1 Samueli 23 - Gourmanchéma Bible

¹ Bi den cua ki yedi Dafidi: «Diidi ki le, Filisiti yaaba baa Keyila ki fenli ti kpaandi bi jali nni.»

² Dafidi den buali Li Miali Diedo: «Min gedi ki baa Filisiti yaaba yeni bi?» Li Miali Diedo den goa ki yedi o: «Gedi ki baa ba ki ga Keyila yaaba.»

³ Ama Dafidi niba den yedi o: «Diidi ki le, baa nekanba Juda nni ti ye leni i jeje. Li baa yaa tie lede ti yaa di gedi Keyila ki baa tuogi leni Filisiti yaaba toagoli mo?»

⁴ Lani Dafidi go den buali Li Miali Diedo. Li Miali Diedo den goa ki yedi o: «Ŋan fii ki gedi Keyila kelima n baa taa Filisiti yaaba ki teni a.»

⁵ Lane Dafidi leni o niba den fii ki gedi Keyila dogu ki tuogi leni Filisiti yaaba bu toabu. Dafidi den paadi ba cain, ki fagi bi yandi. Yeni Dafidi den faabi Keyila yaaba.

⁶ Li den sua ke Ahimeleki bijua Abiata n den sani ki gedi Dafidi kani Keyila po yeni, o den kubi ki kopadician-liadibiga yaaga n tie *benŋuunu yeni.

⁷ Bi den waani Sayula ke Dafidi cua Keyila. O den yedi: «U Tienu taa o ki teni nni, kelima o cua ki luoni o yuli yaa dogu n pia a buliñoana leni ti bonluoditi nni.»

⁸ Lanwani Sayula den yini bi niba kuli bu toabu po ke ban gedi Keyila ki lindi ki cebini Dafidi leni o niba.

⁹ Dafidi n den bandi Sayula n jagi opo yaa jagibiadili, o den teni ke o kopadiciamo Abiata cuani u benŋuunu yeni,

¹⁰ ke o yedi: «Li Miali Diedo, fini Isalele yaaba Tienu, mini a naacemo gbadi ke Sayula bua ki cua Keyila ki bolini u kelima mini yaa po.

¹¹ Keyila yaaba baa taa nni ki teni o bi? Sayula baa cua nani min gbadi maama bi? Li Miali Diedo, Isalele Tienu, n mia ŋa, ŋan doagidi ki waani mini a naacemo.» Li Miali Diedo den goa ki yedi o: «O baa cua.»

¹² Lanwani Dafidi go den yedi: «Keyila yaaba baa taa mini leni n niba ki teni Sayula bi?» Li Miali Diedo den goa ki yedi: «Bi baa taa ŋa ki teni o.»

¹³ Lane Dafidi den fii leni o niba yaaba n den pundi nani niba kobiluoba, ki ñani Keyila ki gedi ban den baa fidi ki gedi naankani. Sayula n den gbadi ke Dafidi ñani Keyila ki sani, o den kpadi o sancenli.

¹⁴ Dafidi den ye mi fanpienma nni, yaa wuonkaani n ŋani niinni. O den waagi ki ye a juana kani, Sifa dogu yaa fanpienma nni. Sayula den lingi o yogu kuli, ama U Tienu naa den tuo ke o baa o nuu nni.

U Tienu go faabi Dafidi Sayula nuu nni

¹⁵ Dafidi n den laa ke Sayula kpendi ki bua ki kpa o, o den sedi Sifa fuali nni.

¹⁶ Laa yogunu Sayula bijua Jonatan den fii ki gedi Dafidi po li fuali nni. O den paagi Dafidi pali ki yedi ke wan suagi liiga ki yaa dugi U Tienu po,

¹⁷ ki yedi o: «Da jie liba kelima n baa Sayula nuu kan pundi a. A baa tua Isalele yaaba bado, nmo baa tua a duogili. N baa Sayula wani oba bani lipo bonŋanla.»

¹⁸ Bani bonba lie go den loli ku danligu leni biyaba Li Miali Diedo nintuali. Dafidi go den ye ku tuugu nni, Jonatan mo den goa ki kuni o denpo.

¹⁹ Lani yaa puoli Sifa yaaba den gedi Sayula kani Gibeya dogu po ki yedi o: «Ŋaa bani ke Dafidi wuo ti siiga yaa wuonkaanu n pa niinni? O ye yaa fuali n ye Akila juali po, mi fanpienma ganu po.

²⁰ Lanwani, o bado, a yaa sua ke a bua, ŋan cua ne. Ti baa moandi ki cuo o ki teni a.»

²¹ Sayula den yedi: «Li Miali Diedo n seligi yi kelima yi gbadi npo mi niñima.

²² Gedi mani ki go yaa buali ki pugidi, ki bandi bonŋanla wan tagini ki gedi naani, leni yua n laa o likani, kelima bi waani nni ke o fani boncianla.

²³ Yin lingi mani ki bandi bonŋanla wan wuondi naankani kuli. Yi yaa bandi cain, yin guani ne, lanwani n baa yegi leni yi. O yaa ye mi diema nni kuli n baa lingi o Juda niba kuli siiga.»

²⁴ Lanwani bi den fii ki kpa kua Sayula liiga ki kuni Sifa. Li den sua ke Dafidi leni o niba ye Mayona dogu yaa fuali nni, yaa tialiciamu n ye mi fanpienma ganu po.

²⁵ Sayula den fii leni o niba ki gedi ki baan lingi Dafidi. Bi den waani Dafidi laa bonla. Lani o den jiidi ku tanciangu po ki kua Mayona yaa fuali nni. Sayula n den gbadi lani, o den ŋua Dafidi Mayona fuali nni.

²⁶ Sayula den cuoni li juali yeni kunyendu ke Dafidi leni o niba cuoni u naa kunu. Dafidi den tiini tontoni ki bua ki ciadi Sayula nuu nni. Sayula leni o niba n den lindi ki cebini Dafidi leni o niba ki bua ki cuo ba yaa yogunu,

²⁷ o tondo den cua Sayula kani ki yedi o: «Lebidi tontoni ki guani ne kelima Filisiti yaaba baa ti dogu.»

²⁸ Lane Sayula den cedi Dafidi ŋoadima ki lebidi ki kuni ki baan tuogi leni Filisiti yaaba bu toabu. Li tie lani yaa po ke bi yini laa kaanu Sela-Amalekota.