ñima ke o ñuni.

¹² Bi go den puni o a kankankuoma bonkoncabili leni duven tiidi bonluonkaala joana lie. Li den sua ke waa dini pu, waa ñuni liba hali dana taa leni ñadi taa. Lanwani wan den dini, o den goa ki baa u fidu.

¹³ Dafidi den buali o: «Ŋme die ŋa? A ñani le?» O den goa ki yedi: «N tie Ejipiti yaa jawaalo ki tie Amaleki yua yaa yonbo. Dinla dana taa nne ke n canbaa ŋaa nni kelima n den yia.

¹⁴ Ti den baa Filisiti buolu Keleta yaaba diema ganu po, leni Juda diema nni, leni Kalebi diema ganu po. Ti go den sia Sikilagi dogu.»

¹⁵ Dafidi den yedi o: «A baa tuo ki ciani nni min gedi li toagoli yeni po bi?» O den goa ki yedi: «Ŋan poli U Tienu po ke a kan kpa nni, ke a kan go taa nni ki teni n canbaa mo, lanwani n baa ciani a li toagoli yeni po.»

¹⁶ O den ciani o ke bi pundi. Amaleki yaaba den yadi ki gbie i kaani kuli ki di, ki ñu ki jeli ki ciaga, kelima ban den fie yaa fagiciandi Filisiti yaaba leni Juda yaaba diema nni kuli yaa po.

¹⁷ Dafidi den pua ki kpaani ba ki cili ku tiŋapanpangu ki yaa caa hali saala yaa yenjuogu. Jawaaba kobinaa bebe den jagini ti yuoyuodi ki sani ki ciadi. Yaaba n sieni kuli den kpe.

¹⁸ Dafidi den ga Amaleki yaaba n den fie yaala kuli. O den ga o poliediba moko.

¹⁹ Oba kuli ki den poadi a bila leni a nikpela siiga, bi a bonjala leni a bonpola siiga. Ti fagidi moko yaa siiga liba kuli ki den poadi. Dafidi den guani likuli.

²⁰ Dafidi go den ga ti yanbidi leni a yangbenga kuli. Yaaba n den pigi li yangoli yeni den tua: «Dafidi fagidi nne.»

²¹ Dafidi den pundi yaa nikobiliedi n den coagi kaa fidi ki yegi leni ba, ban den ŋa yaaba Besola kpenu kani yeni. Bi den fii ki tuogi Dafidi leni yaaba n den yegi leni o. Dafidi den nagini ba ki buali ba bi yaa ye leni laafia.

²² Yaa nibiadijagindi n den yegi leni Dafidi den yedi. «Nani ban ki den yegi leni ti yeni, ti kan teni ba liba kuli tin fie yaala yeni siiga, li yaa tie yua kuli n ga o pua leni o bila bebe yaaka. Ban ga bi ciba ki yaa caa.»

²³ Ama Dafidi den yedi: «N kpiiba, da tieni mani yeni leni Li Miali Diedo n puni ti yaala, kelima wani n kubi ti. O den taa yaa toagoli n den baa ti ki teni ti.

²⁴ Ŋme baa tuo yin yedi yaala ne? Yua n gedi bu toabu po leni yua n sedi ti tiadi kani kuli biini baa yaa de. Bi baa taani ki boagidi likuli n yaa de.»

²⁵ Hali laa daali liiga, bi den tiendi yeni. Dafidi den teni ke laa bontienkaala tua *bali maama leni bogidili Isalele yaaba po hali dinla.

²⁶ Dafidi n den guani Sikilagi, o den boagidi o fagidi niinni ki soani ki puni o danlinba Juda nikpela, ki yedi ba: «Diidi ki le min ñani yipo yaa paabu tin fie Li Miali Diedo yibalinba kani yaala yaa niinni.»

²⁷ O den soani yeni Betela yaaba po, leni yaa Lamoti n ye ganu po yaaba po, leni Jatili yaaba po,

²⁸ leni Aloyeli yaaba po, leni Sifimota yaaba po,

²⁹ leni Esitemoa yaaba po, leni Lakali yaaba po, leni Jelaki-Meyeli dogi yaaba po, leni Kena yaa dogi yaaba po,

³⁰ leni Olima yaaba po, leni Kila-Asana yaaba po, leni Ataka yaaba po,

³¹ leni Ebiloni yaaba po leni wani Dafidi leni o niba n den gedi naani kuli yaaba po.