1 Samueli 26 - Gourmanchéma Bible

¹ Sifi dogu yaaba den cua Sayula kani Gibeya po ki yedi: «Ŋaa bani ke Dafidi wuo Akila dogu juali yaali n ye mi fanpienma nintuali po?»

² Lanwani Sayula den fii ki gedi Sifi fanpienma po leni Isalele toatieba siiga jakoanda tudataa (3 000) ki baa lingi Dafidi likani.

³ Sayula den kpaa o toanagili Akila juali po, yaali n ye u sankunu, mi fanpienma nintuali. Dafidi den ye mi fanpienma nni. Wan den sua ke Sayula cua mi fanpienma nni ki lingi o,

⁴ o den soani bi niba ke bi ban bandi cain ŋasiili nni ke Sayula cua, ki goa ki waani o.

⁵ Lanwani Dafidi den fii ki cua Sayula n den kpa o toanagili naani, ki laa Sayula n dua naani wani leni o toatieba yudaano Neli bijua Abineli. Sayula den dua li toanagili siiga, bi toatieba kuli mo yen duani ki lindi o.

⁶ Dafidi den yedi Heta yua Ahimeleki leni Seliya bijua Joabi waalo Abisayi: «Ŋme baa yegi leni nni tin gedi Sayula toanagili po?» Abisayi den goa ki yedi: «N baa yegi leni a.»

⁷ Lanwani Dafidi leni Abisayi den gedi Sayula toagoli po ku ñiagu. Sayula den dua ki goa li toanagili siiga ke o kpaanli caa o yuli kani. Abineli leni bi toatieba kuli den dua ki lindi o.

⁸ Abisayi den yedi Dafidi: «U Tienu taa a yibali ki teni a nuu nni dinla. N mia ŋa, ŋan cedi min muu o li kpaanli ki lundi o ki caani tiipo. Yenma bebe baa dagidi, n kan pugini liema.»

⁹ Ama Dafidi den yedi Abisayi: «Da kpa o, kelima ŋme baa fidi ki tandi o nuu ki pua Li Miali Diedo n gandi yua, ke wani U Tienu kan cuo o?»

¹⁰ Dafidi go den yedi: «Hali Li Miali Diedo po, wani Li Miali Diedo n baa kpa o, o daali yaa pundi, yaaka o yaa gedi toabu.

¹¹ Li Miali Diedo n luoni npo min tandi n nuu ki sii Li Miali Diedo n gandi yua. Ama ŋan taa o kpaanli yaali n caa o yuli kani, leni o ñinbagili tin gedi.»

¹² Lanwani Dafidi den taa Sayula yuli kani li kpaanli leni li ñinbagili ke bi ban caa. Oba kuli naa den laa ba, oba ki den bandi mo. Oba kuli ki den fundi kelima Li Miali Diedo den teni ke bi guani laa goacianma.

¹³ Dafidi den gedi nepo yaa joakunu, ki sedi li juali yuli po naani n foagi leni Sayula toanagili hali boncianla.

¹⁴ O den tiani ki maadi leni bi toatieba leni Neli bijua Abineli, ki yedi o: «Abineli, a kan tuo yo?» Abineli den goa ki yedi o: «A tie ŋme ki tangi o bado po nande?»

¹⁵ Dafidi den yedi Abineli: «Ŋaa tie ja kaa? Ŋme ye ki de leni a Isalele yaaba siiga? Lanwani be n teni ke ŋaa guudi a daano o bado? Kelima o nilo bi cua yikani ki baa kpa a daano o bado.

¹⁶ Ŋan tieni yaala yeni, laa ŋani. Hali Li Miali Diedo po, li pundi yin kpe kelima yii guudi yi daano, Li Miali Diedo n gandi yua. Diidi ki le o bado kpaanli leni o ñinbagili yaali n bi ye o yuli kani n ye naani.»

¹⁷ Sayula den bandi Dafidi nialu ki yedi: «A yaa nialu liga yoo, n bijua Dafidi?» Dafidi den goa ki yedi: «N yaa nialu lige n daano o bado.»

¹⁸ Dafidi go den yedi: «Be n teni ke fini n daano ñani ki ŋua ki deli min a naacemo? N tieni be? N pia bee yaa tagili?

¹⁹ Fini n daano o bado n tuo ki cengi mini a naacemo maama. Li yaa tie ke Li Miali Diedo n fiindi a pali ke ŋan yaa ŋua ki deli nni, wan ga li padili ki jiini o pali. Ama li yaa tie nibe, Li Miali Diedo n soli ba, kelima dinla bi deli nni ke min da go pia kaanu Li Miali Diedo n puni o niba yaa diema nni ke li nani bi yedi nni: ‹Gedi ki ban yaa ŋua i*buli!›

²⁰ N soama n da wuli yaa kaanu n foagi ki piadi leni Li Miali Diedo yekaanu. Fini Isalele yaaba bado ñani ki ŋua ki lingi mini ku ŋmanŋmangu nani ban ŋua ki deli ki ñuñuuga a juana nni maama yeni.»

²¹ Lanwani Sayula den yedi: «N tudi, goa ki cua ne, n bijua Dafidi. N kan go tieni a yaala n bia, kelima dinla a noanli ke n miali tie bonmoanla. N tieni nani o yanpiidaano n tiendi maama. N tudi boncianla.»

²² Dafidi den goa ki yedi: «Diidi ki le, fini o bado kpaanli nne, a niba nni yendo n cua ki ga li!

²³ Li Miali Diedo baa guani yua kuli nani o *teginma leni o moamoani n da maama. Li Miali Diedo bi taa ŋa ki teni n nuu nni dinla, ama mii bi tuo ki tandi n nuu ki sii Li Miali Diedo n gagidi ki dini yua li bali.

²⁴ Nani a miali n bi tie npo bonmoanla maama dinla, nmoko yaa miali n yaa tie bonmoanla yeni Li Miali Diedo po, wan ga nni falabiado kuli nni.»

²⁵ Sayula den yedi Dafidi: «N bijua Dafidi, U Tienu n seligi a. A bontienkaala kuli baa yaa ŋani apo.» Li yaa puoli Dafidi den ban caa, Sayula mo den lebidi ki kuni o denpo.