1 Samueli 28 - Gourmanchéma Bible

¹ Laa yogunu Filisiti yaaba den taani bi toagola ki baa tuogi leni Isalele yaaba bu toabu. Akisi den yedi Dafidi: «Ŋan yaa bani ke a baa yegi leni nni bu toabu po, fini leni a toatieba.»

² Dafidi den goa ki yedi Akisi: «Bonŋanla! A baa le mini a naacemo n baa tieni yaala.» Akisi den yedi Dafidi: «N baa teni ŋan yaa guu nni hali n miali banlu kuli.»

³ Li den sua ke Samueli kpe ke Isalele yaaba buudi opo ki piini o Lama dogu nni. Li go den sua ke Sayula ñani yaa ñoagidanba n maadi leni bi tinkpiba leni bi baabuuba kuli mi diema nni.

⁴ Filisiti yaaba den taani ki cua ki kpaa bi toanagili Sunemi dogu nni. Sayula den taani Isalele yaaba kuli ke bimo den kpaa bi yaa toanagili Giliboa juali kani.

⁵ Sayula n den laa Filisiti yaaba yaa toanagili, o den jie, ke o tugusoama sani boncianla.

⁶ O den mia Li Miali Diedo. Waa den guani liba ti dangidi nni, bi *Ulima bi bi sawalipuaba kani.

⁷ Lani Sayula den yedi o badibaanba: «Yin lingi npo mani yaa pua n tie ñoagidaano ki maadi leni bi tinkpiba, n baa gedi ki le o.» O badibaanba den yedi o: «Yaa pua n maadi leni bi tinkpiba ye Eni-Doli.»

⁸ Lanwani Sayula den lebidi ki lani tiatoadi ke ban da bandi o. O den fii leni jaba lie ki gedi. Bi den pundi o pua yeni deni ku ñiagu. Sayula den yedi o: «Buali npo tinkpiyendo ki waani nni yaala n baa ti tieni. Ŋan yini min baa waani a yua, wan cua ne.»

⁹ O pua den goa ki yedi o: «A bani Sayula n den tieni yaala. A bani ke o den deli yaa ñoagidanba n maadi leni bi tinkpiba leni bi baabuuba, ki ñani ba mi diema nni. Be yaa po ke a dia nni ku diagu ki baa teni ban kpa nni?»

¹⁰ Sayula den poli ki yedi: «Hali Li Miali Diedo po, bi kan tieni a yaala n bia kuli kelima lani yaa po.»

¹¹ Lanwani o pua den yedi o: «A bua min yini apo ŋme?» O den goa ki yedi o: «Yini npo Samueli.»

¹² O pua n den laa Samueli, o den kuudi, ki tiani ki yedi Sayula: «Be yaa po ke a boandi nni. A tie Sayula.»

¹³ O bado den yedi o: «Da jie liba, a laa be?» O pua den yedi o: «N laa niyinyinguba ke ku ñani ki tinga nni.»

¹⁴ Sayula den yedi o: «O tie lede?» O den yedi: «Jakpelo n ñani ki cua, ki goli bu kpalibu.» Sayula den bandi ke li tie Samueli, ki labini tiipo ki kpiagi o.

¹⁵ Samueli den yedi Sayula: «Be yaa po ke a yagi n yama ki teni ke n ñani?» Sayula den goa ki yedi o: «N ye yanyagiciandi nne. Filisiti yaaba togidi leni nni bu toabu, U Tienu mo lebidi ki ŋa nni, waa guani nni liba o sawalipuaba kani bi ti dangidi nni. Lani yaa po yo ke n yini a, ŋan waani nni min baa tieni yaala.»

¹⁶ Samueli den yedi: «Li Miali Diedo yaa ŋa ŋa ke a tua o yibali, be yaa po ke a go buali nni?

¹⁷ Li Miali Diedo tieni a nani wan den teni ke n soagini a maama. Li Miali Diedo ga a kani mi diema bali ki teni nitoa, Dafidi.

¹⁸ Li tie kelima ŋaa tuo ki ŋua Li Miali Diedo n den yedi a yaala ki tu Amaleki yaaba o pabienli panpaani. Lani yaa po ke Li Miali Diedo tieni a line dinla.

¹⁹ Yaala n cie lani, Li Miali Diedo baa taa Isalele yaaba leni fini kuli ki teni Filisiti yaaba. Saala fini leni a bijaba baa yaa ye leni nni. Li Miali Diedo baa taa Isalele toatieba moko ki teni Filisiti yaaba.»

²⁰ Lanyogunu Sayula den baa ki tandi kelima Samueli maama den gbieni o i jeje. Waa go den pia fidu moko kelima waa den dini jiemaba kuli laa daali yaa yensiinu leni li ñiagu kuli.

²¹ O pua yeni den nagini Sayula kani. Wan den laa ke li wudi wani Sayula gbanu, o den yedi o: «Mini a yonbo bi cengi a yedima. N bi luni n miali ki tieni ŋan bi yedi nni yaala kuli.

²² Moala amo n di cengi mini a yonbo yedima. Cedi min pa ŋa dupen waamu ŋan je ki baa u fidu ki taa u sanu.»

²³ Ama o den yie ke o kan je. Ama o badibaanba leni o pua yeni den tigini o hali ke o den tuo bi maama. O den fii tiipo ki kali u duanu po.

²⁴ O pua yeni den pia ki naabiwubidiga, o den jaligi ki kodi ga ki taa mi yoma ki buuni ki pua yaa dupen n ki pia*dabinli.

²⁵ O den sieni likuli Sayula leni o badibaanba nintuali ke bi dini. Lani yaa puoli bi den fii ku ñiagu yeni ki gedi.