1 Samueli 17 - Gourmanchéma Bible

¹ Filisiti yaaba den taani bi toagola ki bua ki tuogi bu toabu. Bi den taani Juda yaaba dogu Soko ki gedi Efesa-Damima dogu yu n ye Soko leni Aseka siiga, ki kpa bi toanagili lankani.

² Sayula leni Isalele yaaba moko den taani. Bi den kpa bi toanagili yaa joaloangu n pia telebinti tiidi niinni. Bi den caligi ki baa tuogi leni Filisiti yaaba.

³ Filisiti yaaba den se nepo yaa joajiidima, Isalele yaaba mo nepo yaa joajiidima, ke ku joaloangu ye bi siiga.

⁴ O jakoando den ñani Filisiti yaaba toanagili nni. O den tie bi dogu Gati yua ki yi Goliati. O foagimu den tie nukpanduna luoba leni nubadiyaagu.

⁵ O den ciibi li kumoansanli ki laa ti kudi liadili ke li kpiagu pundi kilo piiluoba.

⁶ O den pili yaa kumoandi n mubini o biemi kuli, ki bali u ŋalikuomu.

⁷ O kpando den gbengi ki pundi o lugido dapuadigu. Mi kpanbima kpiagu den pundi kilo lele. Yua n den kubi o gbankoandigu den ye o liiga.

⁸ O den sedi ki kpaani ki yedi Isalele toatieba: «Be yaa po ke yi cua ne, ki caligi ki baa tuogi bu toabu leni ti? Mii tie Filisiti yua kaa? Yimo ki tie Sayula yonbi kaa? Lanwani yin gandi mani yi siiga niyendo wan jiidi ki tuogi leni nni.

⁹ O yaa fidi ki tuogi leni nni ki kpa nni, ti baa tua yi yonbi. Nmo yaa paadi o ki kpa o, yimo baa tua ti yonbi ki yaa tuuni ti po.»

¹⁰ Filisiti yua yeni go den yedi: «N mia yinba Isalele toatieba kuli li koanli. Soani mani niyendo wan cua ne tin moa.»

¹¹ Sayula leni Isalele yaaba kuli n den gbadi Filisiti yua yeni maama, bi den jie ki kandi ke bi tugusoama sani.

Dafidi gedi bu toabu po

¹² Dafidi den tie *Isayi bijua. Isayi yeni den tie Yufilata yua, lani n tie Juda diema nni Betelema yua. O den pia bijaba nii. Sayula yogunu wani Isayi den kpeligi ki podi.

¹³ Isayi bijaba bonba taa den ŋoadi Sayula ki gedi bu toabu. Laa bitaada den tie o bijakpelo Eliabi, leni o bijalielo Abinadabi, leni o bijataalo Sama.

¹⁴ Dafidi n den tie ku bijuogu. Bi bijataadiba n den ŋoadi Sayula ki gedi bu toabu.

¹⁵ Dafidi den caa ki tuuni Sayula po ki goa ki kuni Betelema ki kpaa o baa pe.

¹⁶ Filisiti yaaba jakoando yeni den caa ku tiŋaagu leni ku juogu kuli ki miadi Isalele yaaba o muado. Li den pundi dana piinaa ke o caa.

¹⁷ Isayi den yedi o bijua Dafidi: «Taa i disagidi yi n bua ki pundi baabuogu ne leni ki dupen piiga ne ki jaligi ki gedini li toanagili po a kpeliba po.

¹⁸ Taa ban taa mi naaŋanguankaama ki ŋanbi yaa jekpaga ne moko bona piiga ki gedini bi toacagili yudaano po. A baa le a kpeliba yaa ye leni laafia, ki goa ki pa nni bi laabaali.

¹⁹ Bi ye leni Sayula leni Isalele toatieba kuli yaa joaloangu n pia telebinti tiidi nni, ki togidi bu toabu leni Filisiti yaaba.»

²⁰ Dafidi den fii ku tiŋapanpangu ki ŋa i pe leni yankpaatoa, ki taa o tugili ki gedi nani Isayi n den puogi o maama. Wan den pundi li toanagili kani yaa yogunu, a toagola den caa ki baa caligi li toatuogili kaanu, ki yiedi i toayiedi.

²¹ Isalele yaaba leni Filisiti yaaba den sedi cagacaga, toacagili kuli den tiegi liyali.

²² Dafidi den teni o tugili o tiaguudo, ki sani ki gedi li toacagili kani ki buali o kpeliba bi yaa pia laafia.

²³ Wan den maadi leni ba yaa yogunu, Filisiti yaaba jakoando Goliati yeni den ñani Filisiti yaaba toacagili nni. O den sedi Isalele toatieba leni Filisiti yaa toatieba siiga ki maadi nani mi kpiama yeni. Dafidi den gbadi wan yedi yaala.

²⁴ Isalele toatieba n den laa laa ja, bikuli den jie boncianla, ki suli ki guani puoli.

²⁵ Isalele toatieba den tua: «Yi nua yaa ja n nagidi na bi? I moamoani o miadi tinba Isalele yaaba li koanli. Yua n ku o kuli, o bado baa guoni o o ŋalimano, ki pa o o bisalo, ki faabi o baadiegu leni li badituonli mo Isalele diema nni.»

²⁶ Dafidi den buali yaa jaba n nagi leni o: «Yua n ku o ja na ki ñani Isalele yaaba po i fe, bi baa tieni opo be? Laa jifolo, Filisiti yua yeni, o tie ŋme ki baa fali U Tienu yua n fo toagoli?»

²⁷ Bi toatieba den togidi o o bado n den niani ke o baa tieni yaala yua n ku o po.

²⁸ O kpelo Eliabi den gbadi ke o maadi leni bi toatieba ke o pali fii opo ke o yedi o: «Be yaa po ke a jiidi ki cua ne? A ŋa ki pekubibiga leni ŋme li fuali nni? N bani a japaadi leni a janda po. A cua ki bua ki le li koanle!»

²⁹ Dafidi den goa ki yedi o: «N tieni be? Min da buali moko?»

³⁰ Lanwani o den jigidi ki maadi leni nitoa ki go buali mi mayenma yeni. Bi go den maadi o nani mi kpiama yeni.

³¹ Ban den gbadi Dafidi n yedi yaala, bi den togidi Sayula ke o den soani ke bi yini o.

³² Dafidi den yedi Sayula: «Oba kuli gbanu n da wudi kelima Filisiti yua yeni po. Mini a naacemo baa gedi ki koani leni o.»

³³ Sayula den yedi Dafidi: «A kan fidi ki gedi ki koani leni Filisiti yua yeni kelima a tie biga, omo tie jakoando hali o jawaama nni.»

³⁴ Dafidi den yedi Sayula: «Mini a naacemo n den kpaa n baa pe, yangbanlo bi yaa fuayanbiadiga n yi ulisi yaa den cua ki cuo pebiga li pegoli nni kuli,

³⁵ n den yen sani ki ŋoadi o ki pua ki guli o, ki kpibidi ga o ñoabu nni. O yaa den lebidi ki baa bibi nni, n den yen cuo o koda nni ki pua ki kpa o.

³⁶ Mini a naacemo guli ki kpa i yangbanli leni fuayanbiaditoamu kuli, lanwani laa jifolo, Filisiti yua yeni, n baa soani o yene, kelima o sugi U Tienu yua n fo toagoli.»

³⁷ Dafidi go den yedi: «Li Miali Diedo yua n den faabi nni leni o yangbanlo taajenñadi, leni yaa fuayanbiadi n yi ulisi yaa taatali nni, go baa ga nni Filisiti yua na moko yaa nuu nni.» Sayula den yedi Dafidi: «Gedi. Li Miali Diedo n yaa ye leni a.»

³⁸ Lanwani Sayula den lani Dafidi o toatiadi. O den cibini o li kumoansanli, ki lani o ti kudi liadili.

³⁹ Dafidi den yie Sayula jugisiega ki ñagini o toatiadi ki taa ke o baa cuoni ki gbali, kelima waa den maani laa tiadi. Lane o den yedi Sayula: «N kan fidi ki cuoni leni yaa toatiadi n tie na, kelima mii maani ti.» O den yiedi ti.

⁴⁰ Lanwani o den taa u gbiamu, ki gandi tanŋaliga muu u ñinsanu nni ki ŋuuni o yankpaboagili nni, ki taa o tanbuncaangu ki nagini Filisiti yua.

⁴¹ Filisiti yua yeni den nagidi Dafidi waamu waamu ke yua kubi o gbankoandigu ye o liiga.

⁴² Filisiti yua yeni n den diidi ki laa Dafidi, o den fali o kelima o den sua ke o tie biga ki moani ke o nunga ŋani.

⁴³ Lani Filisiti yua yeni den yedi Dafidi: «N tie sangbanle ke a togidi leni nni leni i gbiami?» Lanwani o den taagi o *buli yela ki solini Dafidi

⁴⁴ ki yedi o: «Pundi nne, n baa taa a gbanandi ki teni i kaabi leni ti fuayandi.»

⁴⁵ Dafidi den yedi Filisiti yua: «A togidi leni nni leni ki jugisiega leni li kpaanli leni u ŋalikuomu. Mini wani, n togidi leni a Li Miali Diedo, U Paaciamu Daano yaa yeli nni, wani U Tienu, yua n die Isalele yaaba toagoli ŋan sugi yaali.

⁴⁶ Dinla Li Miali Diedo baa paadi a ki teni a n nuu nni, n baa pua ki guli a ki jia a yuli. Dinla n baa taa Filisiti yaaba toagoli nikpiema ki teni i kaabi leni ti fuayandi. Lani, ŋanduna kuli baa bandi ke U Tienu ye leni Isalele yaaba.

⁴⁷ Yaa niligu n ye ne kuli mo baa bandi ke wani Li Miali Diedo ki koani leni ki jugisiega leni li kpaanli ka ki gaani o niba. Li Miali Diedo n tie bu toabu daano. Wani n baa taa yi ki teni ti nuu nni.»

⁴⁸ Filisiti yua yeni n den go cili ki cuoni ki kpendi Dafidi kani yaa yogunu, Dafidi den sani ki baa tuogi o.

⁴⁹ O den tuuni o boagili nni ki ñani li tanli ki lugidi leni o tanbuncaangu ki pua Goliati yutunli ke li tanli feli o yutunli nni. O den baa ki labini.

⁵⁰ Li den tie yeni ke Dafidi den paadi Filisiti yua leni ku tanbuncaangu leni li tanli. O den pua Goliati ki ku o ki naa kubi jugisiega.

⁵¹ Dafidi den sani ki pundi Goliati kani ki sedi ki yagini opo ki cuo ki dadi ki noadi wani Goliati jugisiega ki jia o yuli. Filisiti yaaba n den laa ke bi jakoando kpe, bi den digi.

⁵² Lanwani Isalele leni Juda toatieba den fii ki yiedi ki ŋoadi ki deli Filisiti yaaba ki pundi hali Gati dogu leni Ekiloni yaa buliñoana kani. Filisiti yaaba yaaba n den poagili den baa ki kpe u sanu nni ki cili Salayima dogu ki pundi hali Gati leni Ekiloni.

⁵³ Lani yaa puoli Isalele yaaba den cedi Filisiti yaaba ki lebidi ki kua bi toanagili nni ki fagi.

⁵⁴ Dafidi den taa Goliati yuli ki kpenni li Jelusalema ki taa o toatiadi mo ki kuani wani Dafidi gbandieli nni.

⁵⁵ Sayula n den laa Dafidi ke o caa ki baa tuogi leni Goliati, o den yedi o guudikaaba yudaano Abineli: «Abineli, o jawaalo na tie ŋme yaa bijua yo?» Abineli den goa ki yedi: «N daano, hali U Tienu po, mii bani.»

⁵⁶ Lanwani o bado den yedi: «Ŋan buali ki bandi o jawaalo n tie yua yaa bijua.»

⁵⁷ Dafidi n den ku Goliati ki goa ki cua yaa yogunu, Abineli den cuani o Sayula kani ke o kubi Goliati yuli.

⁵⁸ Sayula den yedi o: «O jawaalo, a tie ŋme yaa bijua yo?» Dafidi den goa ki yedi o: «N tie a naacemo Betelema yua Isayi yaa bijua yo.»