1 Samueli 25 - Gourmanchéma Bible

¹ Samueli den kpe. Isalele yaaba kuli den buudi opo. Bi den piini o o diegu nni Lama. Lani yaa puoli Dafidi den fii ki gedi Padana fanpienma nni.

² O ja den ye Mayona dogu nni ki tie piadiciamo. O ŋalimani den ye Kalimeli. O den pia pe tudataa (3 000) leni ŋuabi tudili. Laa yogunu o den ye Kalimeli ki moagidi o pe kobidi.

³ O den yi Nabali, o pua mo Abigayili. O pua yeni den pia mi yanfuoma, o nunga mo den ŋani, ama o ja wani den pa, o tagu den bia. O den tie Kalebi buolu yua.

⁴ Dafidi den ye mi fanpienma nni ki ga laabaali ke Nabali moagidi o pe kobidi.

⁵ Lani o den soani o kani jawaaba piiga ki yedi ba: «Yin gedi mani Kalimeli, Nabali po ki ban fuondi o npo,

⁶ ki yedi o: ‹Ŋan yaa ye leni laafia, a deni yaaba mo n yaa ye leni laafia, a piama kuli n yaa ye leni laafia.

⁷ Dafidi gbadi ke yaaba n moagidi i pe kobidi ye a kani. To, a yankpaaba den ye leni ti, tii den tieni ba biadimaba kuli. Liba kuli naa den bodi ba ban den ye Kalimeli fanpienma nni yaa yogunu kuli.

⁸ Ŋan buali a yankpaaba, bi baa waani a. Lanwani Dafidi yedi ke ŋan ŋanbi tipo, kelima ti cua a kani li pamanli daali. Ŋan pa ti, tinba a naacenba leni a bijua Dafidi, ŋan pia yaala.› »

⁹ Dafidi jawaaba n den pundi Nabali kani, bi den caa o Dafidi tondu. Ban den maadi ki gbeni, bi den suoni ki se ki guu.

¹⁰ Nabali den goa ki yedi: «Ŋme tie Dafidi? Ŋme tie*Isayi bijua? Moala yaa naacenba n tiini ki ŋaani bi canbaanba yaba.

¹¹ Naani n baa taa n dupen, leni n ñima leni min kodi yaa yandi yaaba n moagidi n pe po ki pa yaa niba ke mii bani ban ñani naani bi?»

¹² Dafidi jawaaba den goa ki taa u sanu ki ban pundi ki togidi o laa maama kuli.

¹³ Lani Dafidi den yedi o niba: «Yua kuli n yie o jugisiega.» Bikuli den yie bi jugisiemu. Dafidi mo den yie o yaaga. Yaaba n den fii ki ŋua Dafidi ki caa den bua ki pundi jaba kobinaa, ke jaba kobilie mo den sedi ki guu ti tiadi.

Abigayili todi Dafidi

¹⁴ Nabali naacenba siiga yendo den cua ki waani Nabali pua Abigayili ki yedi: «Diidi ki le, Dafidi soani a tonda ke bi ñani mi fanpienma po ki cua ki baa fuondi ti canbaa, ke o funi leni ba.

¹⁵ Ama bi niba yeni den ŋanbi tipo boncianla. Baa den tieni ti bonbiadiliba kuli. Liba kuli naa den bodi tikani tin den ye leni ba i kuani nni yaa yogunu.

¹⁶ Bi den tie tipo nani u bilinu u yensiinu leni ku ñiagu kuli tin den kpaa ti pe ki ye leni ba yaa yogunu kuli.

¹⁷ Moala ŋan kpaagi ki le ŋan baa tieni yaala, kelima laa pia kuli tama, ti canbaa leni o diegu kuli baa bodi. Omo yaa tagu bia hali ke ti kan tuo ki maadi leni o.»

¹⁸ Lane Abigayili den jaligi ki taa dupen kobilie leni duven dayuadi lie leni ban den ŋanbi yaa pe bonba muu, leni i disagidi yiemu muu, leni duven tiidi bonluonkaala bonfiidi kobiga, leni a kankankuoma bonkona kobilie. O den tuni likuli i ŋunbi

¹⁹ ki yedi o naacenba: «Yin kua mani n liiga, n baa yaa ŋua yi.» Waa den yedi o calo Nabali liba.

²⁰ Wan den jagini o ŋunbo ki jiidi li juali po ki tagi u sanwuonko, Dafidi leni o niba mo den jiidi ki tiegi o ke o den tuogi ba.

²¹ Li den sua ke Dafidi den yedi: «Min den guu o ja yeni piama kuli mi fanpienma nni ke liba kuli ki bodi yeni, li den tie fanma, o jiini nni mi ŋanwaama.

²² N yaa cedi Nabali diegu nni baa jayendo ke o fo ki pundi hali mi fiifaama, U Tienu n cuo mini o naacemo Dafidi o cuonbiadu.»

²³ Abigayili n den laa Dafidi yaa yogunu, o den jiidi o ŋunbo po tontoni ki labini Dafidi nintuali ki pugi o.

²⁴ O den laabi o taana kani ki yedi: «N daano, i tagili yeni n yaa ye n yaa yuli po. Ama n mia ŋa ŋan pa mini a yonbo n maadi. N mia ŋa ŋan cengi n maama.

²⁵ Fini n daano n cedi Nabali, wani o nibiado yeni maama, kelima o tie nani wan yi maama, o yi Nabali. Waa pia yama. Mini a yonbo mo, mii den laa fini n daano n den soani yaa jawaaba.

²⁶ Moala, n poli hali Li Miali Diedo leni hali fini yaa po kuli ke Li Miali Diedo n yie apo ki cuo a nuu ke ŋan da wuli mi soama. A yibalinba leni yaaba n bua ki tieni fini n daano yaala n bia kuli ban tua nani Nabali yeni.

²⁷ Moala ŋan tuo mini a yualo n cuani apo yaa paabu na, ki boagidi yaa jawaaba n ŋua fini n daano.

²⁸ N mia ŋa ŋan tieni sugili mini a yualo tagili po. Li Miali Diedo baa ti bili fini n daano buolu wun yaa ye kelima a kubi Li Miali Diedo toabu, bi kan le a kani bonbiadiliba kuli mo hali a miali banlu.

²⁹ O nilo yaa fii ki baa deli a ki bua ki ñani a miali, Li Miali Diedo a Tienu baa ga ŋa ki kubi a miali wani oba kani. Ama o baa taa a yibalinba miana ki lu nani ban lugidi ku tanbuncaangu maama.

³⁰ Li Miali Diedo yaa ti tieni wan maadi apo yaa bonŋanla kuli, ki dini a li bali ke a tua Isalele yaaba bado,

³¹ pabiidili leni yanyagidi n da ti yaa ye leni a kelima a wuli mi soama fanma fanma, ki tu a yibali o biadima panpaani fini aba. Li Miali Diedo yaa ti tieni fini n daano yaala n ŋani kuli, ŋan tiadi mini a yualo po.»

³² Dafidi den yedi Abigayili: «N jaandi ki pagi Li Miali Diedo Isalele yaaba Tienu, wani yua soani a ke a tuogi nni dinla.

³³ N tuondi a leni a yanfuoma, fini yua n yie npo ki go cuo n nuu dinla ke min da wuli mi soama ki tuu mi biadima panpaani mini nba.

³⁴ Hali Li Miali Diedo yua n fo ki tie Isalele yaaba Tienu po, hali wani yua n yie ke mii tieni a yaala n bia po, a yaa bi jaligi ki cua ki tuogi nni, Nabali niba siiga baa jayendo kan bi sieni ne leni mi faama.»

³⁵ Lanwani Dafidi den ga Abigayili kani wan den cuani o po yaa paabu, ki yedi o: «Goa ki kuni a denpo leni mi yanduanma. A gbadi? N gbadi ŋan yedi yaala, n tuo a miabu.»

Nabali kpe ke Dafidi taa Abigayili

³⁶ Abigayili den pundi Nabali kani ki sua ke o tiendi o diegu nni mi jaanjiema nani o bado yaama yeni. O pali den mani ke mi daama mo kubi o. Lani Abigayili ki den maadi o liba hali lan ban faa.

³⁷ Ama lan den faa ke Nabali daama kagidi opo, o pua den waani o yaala n den tieni kuli. O pali den pua hali ke o kuodi nani li tanli.

³⁸ Lan den pundi nani dana piiga yeni, Li Miali Diedo den pua o ke o kpe.

³⁹ Dafidi n den gbadi ke Nabali kpe, o den yedi: «N jaandi ki pagi Li Miali Diedo yua n den koani npo Nabali n den fali nni, ki go yie ke mini o naacemo n da tieni yaala n bia mo. Li Miali Diedo teni ke Nabali biadima goa ki baa o yuli po.» Li yaa puoli Dafidi den soani ke bi waani Abigayili ke o bua wan tua o pua.

⁴⁰ Dafidi naacemo den gedi Abigayili kani Kalimeli po ki yedi o: «Dafidi soani ti ke tin taa ŋa ŋan tua o pua.»

⁴¹ Abigayili den fii ki labini tiipo ki yedi: «Diidi, n baa tua n daano naacemo ki yaa ŋuudi o naacenba taana.»

⁴² Lanyogunu Abigayili den jaligi ki fii ki jagini o ŋunbo. Jafanba muu den yegi leni o ke bi ŋoadi Dafidi tonda ke wani Abigayili ban tua o pua.

⁴³ Dafidi den taa Akinoami, Jisileeli dogu yua moko. Wani Akinoami leni Abigayili kuli den tua o puoba.

⁴⁴ Sayula den taa o bisalo Mikali, Dafidi pua, ki teni Galimi dogu yaa yua Layisi bijua, Paliti.