1 Samueli 3 - Gourmanchéma Bible

¹ O jawaalo Samueli den ye Li Miali Diedo tuonli nni Eli kani. Laa yogunu Li Miali Diedo ki den yaba ki maadi leni bi niba, waa den puuni ba li bonlekaala mo ke li yaba.

² Li den sua ke Eli nuni cili ki dingi ke waa go nua bonŋanla. Ñayengu o den dua wan yen maani ki dua naani,

³ ke Samueli mo dua Li Miali Diedo diegu nni, U Tienu*ŋantaadikpaku n den ye naankani. U Tienu diegu fidisanga daa den gbindi.

⁴ Li Miali Diedo den yini Samueli ke o den tuo ki yedi: «Mini nne.»

⁵ O den fii ki sani ki gedi Eli kani ki yedi: «A yini nni, mini nne.» Eli den goa ki yedi o: «Mii yini a, goa ki ban duani.» Lanwani o den goa ki ban duani.

⁶ Li Miali Diedo go den yini Samueli mi liema. Samueli den fii ki gedi Eli kani ki yedi: «A yini nni, mini nne.» Eli den goa ki yedi o: «Mii yini a, n bijua, goa ki ban duani.»

⁷ Samueli daa den bani Li Miali Diedo, Li Miali Diedo mo daa den maadi leni o.

⁸ Li Miali Diedo go den yini Samueli mi taama. Samueli den fii ki gedi Eli kani ki go yedi o: «A yini nni, mini nne.» Eli den bandi ke Li Miali Diedo n yi ki biga.

⁹ Lane o den yedi Samueli: «Gedi ki ban duani. Bi yaa go yini a ŋan yedi: ‹Li Miali Diedo maadi, mini a naacemo cengi.› » Lanwani Samueli den goa ki ban duani o kaanu.

¹⁰ Li Miali Diedo den cua ki sedi o kani ki go yini nani mi kpiama, ki yedi: «Samueli, Samueli.» Samueli den tuo ki yedi: «Maadi, mini a naacemo cengi.»

¹¹ Lanwani Li Miali Diedo den yedi Samueli: «Diidi ki le, n baa tieni Isalele yaaba siiga li bonla yaala n baa womi yaaba n baa gbadi la kuli.

¹² Laa daali n baa tieni min den bili ke n baa tieni Eli leni o diegu yaala kuli. N baa tieni likuli, n kan sieni liba.

¹³ N den kadi ki waani o ke n baa bu ki cuo o diegu yaa yogu n tu yaa yogu kelima o bila tiendi ti cagindi ke o bani ki naa tundi ba.

¹⁴ Li tie lani yaa po ke n poli Eli diegu po ki yedi ke Eli diegu tuonbiaciandi kan baa sugili hali abada, baa a pada bi wan baa pa nni yaa paabu kan teni ban baa sugili.»

¹⁵ Samueli den goa ki duani hali lan faa. Lanwani o den luodi Li Miali Diedo diegu buliñoana. Samueli den jie kaa bua ki togidi Eli wan den laa yaa bonlekaala.

¹⁶ Ama Eli den yini o ki yedi: «N bijua Samueli.» Samueli den goa ki yedi o: «Mini nne.»

¹⁷ Eli den yedi o: «Li Miali Diedo yedi a be? Ŋan da wuoni nni liba kuli. A yaa wuoni nni baa mayenma, U Tienu n yedi a yaala kuli nni, wani U Tienu n cuo ŋa o cuonbiadu.»

¹⁸ Lanwani Samueli den togidi o likuli kaa wuoni baa liba kuli. Eli den yedi: «O tie Li Miali Diedo wan tieni yaala n dagidi opo.»

¹⁹ Samueli den fandi ki pugidi, Li Miali Diedo mo den ye leni o, waa den tuo ke Samueli n maadi opo yaa maama baa mayenma n tua fanma.

²⁰ Isalele diema nni kuli, ki cili Dana dogu ki yaa caa hali Beli-Seba dogu, bi niba kuli den bandi ke Samueli tie Li Miali Diedo sawalipualo.

²¹ Li Miali Diedo den suagi ki doagidi o yuli Silo dogu nni kelima o den doagidi o yuli lankane ki maadi leni Samueli.