1 Samueli 22 - Gourmanchéma Bible

¹ Dafidi den ñani likani ki sani ki ban wuoni Adulama dogu yaa tanlongu nni. O kpeliba leni o baadiegu yaaba kuli den gbadi ki ŋoadi o lipo.

² Yaaba n den ye leni fala leni yaaba n den pia pana leni yaaba n den ye leni li pabiidili kuli den fii ki gedi Dafidi kani. O den tua bi yudaano. Yaaba n den taani ki ye leni o yeni den bua ki pundi jaba kobinaa.

³ Dafidi den fii lankani ki gedi Moabi diema nni Mitisipa dogu. O den yedi Moabi bado: «N mia ŋa ŋan cedi n baa leni n naa n cua ki yaa ye a kani hali min bandi U Tienu n baa tieni npo yaala.»

⁴ O den gedini ba Moabi bado kani ke bi den ye lankani wani Dafidi n den ye u kaanpaalu nni yaa yogunu kuli.

⁵ Dayenli o sawalipualo Gada den yedi Dafidi: «Da go wuo ne, goa ki kua Juda diema nni.» Lani Dafidi den ñani likani ki gedi ki ban kua yi Eleti fuali niinni.

Sayula ku yaa kopadicianba n den ye Nobi

⁶ Sayula den gbadi ke bi pia Dafidi leni o niba laabaali. Wani Sayula den kaa Gibeya dogu, tamalisa tibu soangu nni li juali po. O den kubi o kpaanli ke o naacenba kuli ye o kani ki lindi o.

⁷ Sayula den yedi o naacenba yeni: «Yinba Benjamina yaaba, yin cengi mani. Naani *Isayi bijua baa pa yikuli i kuani leni yaa tiidi n luoni yaa bonluonkaala n tiendi duven bi? Naani o baa teni yikuli n tua toatieba tudili yudanba leni toatieba kobiga yudanba bi?

⁸ Li yaa tie yeni, be yaa po ke yikuli taani ki bogini ki sedi npo ki bua ki janbi nni? Li ga lede ke yi siiga oba kuli naa waani nni ke n bijua leni Isayi yaa bijua bili mi buama *ŋantaado bi siiga? Be yaa po ke yi siiga oba kuli ki gbadi npo niñima ki waani nni ke n bijua tigini n naacemo ke o sedi npo ki dia nni ti diadi ki bua ki cuo nni nani wan ko tiendi maama dinla ne?»

⁹ Lanwani Edomi diema yua Doyega, yua n den ye Sayula naacenba siiga den yedi: «N den laa Isayi bijua ke o cua Nobi dogu nni, Ahitubi bijua Ahimeleki kani.

¹⁰ Ahimeleki den mia opo Li Miali Diedo ki buali o opo, ki puni o li bonjekaala leni Filisiti yua Goliati jugisiega.»

¹¹ Lani o bado den soani ke bi ban yini Ahimeleki, leni o baadiegu yaaba, bani yaa kopadicianba n den ye Nobi kuli. Bikuli den fii ki cua o bado kani.

¹² Wani Sayula den yedi: «Ahitubi bijua, ŋan cengi.» O den goa ki yedi: «N daano, n cengi.»

¹³ Sayula den yedi o: «Be yaa po ke yi janbi nni, fini leni Isayi bijua? A puni o li bonjekaala leni ki jugisiega, ki go mia opo U Tienu ki buali o opo, ke o se npo ki dia nni nani wan ko tiendi maama dinla ne.»

¹⁴ Ahimeleki den goa ki yedi o bado: «A naacenba kuli siiga ŋme naani leni Dafidi ke a fidi ki dugi opo? Wani yua n tie fini o bado cuado, leni a guudikaaba yudaano, a diegu yaaba kuli n jigini yua.

¹⁵ Dinla bebe yo ke n da mia opo U Tienu ki buali o opo? U Tienu n luoni npo min janbi a. Fini o bado n da tuni mini a naacemo bi n baadiegu niloba kuli tagiliba, kelima mii den pia min bani yaala kuli laa maama nni.»

¹⁶ O bado den yedi: «Ahimeleki, a baa kpe fini leni a baadiegu yaaba kuli.»

¹⁷ Lanwani o bado den yedi o guudikaaba yaaba n ye o kani: «Yin nagini mani ki kpa Li Miali Diedo kopadicianba, kelima bimoko todi Dafidi. Bi den bani ke o tiini ki bua ki ciadi ki naa waani nni.» Ama o bado guudikaaba den yie baa tandi bi nii ki ku Li Miali Diedo kopadicianba.

¹⁸ Lani o bado den yedi Doyega: «Fini n nagini ki kpa U Tienu kopadicianba.» Wani Edomi yua Doyega den nagini ki kpa bi kopadicianba. Laa daali o den kpa piinii n niba muu, yaaba n den laa yaa kopadician-liadibila n tie *benŋuuni ki luni leni *len gaali.

¹⁹ Sayula go den soani ke bi ku yaaba n sieni bi kopadicianba dogu Nobi nni kuli leni mu jugisiemu, bi jaba leni bi puoba, leni a bila leni a biŋaanda, leni i ne leni i ŋunbi leni i pe, o den teni ke bi ku bikuli leni mu jugisiemu.

²⁰ Ama Ahitubi bijua Ahimeleki bila siiga yendo den sani ki ciadi. O den yi Abiata. O den sani ki ŋoadi Dafidi,

²¹ ki waani o ke Sayula ku Li Miali Diedo kopadicianba.

²² Dafidi den yedi Abiata: «Laa daali n den bandi ke Doyega ye likani. N den bani ke laa pia kuli tama ke o baa waani Sayula. A baadiegu yaaba kuuma kuli ŋua mine.

²³ Ŋan yaa ye n kani ki da jie liba, kelima yua n moandi ki bua ki ñani n miali, o moandi ki bua ki ñani a yaali mo. A yaa ye n kani liba kuli kan tieni a.»