1 Samueli 16 - Gourmanchéma Bible

¹ Li Miali Diedo den yedi Samueli: «A baa yaa yagini a yama Sayula po ki pundi u laa yogunu? N yie o, o kan go yaa tie Isalele yaaba bado. Lani ŋan gbieni a yinli mi kpama ki fii. N baa soani a Betelema yua *Isayi kani kelima n gandi o bila siiga min baa dini yua li bali.»

² Samueli den yedi: «N baa tieni lede ki gedi? Kelima Sayula yaa gbadi, o baa kpa nni.» Li Miali Diedo den yedi o: «A yaa caa ŋan taa o naasalo ki dadi o ki ban yedi: ‹N cua ki baa padi li padili Li Miali Diedo po.›

³ Ŋan yini Isayi wan cua li padili kani. N baa waani a ŋan baa tieni yaala. Min baa waani a yua, ŋan wuli o yaa yuli po li bali kpama ki gagidi o npo wan tua o bado.»

⁴ Samueli den tieni Li Miali Diedo n den yedi o yaala ki gedi Betelema. U dogu nikpela den cua o kani leni i jeje ki yedi o: «A cua laafia?»

⁵ O den goa ki yedi ba: «Laafia. N cua ki bua ki padi li padili Li Miali Diedo po yo. Yin gagidi ki ŋanbi mani yiba, ki yegi leni nni li padili kani.» O den waani Isayi leni o bijaba mo n gagidi ki ŋanbi biba ki cua li padili kani.

⁶ Ban den pundi ke Samueli laa Eliabi, o den yedi o yama nni: «Laa pia kuli tama, Li Miali Diedo n gandi yua n se o nintuali ne.»

⁷ Ama Li Miali Diedo den yedi Samueli: «Ŋan da diidi o bugima leni wan foagi maama kelima n cedi wani. Mini U Tienu mii nua ki bigidi nani o nisaalo n nua ki bigidi maama ka. O nisaalo nua i nuni n laa yaale, ama mini Li Miali Diedo nua li pali nne.»

⁸ Lane Isayi den yini o bijua Abinadabi ki teni ke o pendi Samueli nintuali. Samueli den yedi: «Li Miali Diedo naa gandi one moko.»

⁹ Lanwani Isayi den teni ke Sama pendi. Samueli den yedi: «Li Miali Diedo naa gandi one moko.»

¹⁰ Isayi den teni ke o bijaba siiga bonba lele pendi Samueli nintuali. Samueli den yedi Isayi: «Li Miali Diedo naa gandi bi niinni oba kuli.»

¹¹ Lanwani Samueli den yedi Isayi: «A bijaba kuli n yeni bi?» O den goa ki yedi: «N bijuogu n sieni. Ama o kpaa i pe.» Samueli den yedi Isayi: «Soani ban ban yini o, kelima ti kan kali ki je ke waa cua.»

¹² Isayi den soani ke bi ban yini o. O den moani, ke o nuni ŋani, ke o pia mi jawaama. Li Miali Diedo den yedi Samueli: «Fii ki wuli li bali kpama o yuli po ki gagidi o wan tua o bado, kelima wani n yeni.»

¹³ Lanwani Samueli den taa li yinli leni li bali kpama ki wuli o yuli po ki gagidi o o kpeliba siiga. Li Miali Diedo Fuoma den kua o niinni ki diedi o, ki cili laa daali ki yaa caa! Li yaa puoli Samueli den fii ki kuni Lama.

Dafidi kua Sayula diegu nni

¹⁴ Li Miali Diedo Fuoma den ŋa Sayula. U Tienu den teni ke ki cicibiadiga cua o kani ki yagini o yama.

¹⁵ Sayula badibaanba den yedi o: «Diidi ki le, U Tienu n soani yaa cicibiadiga yagini a yama.

¹⁶ Lanwani ti daano, ŋan puogi tinba a naacenba, yaaba n ye a nintuali na, tin lingi yua n bani li kogidipuali, ke ki cicibiadiga yeni yaa fii apo, wan pua apo ku kogidigu lan kagidi apo.»

¹⁷ Sayula den goa ki yedi o naacenba: «Yin lingi mani npo yua n bani li kogidipuali bonŋanla ki cuani o npo ne.»

¹⁸ Bi siiga nni yendo den yedi: «Diidi ki le, n den laa Betelema yua Isayi yaa bijua ke o bani li kogidipuali ki go pia u paalu leni li papaali ki tie jakoando, ki bani mi maama, ki pia mi jawaama. Li Miali Diedo moko ye leni o.»

¹⁹ Lani Sayula den soani a tonda Isayi kani ki yedi o: «Soani npo a bijua Dafidi, yua n kpaa a pe.»

²⁰ Isayi den taa o ŋunbo ki tuni o dupen, ki taa ku dayuagu ke gu gbie duven, ki go taa ki ŋuabiga ki teni o biga Dafidi wan ban teni likuli Sayula.

²¹ Dafidi n den pundi, o den kua Sayula kani. Sayula pali den mangi opo boncianla, ke o gandi o wan yaa tugi opo o toatiadi.

²² Sayula den soani Isayi kani ki yedi o: «Ŋan cedi Dafidi n yaa ye n kani ki tuuni npo kelima n pali mani opo.»

²³ U Tienu n den soani yaa cicibiadiga yeni yaa den cua ki ŋua Sayula, Dafidi den yen taa ku kogidigu ki pua. Lani Sayula yama den yen duani lan yaa tu opo. Ki cicibiadiga mo den yen ŋa o.