1 Samueli 27 - Gourmanchéma Bible

¹ Dafidi den yedi o yama nni: «Dayenli Sayula baa bolini nni. Yaala n ŋani npo ki cie kuli tie min gedi ki ban wuoni Filisiti yaaba diema nni. Yeni Sayula baa cedi, o kan go lingi nni Isalele yaaba diema nni, yeni n baa ŋmadi o nuu nni.»

² Dafidi den fii leni jaba kobiluoba yaaba n den ye leni o yeni, ki gedi Mayoki bijua Akisi kani, yua n den tie Gati bado.

³ Dafidi leni yaaba n den yegi leni o yeni den ye Akisi kani Gati dogu nni. Yua kuli den ye leni o niba. Dafidi den ye leni o poliediba, Jisileeli yua Akinoami, leni Nabali kpepuoli Abigayili, Kalimeli yua.

⁴ Sayula n den gbadi ke Dafidi sani ki gedi Gati, o den cedi ki naa go lingi o.

⁵ Dafidi den yedi Akisi: «A pali yaa mani leni nni, ŋan pa nni mi diema nni tinkundoguba min baa yaa ye naani, kelima li baa ga lede mini a naacemo n yaa taa ki ye leni a u badidogu nni.»

⁶ Landaali liga Akisi den puni o Sikilagi dogu. Li tie lani yaa po ke Sikilagi tie Juda badicianba dogu hali dinla.

⁷ Dafidi n den ye Filisiti yaaba diema nni yaa bianu den tie binyenli leni ŋmaali naa.

⁸ Dafidi leni o toatieba den caa Gesuli yaaba leni Gisili yaaba leni Amaleki yaaba po ki baali ba bu toabu. Hali yogu laa niba den ye laa fuuli ki goa Suli dogu po, ki caa hali Ejipiti tinbianu.

⁹ Dafidi den fenli laa fuuli kuli. Waa den ŋa jua bi pua leni miali, o den taani i pe leni i ne, leni i ŋunbi, leni ti yuoyuodi, leni ti tiadi, ki goa ki lebidi ki kuni Akisi po.

¹⁰ Akisi yaa den buali o: «A gedi ki ban tieni bu toabu le dinla?» Mi tianma Dafidi baa goa ki yedi o: «Juda diema ganu po», mi tianma «Jelaki-Meyeli yaaba ganu po», mi tianma mo: «Kena yaaba ganu po.»

¹¹ Dafidi ki den ŋaani ja yaaka pua leni miali ki cuani ba Gati, kelima o den tia o pali nni: «Bi baa fidi ki tuali tipo ki yedi: ‹Dafidi tieni line leni line.› » O den tiendi yeni wan den ye Filisiti yaaba diema nni yaa bianu kuli.

¹² Akisi den dugi Dafidi po ki tua: «O fiini o niba Isalele yaaba pala ki teni ke bi nandi o, lani yaa po o baa yaa tie n naacemo yogunu kuli.»