1 Samueli 19 - Gourmanchéma Bible

¹ Sayula den maadi leni o bijua Jonatan leni o badibaanba kuli ke o bua ki kpa Dafidi. Ama Sayula bijua Jonatan pali den mani Dafidi po hali boncianla.

² O den waani o ki yedi o: «N baa Sayula bua ki kpa ŋa. Saala ku tiŋaagu ŋan guudi a yuli ki gedi yaa kaanu n duagi ki ban wuoni.

³ N baa yegi leni n baa ŋan baan wuoni yaa kuanu nni yeni. N baa maadi o a maama ki le wan baa yedi yaala ki nan yuandi ki waani a.»

⁴ Lani yaa puoli Jonatan den maadi o baa Sayula kani ki bua ki faabi Dafidi ki yedi o: «O bado, n mia ŋa ŋan da tudi a naacemo Dafidi po, kelima waa tudi apo liba. O ŋanbi apo yo moko,

⁵ kelima o den luni o miali ki ku Goliati. Li Miali Diedo den tieni tinba Isalele yaaba kuli po mi faabicianma. Amo den laa la ki mangi a pali. Lanwani be yaa po ke a baa wuli yua kaa pia tagili soama, ŋan bua ki kpa Dafidi yua n ki pia apo tagiliba kuli yeni?»

⁶ Sayula den cengi Jonatan maama ki poli ki yedi: «Hali Li Miali Diedo po, Dafidi kan kpe.»

⁷ Lanwani Jonatan den yini Dafidi ki togidi o laa bonla kuli. Li yaa puoli o den gedini o Sayula kani ke o den ye o kani nani mi kpiama yeni.

Dafidi pua Mikali faabi o

⁸ Bu toabu go den fii. Dafidi den fii leni bi toatieba ki gedi ki tuogi leni Filisiti yaaba bu toabu. O den ku boncianla bi siiga hali ke bi lebidi ki sani.

⁹ Laa yogunu Li Miali Diedo n den soani yaa cicibiadiga den ŋoadi Sayula ke o ka o diegu nni ki muubi o kpaanli.

¹⁰ Dafidi den pua ku kogidigu. Sayula den moandi ki bua ki muu ki tabini o leni li goanli, ama Dafidi den lia ke Sayula kpaanli den cuo u bilinu. Dafidi den sani ku ñiagu ki ciadi.

¹¹ Sayula den soani o naacenba Dafidi dieli po ke ban guudi ki kpa o ku tiŋaagu. Ama Dafidi pua Mikali den waani o ki yedi: «Ku ñiagu na, a yaa sani ki ciadi kuli, saala bi baa kpa ŋa.»

¹² O den ñani Dafidi li bonli kani ki jiini o ke o sani ki ciadi.

¹³ Lanwani Mikali den taa yaa *bulo n naani leni o nilo ki maani u duanu po, ki go maani ku ŋuagbangu o yuli po ki pini likuli bu kpalibu.

¹⁴ Sayula n den soani o naacenba ban ban cuo Dafidi, Mikali den yedi ke o yia.

¹⁵ Lanwani Sayula go den soani o naacenba ban ban le Dafidi. O den yedi ba: «Yin tugi o mani leni u duanu ki cuani o n kani min kpa o.»

¹⁶ O naacenba n den pundi ki kua, bi den laa ke yaa bulo n naani leni o nilo maa u duanu po ke ku ŋuagbangu mo ye o yuli po.

¹⁷ Sayula den yedi Mikali: «Be yaa po ke a boandi nni nande ki cedi ke n yibali ñani ki ciadi?» Mikali den goa ki yedi Sayula: «O den yedi nni: ‹Cedi min ña, lani yaaka n baa kpa ŋa.› »

Dafidi leni Sayula gedi Najoti

¹⁸ Dafidi den sani ki ciadi yene. O den gedi Lama, Samueli po, ki togidi o Sayula n den tieni o yaala kuli. Lanwani wani leni Samueli den gedi ki ban ye Najoti dogu nni.

¹⁹ Bi den togidi Sayula ki yedi o: «Dafidi ye Najoti ki kuu leni Lama.»

²⁰ Lani Sayula den soani a tonda ke ban gedi ki ban cuo Dafidi. Ban den laa bi sawalipuaba goli ke bi pua sawali ke Samueli se leni ba ki tie bi yudaano, U Tienu Fuoma Yua den kua ki diedi bani Sayula tonda ke bimoko den pua sawali.

²¹ Sayula n den gbadi laa bonla, o go den soani tonditoaba. Bimoko den pua sawali. Lanwani o go den soani mi taama. Bimoko go den pua sawali.

²² Lanwani Sayula den fii wani oba ki caa Lama. Wan den pundi yaa caacianli n ye Seku dogu, o den buali: «Samueli leni Dafidi ye le?» Bi den goa ki yedi o: «Bi ye Najoti ki kuu leni Lama.»

²³ Lani o den fii ki caa Najoti. U Tienu Fuoma den kua omoko yaa niinni ki diedi o ke o den cuoni ki pua sawali hali ki ban pundi Najoti.

²⁴ O den landi o tiadi ki mo pua sawali Samueli kani. O den laabi tiipo mubima laa daali leni li ñiagu kuli. Li tie lani yaa po ke bi tua: «Sayula moko tie bi sawalipuaba siiga yua yoo?»