1 Samueli 24 - Gourmanchéma Bible

¹ Dafidi den fii lankani ki doni ki gedi yaa kaanpaalu n ŋani ki ye Eni-Gedi dogu ki ye lankani.

² Sayula n den cedi ki naa go deli Filisiti yaaba ki lebidi ki kuni, bi den cua ki waani o ke Dafidi ye Eni-Gedi dogu yaa fanpienma nni.

³ Lani, Sayula den gandi Isalele toatieba kuli siiga jakoanda tudataa (3 000), yaaba n cie bi lieba, ki gedi ki lingi Dafidi leni o niba hali i jaŋuabi n ye yaa tanciama kani.

⁴ O den pundi yaa yandiena n kuu u sanu kani. Likani den pia ku tanlongu ke o den jadi likani ki ñanmuaga. Li den sua ke Dafidi leni o niba wuo laa tanlongu nni.

⁵ Dafidi niba den yedi o: «Dinla n tie Li Miali Diedo n yedi a yaa daali: ‹N taa a yibali ki teni a nuu nni, ŋan tieni o nani lan dagidi apo maama.› » Lani Dafidi den fii dindini ki jia Sayula kpalibu tiipo.

⁶ Lanyogunu o tugusoama den sani kelima o jia Sayula kpalibu tiipo.

⁷ O den yedi o niba: «Li Miali Diedo n luoni npo min tandi n nuu ki sii n daano, kelima o tie Li Miali Diedo n gandi yua.»

⁸ Dafidi den maadi yeni ki yie o niba po ke baa bibi Sayula. Lani yaa puoli Sayula den fii ki ñani ku tanlongu nni ki ban caa.

⁹ Lanwani Dafidi mo den fii ki ñani ku tanlongu nni ki tiani ki yini Sayula ki yedi: «O bado, n daano!» Sayula den gbegi ki diidi o puoli po ke Dafidi labini ki pugi o.

¹⁰ O den yedi Sayula: «Be n teni ke a cengi yaa niba n tua ke mini Dafidi moandi ki bua a fala?

¹¹ Dinla a laa leni a nunceli ke Li Miali Diedo bi taa ŋa ki teni n nuu nni ku tanlongu nni. Bi bi tigini nni ke min kpa ŋa, ama n bi cedi ŋa ki yedi ke n kan tandi n nuu ki sii fini n daano, kelima Li Miali Diedo gandi a.

¹² Diidi ki le, n baa, diidi a kpalibu bonjenga n nuu nni. N bi jia ŋan le ki bandi ke n bontienkaala nni kuli mii kubi apo biadima, mii yie a bali mo, mii pia apo tagiliba kuli. Ama fini a dia nni ti diadi ki bua ki kpa nni.

¹³ Li Miali Diedo baa jia ti buudi mini leni fini siiga ki guani a a biadima panpaani, ama mini, n kan sii ŋa.

¹⁴ Mi kpanjakpelima yedi: ‹Mi biadima ña o nibiado kani.› Lane ke n kan sii ŋa.

¹⁵ Fini Isalele yaaba bado, a ñani ki baa tuogi leni ŋme bu toabu? A ŋua ŋme? Mini o sangbankpiemo, mini li canfundili.

¹⁶ Li Miali Diedo baa jia ti buudi mini leni fini siiga. O baa diidi ki buu ki faabi nni, ki saa npo i moamoani ki ga nni a nuu nni.»

¹⁷ Dafidi n den maadi Sayula laa maama ki gbeni, Sayula den yedi: «A yaa nialu liga yoo, n bijua Dafidi?» Lanwani Sayula den buudi

¹⁸ ki yedi Dafidi: «A tiegi ki cie nni, kelima n tieni a yaala n bia, ke amo guani nni yaala n ŋani.

¹⁹ Dinla a doagidi ŋan mani leni nni maama, kelima Li Miali Diedo bi taa nni ki teni a nuu nni, ama ŋaa kpa nni.

²⁰ O nilo yaa ludi o yibali, naani o baa cedi o wan yaa caa leni laafia bi? Li Miali Diedo n guani a ŋan tieni npo yaa*ŋanbili dinla na yaa panpaani.

²¹ Moala n bandi cain ke a baa je li bali, Isalele diema bali baa kua a nuu nni ki yaa ye ki pa.

²² Lanwani ŋan taa Li Miali Diedo yeli ki poli ki yedi ke a kan bolini n buolu n puoli, ki yedi ke a kan bolini n yeli n baadiegu nni mo.»

²³ Dafidi den poli nani Sayula n mia maama. Lanwani Sayula den kuni o denpo, Dafidi leni o niba den gedi yaa kaanpaalu n ŋani.