1 Samueli 21 - Gourmanchéma Bible

¹ Lanwani Dafidi den fii ki ban yaa caa, Jonatan mo den goa ki kua u dogu nni.

Dafidi sani ki gedi Nobi dogu

² Dafidi den gedi Nobi dogu, o kopadiciamo Ahimeleki kani. O kopadiciamo yeni den jie hali boncianla ki sani ki tuogi Dafidi ki yedi o: «Be n teni ke a ye a bebe kaa pia yegininlieba?»

³ Dafidi den goa ki yedi o kopadiciamo Ahimeleki: «O bado soani nni u tondu ki yedi nni ke oba kuli n da bandi wan soani nni yaa tondu, leni wan teni nni yaa ñoabonli. N bili mini leni n jawaaba n baa kadi naankani.

⁴ Moala a pia be a kani? Ŋan pa nni dupen bonba muu, bi ŋan pia a kani yaala kuli.»

⁵ O kopadiciamo den goa ki yedi Dafidi: «Mii pia dupenfano n kani, se yaa dupen n gagidi U Tienu po bebe, li yaa tie ke a jawaaba gagidi bi yula kaa taani leni puoba.»

⁶ Dafidi den goa ki yedi o kopadiciamo: «Hali min fii, dinla dana taa, tii taani leni puoba, n jawaaba kuli gagidi. Baa ke tin tuuni yaa tuonli dinla ki tie U Tienu n puogi ti yaa tuonli, li baa gagidi kelima mini yua n tuuni li gagidi.»

⁷ Lanwani o kopadiciamo den taa o dupengagidika ki teni o, kelima dupenfano naa den ye likani, se yaa dupen n gagidi U Tienu po bebe, ban yen ñani yua U Tienu nintuali ki lebidi ki bili dupenpaano landaali goga.

⁸ Li den sua ke Sayula naacemo yendo ye likani laa daali Li Miali Diedo nintuali. O den tie nilamo ki tie Edomi diema yaa yua, ki yi Doyega ki tie Sayula yankpaaba yudaano.

⁹ Dafidi den yedi Ahimeleki: «Ŋaa kubi a kani kpaanli, yaaka jugisiega? Kelima o bado tondu n bua tontoni maama yaa po teni ke mii baa ki taa n jugisiega, bi jatiaguba kuli.»

¹⁰ O kopadiciamo den goa ki yedi o: «Diidi ki le Filisiti yua Goliati, ŋan den ku yua telebinti tiidi n ye yaa joaloangu nni, o yaa jugisiega ye ne ki fini li cabili nni ki ye u *benŋuunu puoli po. A yaa bua gani, ŋan taa, kelima jugisietoaga naa go ye ne.» Dafidi den yedi: «Gaa pia ki lie, taa ki cuani ne!»

Dafidi gedi Gati dogu, Filisiti yaaba po

¹¹ Landaali liga Dafidi den suagi liiga leni o nuama ki tiini ki foagidi leni Sayula, ki gedi Filisiti yaaba dogu Gati yaa bado Akisi kani.

¹² Akisi badibaanba den yedi: «Wani Dafidi, Isalele diema bado kaa? Baa den yiini wani ka ki jeli ki tua: ‹Sayula den ku tudilitudili, Dafidi den ku tudipiigipiiga.› »

¹³ Dafidi den kpaagi laa maama po ki jie Gati bado Akisi boncianla.

¹⁴ Lani o den tieni nani o gaadi yeni ki tuuni li gaadituonli bi siiga. O den dangi a buliñoana po, ki cedi ke ti ñinsandi wuti o langbiadi po.

¹⁵ Lani Akisi den yedi o badibaanba: «Yi nua ke o ja ne gaadi, be yaa po ke yi cuani o n kani?

¹⁶ Nani n luo a gaada yo ke yi cuani one n kani ke min yaa nua o tuonyuogidi! One kan kua n diegu nni de!»