1 Samueli 29 - Gourmanchéma Bible

¹ Filisiti yaaba den taani bi toagola kuli Afeka dogu. Isalele yaaba mo den gedi ki kpa bi toanagili yaa ñinbunli n ye Jisileeli dogu nni.

² Filisiti yaaba yudanba den cuoni caga kobigakobiga leni caga tudilitudili. Dafidi leni o niba mo den cuoni bi puoli po, wani leni Akisi.

³ Filisiti yaaba yudanba den yedi: «Ebilu yaaba ne tuuni be?» Akisi den goa ki yedi ba: «Isalele diema bado Sayula badibaanlo Dafidi kaa. O ye leni nni hali ke li waagi. Hali wan cua ne yaa daali ki pundi hali dinla, mii laa o kani tagiliba kuli.»

⁴ Ama Filisiti yaaba yudanba pala den fii Akisi po boncianla ke bi den yedi o: «Guani o ja yeni, wan lebidi ki goa ŋan den puni o ke wan yaa ye naani. Wan da yegi leni ti ki gedi bu toabu po, ke wan da ti tua tipo yibali tin togidi bu toabu yaa yogunu. O baa goa ki baa ki nunmanga o canba kani lede, li yaa tie ke o jendi ti niba yula ki teni o yaaka?

⁵ Baa den yiini laa Dafidi ka ki jeli ki tua: ‹Sayula den ku tudilitudili. Dafidi den ku tudipiigipiiga.› »

⁶ Lani Akisi den yini Dafidi ki yedi o: «Hali Li Miali Diedo po a tie niteginka, li bi baa yaa mani npo min bi le ke a yegi leni nni tin gedi bu toabu ki go ban guani. Mii laa a kani bonbiadiliba kuli hali ŋan cua n kani, ki pundi hali dinla. Ama yaa yudanba n sieni pala naa mani apo.

⁷ Lani yaa po ŋan lebidi ki goa leni laafia, ki da biidi Filisiti yaaba yudanba pala.»

⁸ Dafidi den yedi Akisi: «N tieni be? A laa be mini a naacemo kani hali min cua a kani ki pundi hali dinla, ke n kan gedi ki tuogi leni fini n daano o bado yibalinba bu toabu?»

⁹ Akisi den goa ki yedi Dafidi: «N bani, a doagidi npo nani U Tienu maleki yeni. Ama Filisiti yaaba yudanba yie ki yedi ke a kan yegi leni ti ki gedi bu toabu.

¹⁰ Lani yaa po ŋan yagidi ki fii, fini leni a canbaa naacenba yaaba n yegi leni a ki cua. Yin yagidi ki fii mani. Yi yaa laa ke li yendi yin taa u sanu.»

¹¹ Lane Dafidi leni o toatieba den yagidi ki fii. Lan den yendi bi den taa u sanu ki goa ki gedi Filisiti yaaba diema po. Filisiti yaaba mo den gedi Jisileeli dogu po.