1 Samueli 15 - Gourmanchéma Bible

¹ Samueli den yedi Sayula: «Li Miali Diedo den soani mine ke n wuli a yuli po li bali kpama ke a tua o nibuolu Isalele yaaba bado. Lanwani ŋan cengi Li Miali Diedo n yedi yaala.

² Li Miali Diedo, U Paaciamu Daano yedi ke daa: ‹N tiadi Amaleki yaaba n den tieni Isalele yaaba yaala: bi den pigini bi sanu ban den ñani Ejipiti nni yaa yogunu.

³ Lanwani ŋan gedi moala, ki ban baa Amaleki yaaba bu toabu ki bolini ba ki go bolini bi bonpiakaala kuli cain. Ŋan da gbadi bipo niñima, ŋan kpa ba, bi jaba leni bi puoba, leni a bila leni a biŋaanda, leni i ne leni i pe, leni ti yuoyuodi leni i ŋunbi kuli.› »

⁴ Lani Sayula den soani ke bi yini bi toatieba ke o coadi ba Telayimi dogu nni. A taacenda den pundi tudakobilie (200 000), Juda yaaba den pundi tudapiiga (10 000).

⁵ Lanwani Sayula den fii leni o toatieba kuli ki gedi Amaleki yaaba dociamu po ki wuoni ki guudi ku joaloangu nni.

⁶ Ama o den yedi Kena yaaba: «Yin fii mani ki ña Amaleki yaaba siiga ke min da ti taani ki bolini yi leni ba, kelima yi den ŋanbi Isalele yaaba kuli po ban den ñani Ejipiti nni yaa yogunu.» Lani Kena yaaba den ñani Amaleki yaaba siiga.

⁷ Sayula den paadi Amaleki yaaba ki cili Afila dogu ki pundi hali Sula dogu yu n ye Ejipiti puoli.

⁸ O den cuo Amaleki yaaba bado Agagi ke o fo, ki bolini Amaleki niba kuli cain leni mu jugisiemu.

⁹ Ama Sayula leni o toatieba den cedi Agagi ke o fo, leni i peŋami, leni i naaŋami, leni ti yanŋandi kuli, leni i pewubidi, leni yaala n ŋani kuli, ke li fo. Baa den bua ki bolini bani. Die yaala n gundi leni yaala n tadi kuli, bi den bolini lani cain.

U Tienu ŋa Sayula

¹⁰ Li Miali Diedo den maadi leni Samueli ki yedi o:

¹¹ «N lebidi, mii go bua ke n bi dini Sayula li bali, kelima o lebidi kaa go ŋua nni, waa tieni min puogi o yaala.» Samueli pali den fii. O den mua ki miadi Li Miali Diedo laa ñiagu kuli.

¹² Ku tiŋapanpangu o den gedi ke o baan le Sayula. Bi den waani o ke Sayula den gedi Kalimeli dogu ki dogini a tana ke lan yaa tie opo li bontiadikaala, ki lebidi ki guani ki pendi ki gedi Giligali.

¹³ Lanwani Samueli den ŋoadi Sayula. Sayula den yedi: «Li Miali Diedo n seligi a, n tieni Li Miali Diedo n den puogi nni yaala.»

¹⁴ Samueli den yedi: «I pe bubula leni i ne yaa bubula yaa ke n gba ne nan ña le yo?»

¹⁵ Sayula den goa ki yedi: «Bi ñani ba Amaleki yaaba kani ki cuani ba. Bi toatieba cedi i peŋami leni i naaŋami ke bi fo ki bua ki padi ba Li Miali Diedo a Tienu po. Yaala n sieni wani kuli ti bolini la.»

¹⁶ Samueli den yedi Sayula: «Suo yeni, n baa togidi a Li Miali Diedo n den yedi nni yaala ku ñiagu.» Sayula den yedi o: «Maadi.»

¹⁷ Samueli den yedi: «Ŋan den nua a yuli ke a tie biga yaa yogunu, ŋaa den tua Isalele buolu yudaano te? Li Miali Diedo ki den gagidi a ki dini a li bali ke a tua Isalele yaaba bado te?

¹⁸ Li Miali Diedo den soani a ke ŋan gedi ki bolini bi nibiadiba, bani Amaleki yaaba, ke ŋan tuogi leni ba bu toabu hali ki bolini bikuli cain.

¹⁹ Be yaa po ke ŋaa tuo Li Miali Diedo yedima? Be yaa po ke a boagili ti fagidi ki tudi Li Miali Diedo po yeni?»

²⁰ Sayula den goa ki yedi Samueli: «N tuo Li Miali Diedo yedima, ki tagini ki gedi wan den soani nni yaa tondu. N bolini Amaleki yaaba kuli, ki cuani bi bado Agagi.

²¹ Ama bi toatieba den taa ti fagidi siiga i pe leni i ne, yaaba n ŋani ki cie yaala n baa bodi yeni yaa siiga, ki bua ki padi Li Miali Diedo a Tienu po Giligali dogu nni.»

²² Samueli den yedi: «Naani ki padi a pada Li Miali Diedo po Mani opo ki pundi ki tuo ki tieni wan yedi yaala? Mi tuoma pia mayuli ki cie a pada, O ñoabonli tienma pia mayuli ki cie a petona kpama.

²³ Kelima mi yiema bia nani u bayuadiidu n bia maama, U tupaalu mo bia nani i *buli ŋoadima n bia maama. Ŋan yie Li Miali Diedo yedima yeni, o moko yie ŋa. A kan go yaa tie o niba bado.»

²⁴ Lanwani Sayula den yedi: «N tudi, kelima n miidi U Tienu ñoabonli ki yie amo yaa maama. N den jie bi toatieba ki tieni bani n yedi yaala.

²⁵ Ama moala n mia ŋa, ŋan tieni npo sugili n*tuonbiadi po ki guani ki yegi leni nni min ban gbaani ki kpiagi Li Miali Diedo.»

²⁶ Samueli den yedi Sayula: «N kan lebidi ki yegi leni a, kelima a yie Li Miali Diedo yedima. Li Miali Diedo mo yie ŋa ke a kan go yaa tie Isalele yaaba bado.»

²⁷ Samueli n den lebidi ki baa gedi yaa yogunu, Sayula den cuo o kpalibu tiipo ke bu cie.

²⁸ Lani Samueli den yedi o: «Dinla Li Miali Diedo moko dadi ki cie Isalele diema bali a kani ki baa teni nitoa yua n ŋani ki cie ŋa.

²⁹ U Tienu yua n tie Isalele kpiagidi, kan pua faama, o kan lebidi o yama, kelima waa tie nisaalo ka ki baa lebidi o yama.»

³⁰ Sayula go den yedi: «N tudi, ama ŋan miini nni n niba nikpela nintuali leni Isalele yaaba kuli nintuali. Lebidi ki yegi leni nni min ban gbaani Li Miali Diedo a Tienu nintuali ki kpiagi o.»

³¹ Lanwani Samueli den lebidi ki yegi leni Sayula ke o den gbaani Li Miali Diedo nintuali ki kpiagi o.

³² Samueli den yedi: «Cuani mani Amaleki bado Agagi ne.» Agagi den kpendi o kani leni li pamanli ki kpaagi ki tua: «Moala wani, kuuma ki go ye npo.»

³³ Samueli den yedi: «Nani a jugisiega n den ku pomaditoaba bila ke baa go pia bila maama, a yaa naa moko kan go yaa pia biga yene.» Lane Samueli den pedi ki jendijendi Agagi Li Miali Diedo nintuali Giligali dogu nni.

³⁴ Lani yaa puoli Samueli den fii ki gedi Lama, Sayula mo den kuni o denpo yaa dogu n yi Sayula Gibeya po.

³⁵ Hali Samueli n ban kpe, waa go gedi ki ban laa Sayula. O den yen mua Sayula po kelima Li Miali Diedo den mua ke o yaa bi dini Sayula li bali ke o tua Isalele yaaba bado.