1 Samueli 18 - Gourmanchéma Bible

¹ Dafidi n den maadi leni Sayula ki gbeni, lanyogunu Jonatan yama den kua Dafidi niinni ke o den bua o nani o yuceli yeni.

² Laa daali Sayula den taa Dafidi ki kubi o, ke waa go goa ki ye o baa diegu nni.

³ Jonatan mo den loli ku danligu leni Dafidi kelima o den bua o nani o yuceli yeni.

⁴ Jonatan den goliti o kpalibu ki puni Dafidi, ki go puni o o minteelitiadi. O den puni o baa o jugisiega leni o dabanli, leni o gbanñagidigu.

⁵ Sayula yaa den soani Dafidi naankani kuli, o den yen gedi ki paadi. Lani, Sayula den teni ke o diedi bi toatieba. Bi niba kuli pala den mani Dafidi po. Baa Sayula badibaanba yaa pala moko den mani opo.

Li nunponbiadili cuo Sayula Dafidi po

⁶ Dafidi n den ku Goliati ke bikuli lebidi ki kuni, bi puoba den ñani Isalele dogi nni kuli ki tuogi o bado Sayula ki pua a gangaana leni baantiatoadi. Bi den pua ki yiini ki jeli, ki yigini i pamandanyigini.

⁷ Yaa puoba n den jeli ki yiini yeni, bine den yiini ke bine gaani ki tua: «Sayula den ku tudilitudili, Dafidi den ku tudipiigipiiga.»

⁸ Sayula pali den fii boncianla kelima laa maama po. O den yedi: «Bi den teni Dafidi tudapiiga (10 000), ki teni nmo tudili. Be go sieni opo, li yaa tie li bali yaaka?»

⁹ Ki cili laa daali, Sayula den nua Dafidi leni ki nunbiadiga.

¹⁰ Li fiifaama, U Tienu n den soani yaa cicibiadiga go den ŋoadi Sayula ke o gaandi o diegu nni. Dafidi den pua ku kogidigu nani wan den yen maani ki pua maama. Sayula den muubi o kpaanli.

¹¹ O den yugidi o kpaanli ki tua o pali nni: «N baa muu ki tabini o li goanli.» Ama taalima lie kuli Dafidi den lia ke waa baa o.

¹² Sayula den jie Dafidi kelima Li Miali Diedo den ŋa wani Sayula ki ye leni Dafidi.

¹³ Lanwani Sayula den ñani o ki foagidi o o kani, ki teni ke o tua toatieba tudili yudaano. Dafidi den tugi bi yuli bi ñama leni bi guanma kuli.

¹⁴ Wan den tuogi leni yaaba kuli, o den paadi ba kelima Li Miali Diedo den ye leni o.

¹⁵ Sayula n den laa ke Dafidi paadi wan togidi leni yaaba kuli, o den jie o.

¹⁶ Ama Isalele yaaba leni Juda yaaba kuli den bua Dafidi kelima o den tie bi guudikaaba yudaano ki yen yegi leni ba ki caa bu toabu.

Dafidi taa Sayula bisalo Mikali

¹⁷ Lanwani Sayula den yedi Dafidi: «A yaa tuuni npo leni li papaali ki tiendi Li Miali Diedo toabu, n baa pa ŋa n bisakpelo Melabi, wan tua a pua.» Ama Sayula den bungi o pali nni ki yedi: «Mii bua ki maani opo n nuu, ama Filisiti yaabe n maani opo bi nii.»

¹⁸ Dafidi den goa ki yedi Sayula: «Mii tie pu kuli, n baadiegu leni n buolu mo ki tie liba kuli Isalele yaaba siiga. N baa ga lede ki tua o bado cuado?»

¹⁹ Lan den pundi ban taa Sayula bisalo Melabi ki teni Dafidi yaa yogunu, bi den taa o ki teni Meola yua Adilieli.

²⁰ Ama Sayula bisalo Mikali den bua Dafidi. Bi den waani Sayula, ke laa bonla den dagidi opo.

²¹ O den bungi ki yedi: «N baa taa o ki teni o wan tua opo diagu ke Filisiti yaaba n maani opo bi nii.» Lanwani Sayula den yedi Dafidi mi liema: «A baa tua n cuado dinla.»

²² Sayula den puogi o badibaanba ki yedi: «Yin juogi mani leni Dafidi ŋasiili nni ki yedi o: ‹O bado pali mani leni a, o badibaanba kuli mo bua ŋa. Lanwani moala ŋan tua o bado cuado.› »

²³ Sayula badibaanba den togidi Dafidi laa maama kuli. Dafidi mo den goa ki yedi ba: «Yi tama ki tua o bado cuado tie yaala n dingi bi? Mini, n tie luodo ki go tie taliga.»

²⁴ Sayula badibaanba den goa ki togidi o Dafidi n yedi yaala.

²⁵ Sayula den yedi: «Yin go yedi Dafidi mine: ‹O bado naa bua cuadili. Wan bua yaala bebe tie Filisiti yaaba punjuodi bondi kobiga ke wan fidi ki guani bani o yibalinba bi panpaanbiadi.› » Sayula n den jagi yaala den tie ke o bua Dafidi n baa Filisiti yaaba nuu nni ban kpa o.

²⁶ Sayula badibaanba n den togidi Dafidi laa maama, o den tuo ke o baa tieni yeni ki tua o bado cuado. Hali ke li yogunu daa pundi,

²⁷ Dafidi den fii leni o toatieba ki gedi ki ku Filisiti yaaba kobilie, ki jia bi punjuodi ki cuani ki teni o bado ke wan tua o cuado. Lanwani Sayula den teni o o bisalo Mikali ke o tua o pua.

²⁸ Sayula n den laa ki bandi ke Li Miali Diedo ye leni Dafidi, ke o bisalo Mikali mo bua o,

²⁹ o den jie Dafidi ki pugidi. Sayula den tua Dafidi yibali hali o miali banlu.

³⁰ Filisiti yaaba yudanba den ña ki togidi leni Isalele yaaba bu toabu. Bi yaa ñani yaama kuli, Dafidi den yen paadi ba ki cie Sayula toatieba yaaba n sieni kuli. O yeli den ñani boncianla.