1 Samueli 2 - Gourmanchéma Bible

¹ Ana den jaandi ki yedi: «Li Miali Diedo teni ke n pia li pamanli. Li Miali Diedo teni ke n paalu yeli ñani. N yaadi n ñoabu ki ñuadi n yibalinba. N pali mangi kelima fini U Tienu faabi nni.

² Yua n Gagidi ki ŋani nani fini Li Miali Diedo kuli naa ye. Oba ki ye ki cie ŋa. Oba ki guu nani fini ti Tienu.

³ N yibalinba, da go maadi mani leni japaadi. Mi japaamaama n da go ña yi ñoana nni, Kelima Li Miali Diedo tie U Tienu ki bani li bonla kuli, Wani n bigidi li bontienkaala kuli,

⁴ A jakoanda dabana koa, Ama a tadima ñaagi u fidu nani ku gbanñagidigu yeni.

⁵ Yaaba n den guodi di kuadi bi yula Ki tuuni nitoaba po Ki bua ki baa ki je, Ama mi koma gbeni a konkonba po. Ki ŋoaliga mali taalima lele, Yua den mali boncianla mo yaa madi sedi.

⁶ Li Miali Diedo tendi ke bi niba ku ki go tendi ke bine ye ki fo, O tendi ke bi niba jii ki kua bi tinkpiba kaanu nni, Ki go tendi ke bine ña lienni.

⁷ Li Miali Diedo yen teni bi nitianba n luo, Ki teni bine n yaa pia. O jiindi bi nitianba, Ki fiindi bi nitianba mo.

⁸ O fiindi o niñinnilo ki ñandi o ku tangbangu nni. Ki fiindi o luodo ki ñandi o ti baadi nni, Ki tendi ke bi taagi ki kaa leni a nikpiaga ti kpiagidi kaanu. Li Miali Diedo n die ki tinga benjieli kuli, Ki teni ke ki maa yi yaa po.

⁹ O baa yaa kubi o buakaaba ban caa naankani kuli. Ama bi nibiadiba wani baa bodi li *biigili nni. O nilo kan paadi liba leni o fidiceli.

¹⁰ Li Miali Diedo yibalinba baa midi. O baa teni i tatantani n tiani hali tanpoli ki pundi bi kani. Li Miali Diedo baa jia ti buudi leni yaaba n ye hali ki tinga banlu. O baa pa o bado u paaciamu, O baa pugini wan gandi ki gagidi ki dini yua li bali li bali paalu.»

¹¹ Elikana den goa ki kuni o denpo Lama. Ki biga yeni den ye o kopadiciamo Eli kani ki tuuni Li Miali Diedo po.

Eli bijaba tuonbiada

¹² Eli bijaba den tie yaa jaba n bia, baa den bani Li Miali Diedo.

¹³ Diidi ki le laa kopadicianba n den tiendi bi niba maama: O nilo yaa den cuani o yanga ke bi padi opo kuli, o kopadiciamo naacemo den yen cua ban ŋaandi ti nandi yaa yogunu. O den yen kubi yaa nanjogidi n pia ñina taa,

¹⁴ ki muudi ti nandi n ŋa yaa tiagu nni, li yaa tie bobili bi sanli bi canciagu. I nanjogidi n muu ki ñani yaala kuli, o kopadiciamo den yen ga ki yaa kubi o yuli po. Bi den tiendi yene yaaba n ña Isalele diema nni ki kpendi Silo kuli.

¹⁵ Hali ke bi daa den juu mi kpama moko, o kopadiciamo naacemo den yen cua ki yedi yua cua ke bi padi opo yeni: «Ŋan cuani yaa nandi n baa sagi o kopadiciamo po. O kan ga a kani yaa nandi n ŋaani, o bua ti nankaadi bebe.»

¹⁶ O nilo yeni yaa den yedi o: «Bi yaa juu mi kpama, ŋan taa ŋan bua yaala kuli.» O naacemo den yen goa ki yedi: «A-a, ŋan teni nni moalamoala, lani yaaka n baa ga leni u paalu.»

¹⁷ Laa jawaaba den kuandi bi yula ti tuonbiaciandi nni Li Miali Diedo kani, kelima bi den fali ban padi yaa pada Li Miali Diedo po.

¹⁸ Samueli den tuuni Li Miali Diedo diegu nni. Ki biga yeni den goli yaaba n tuuni U Tienu diegu nni n yen goli yaa kpalibu buolu ke bu luni leni *len gaali.

¹⁹ Binli kuli o naa den yen tieni opo ki liadibiga ki cuani opo, wani leni o calo yaa kpendi ki baa padi binli kuli yaa padili.

²⁰ Eli den yen gaali Elikana leni o pua ki tua: «Li Miali Diedo n teni ŋan baa bitoana o pua ne kani, ban lebidi wan puni yua Li Miali Diedo.» Li yaa puoli Elikana leni o pua yen goa ki kuni bi denpo.

²¹ Li Miali Diedo den nuali ki laa Ana po ki puni o ti madi ke o go mali bonjala taa leni bonpola lie. Ki biga Samueli den fandi ki pugidi ki tuuni Li Miali Diedo po.

²² Eli den podi hali boncianla. O den gbadi o bijaba n tiendi Isalele yaaba kuli maama. O go den gbadi ke bi dua leni yaa puoba n den taagi li taanli gbandieli buliñoabu kani moko.

²³ O den yedi ba: «Be yaa po ke yi tuadi a naa tuada? N gbadi bi niba kuli kani yi tuonbiada.

²⁴ A-a, n bila, min gba ke bi maadi yipo yaala, laa ŋani. Yi teni ke Li Miali Diedo niba tiendi ti *tuonbiadi.

²⁵ O nilo yaa tieni o lielo mi biadima, U Tienu baa jia leni o ti buudi. Ama o yaa tudi wani Li Miali Diedo po, ŋme baa mia opo sugili?» Baa den cengi bi jakpelo maama kelima Li Miali Diedo den jagi ke o baa kpa ba.

²⁶ O jawaalo Samueli den fandi ki pugidi. Li Miali Diedo leni bi niba kuli yaa pala den mani opo ki pugidi.

U Tienu waani Eli ke ti buudi baa baa o diegu nni

²⁷ U Tienu sawalipualo den cua Eli kani ki yedi o: «Li Miali Diedo yedi mine: Mii den doagidi n yuli a baadiegu yaaba po ban den ye Ejipiti diema nni ki tie *Falono yonbi te?

²⁸ N den gandi a baa Isalele nibuoli kuli siiga ke wan yaa tie npo o kopadiciamo, ki yen do ki pundi n *padibinbinli kani ki padi ki juu yaa tulale yaa nuulu n mani, ki yaa la li kopadicianliadili n nintuali. N go den puni o diegu yaaba Isalele yaaba n padi yaa padijuukaana kuli.

²⁹ Be yaa po ke yi fali ki ŋmaadi min bili ke bi padi npo yaa pada, min bili ke ban yaa kpendinni yaa paabu kuli n dieli nni? Be yaa po ke a fangi a bila ki cie mini, ki ñandi n niba Isalele yaaba n padi npo yaa pada siiga yaala n ŋani ki cie, ki wubi yi yula leni lani?

³⁰ Lani yaa po mini Li Miali Diedo Isalele yaaba Tienu yedi mine: ‹N den bili ke a diegu leni a baadiegu baa yaa tuuni li kopadician-tuonli n nintuali hali yaa yogunu kuli. Ama dinla n kadi ki waani ke li kan go tua yeni. Kelima n baa kpiagi yua n kpiagi nni, ama yaaba n fali nni n baa fali ba.

³¹ Diidi ki le u yogunu kpendi ke n baa bolini a diegu gbanmandanba leni a baadiegu yaa gbanmandanba, ke nikpelo kuli kan go yaa ye a diegu nni.

³² A baa le yibalinba n dieli nni. Baa ke n baa pa Isalele mi yemanma, a yaa diegu nni wani jakpelo kan go yaa ye hali abada.

³³ N baa cedi a buolu yua n yaa taabi n padibinbinli tuonli nni ke o nuni bonlekaala leni li ponli n boandi o pali. A diegu niba yaaba n sieni mo baa yaa ku bi jawaama nni.

³⁴ Diidi ki le yaala n baa tieni a bijaliediba Ofini leni Finea ki tua apo sinankeeni ke likuli baa tieni. Bani yeni kuli baa taani ki kpe dayenli.

³⁵ N baa dini n kopadiciamo min baa fidi ki yaa dugi yua yaa po, yua n baa yaa tiendi n pali leni n yantiali n bua maama. N baa sieni o diegu ke o puoliŋuani baa yaa kubi li kopadician-tuonli min baa gandi ki gagidi ki dini yua li bali yaa nintuali hali yaa yogunu kuli.

³⁶ Lanwani yua n baa sieni a buolu nni kuli baa cua ki gbaani o nintuali ki mia tanga leni mi jiema ki yedi: N mia ŋa, ŋan kuani nni bi kopadicianba tuona tuonliba niinni min yaa baadi ki di.› »