1 Samueli 14 - Gourmanchéma Bible

¹ Dayenli Sayula bijua Jonatan den yedi yaa jawaalo n tugi o toatiadi: «Cua na tin suagi ki pundi Filisiti yaaba toanagibiga yaaga n ye ti nintuali.» Ama waa den waani o baa.

² Wani Sayula den ye Gibeya tinbianu, naankani n yi Migiloni, ki kaa *gelenadie tibu tinga. Yaa toatieba n den ye leni o den tie nani jaba kobiluoba.

³ Ahitubi bijua Ahiya moko den ye leni o. Ahitubi yeni den tie Ikabodi kpelo ki go tie Finea bijua. Fineya mo den tie Eli bijua, yua n den tie U Tienu kopadiciamo Silo po. Ahiya den la bi kopadicianba bado n yen laa yaa liadibiga ke ki tie *benŋuunu. Bi toatieba naa den bani ke Jonatan fii ki gedi.

⁴ Jonatan n den bua ki mabidi naani ki pundi Filisiti yaaba toanagibiga kani den pia tanfoaga lie. Tanfoagiyenli den ye jienu, line mo ganu. Yenli den yi Botisesi, li lieli mo Sene.

⁵ Tanfoagiyenli den ye jienu po ki tiegi Mikimasi, yenli mo den ye ganu po ki tiegi Geba.

⁶ Jonatan den yedi yaa jawaalo n tugi o toatiadi: «Cua tin suagi ki pundi a jifola yeni toanagibiga. Daalinba Li Miali Diedo baa todi ti, kelima liba kuli kan yie ke Li Miali Diedo kan teni tin paadi, ti yaa yaba bi ti yaa wa.»

⁷ Yua n tugi o toatiadi den yedi o: «Tieni a yama n bua yaala kuli, nani ŋan jagi maama a pali nni. Ŋan yedi tin gedi naani kuli n ye.»

⁸ Jonatan den yedi: «Lanwani daa, tin suagi ki pundi bi toatieba yeni kani ki doagidi ban le ti.

⁹ Bi yaa yedi ti: ‹Sedi mani hali tin cua ne›, ti baa yaa se tin ye naani, ti kan do ki gedi bipo.

¹⁰ Ama bi yaa yedi ti: ‹Do mani ki cua ne›, lani ti baa do ki gedi, kelima li baa yaa tie sinankeeni ke Li Miali Diedo taa ba ki teni ti nuu nni.»

¹¹ Lanwani bani niba lie den doagidi ke Filisiti toanagibiga yaaba laa ba. Filisiti yaaba den yedi: «Diidi ki le mani, Ebilu yaaba ña ban bi wuo yaa fali nni.»

¹² Lanwani bi den yedi Jonatan leni yua n tugi o toatiadi: «Do mani ki cua tikani ne, ti baa waani yi bonla.» Lanwani Jonatan den yedi yua n tugi o toatiadi: «Do ki yaa ŋua n puoli ne, kelima Li Miali Diedo taa ba ki teni tinba Isalele yaaba nuu nni.»

¹³ Lanwani Jonatan den gobindi o nii leni o taana ki do. Yua n tugi o toatiadi mo den ŋua o. Jonatan den muudi ki guliti Filisiti yaaba, yua n tugi o toatiadi mo den ŋua o puoli ki kpaani.

¹⁴ Laa paadima nni Jonatan leni yua n den tugi o toatiadi n den kpa yaaba den pundi nani jaba piilie. Bi den ku ba yaa fanma n ki fuu siiga.

¹⁵ Lane ti jawaandi den cuo yaaba n den ye Filisiti yaaba toanagili nni leni i tinkundogi nni leni bi toatieba kuli. Li toanagili yaaba leni yaaba n den goadi ki fenli kuli den digibi leni ti jawaandi, ki tinga mo den digibi. U Tienu n den teni ke laa jawaanciandi cuo ba.

Isalele yaaba paadi Filisiti yaaba

¹⁶ Sayula doguudiba yaaba n den ye Gibeya, Benjamina diema ni, den laa ke Filisiti yaaba yadi ki tiini i kaani kuli.

¹⁷ Lanwani Sayula den yedi yaaba n ye leni o: «Coadi mani ki le yua n ñani ti siiga ki gedi.» Bi den coadi ki laa ke Jonatan leni yua n tugi o toatiadi ki ye likani.

¹⁸ Lane Sayula den yedi Ahiya: «Cuani U Tienu*ŋantaadikpaku ne.» To, laa yogunu U Tienu ŋantaadikpaku den ye Isalele yaaba siiga.

¹⁹ Sayula n den maadi leni o kopadiciamo yaa yogunu, ku fuugu den yabidi ki pugidi Filisiti yaaba toanagicianli nni. Sayula den yedi o kopadiciamo: «Fuadi a nuu.»

²⁰ Lanwani Sayula leni yaaba n den ye leni o kuli den taani ki gedi bu toabu po. Bi den sua ke Filisiti yaaba muudi bi lieba mu jugisiemu kelima li den gangi ba boncianla.

²¹ Li den sua ke Ebilu yaaba bi tianba ye Filisiti yaaba siiga ke li waagi ki ciani ba bi toanagili po. Bi den lebidi ki ŋa Filisiti yaaba ki goa ki taani leni Isalele toatieba, yaaba n den ye leni Sayula leni Jonatan.

²² Isalele yaaba siiga, yaaba mo n den wuoni Efilayima juana nni kuli n den gbadi ke Filisiti yaaba tiini ki bua ki cia, bimoko den fii ki ŋua ki deli ba ki pua ba.

²³ Yene ke Li Miali Diedo den faabi Isalele yaaba laa daali. Bu toabu den suagi hali ki pendi Beti-Afeni.

Isalele yaaba faabi Jonatan

²⁴ Laa daali Isalele toatieba den coagi ki laa fala kelima Sayula den kuani ba li kuali ki yedi: «Yua n dini jiema ke u yienu daa baa, ke n daa guani n yibalinba bi panpaani, ti solindi n yaa ye leni o.» Lane ke bi toatieba siiga oba kuli ki den dini jiema.

²⁵ Bi toatieba kuli den pundi li fuali nni, ti siadi n dua naani.

²⁶ Ban den kua li fuali yeni niinni bi den laa ke ti siadi cuudi. Ama oba kuli ki den taa ki gedini o ñoabu po kelima bi den fangi Sayula n den kuani ba yaa kuali.

²⁷ Ama Jonatan ki den bani o baa n kuani bi toatieba yaa kuali. Lane o den tandi wan kubi yaa gbiamu ki tu ti siadi nni ki taa ki gedini o ñoabu po. O nunbima den yendi.

²⁸ Bi toatieba siiga nni yendo den yedi o: «A baa kuani bi toatieba li kuali ki yedi: ‹Ti solindi n yaa ye leni yua dini jiema dinla kuli.› Lani n teni ke bi toatieba tadigi boncianla.»

²⁹ Jonatan den yedi: «N baa waani mi diema fala. Diidi ki le mani n nunbima n yendi maama kelima n leni ti siadi na waamu.

³⁰ I moamoani, bi toatieba yaa bi dini ban fie ti yibalinba kani yaala dinla, tii bi baa paadi Filisiti yaaba ki cie tin paadi ba maama na te?»

³¹ Laa daali bi den pua ki ku Filisiti yaaba ki cili Mikimasi ki pundi hali Ayalona. Bi toatieba den coagi boncianla.

³² Lane bi den bagili ban den fie yaala. Bi den taa i pe leni i ne leni a naabila ki kodi bikuli tiipo ki ŋmani leni mi soama.

³³ Lanwani bi den waani Sayula ki yedi: «Diidi ki le, bi toatieba tudi Li Miali Diedo po ki ŋmani ti nandi leni mi soama.» Sayula den yedi: «Yi miidi U Tienu kuali. Lanwani yin bindi mani moalamoala li tancianli ki cuani li ne.»

³⁴ O go den yedi: «Yin gaani mani bi toatieba nni ki waani ba ke yua kuli n cuani o nua yaaka o pia nekanba ki nan kodi o ki ŋmani. Yeni yi kan go ŋmani leni mi soama ki tudi Li Miali Diedo po.» Lane yua kuli den dadi o nua laa ñiagu ki kodi o li tancianli po.

³⁵ Sayula den maa li *padibinbinli Li Miali Diedo po. Lini n tie wan den kpa maa yaa padibinbinli Li Miali Diedo po.

³⁶ Sayula den yedi: «Tin fii mani yaa ñiagu n tie na ki jiidi ki baa Filisiti yaaba ki fie ba hali lan ban faa. Tin da ŋa bi siiga baa niyendo leni miali.» Bi toatieba den yedi: «Tieni ŋan sua maama kuli.» O kopadiciamo den yedi: «Cua mani ne tin buali U Tienu tin baa tieni yaala.»

³⁷ Lanwani Sayula den buali U Tienu: «Min fii ki jiidi ki baa Filisiti yaaba bi? A baa taa ba ki teni tinba Isalele yaaba nuu nni bi?» Ama laa daali U Tienu ki den guani o liba.

³⁸ Lane Sayula den yini ki taani bi yudanba kuli ki yedi: «Lingi mani ki bandi yaa tagili n tieni dinla.

³⁹ Hali Li Miali Diedo yua n faabidi Isalele yaaba po, baa li yaa tie n bijua n tieni laa tagili, o baa kpe.» Ama bi toatieba nni oba kuli ki den guani o liba.

⁴⁰ Lanwani o den yedi Isalele yaaba kuli: «Yikuli n taani mani poyendu, mini leni n bijua mo baa sedi poyendu.» Bi toatieba den yedi Sayula: «Tieni ŋan sua maama.»

⁴¹ Sayula den yedi Li Miali Diedo: «Fini Isalele yaaba Tienu, teni tin bandi i moamoani.» Lani tiatia den cuo Sayula leni Jonatan ke yaaba n sieni mo faabi.

⁴² Lanwani Sayula den yedi: «Go lu mani tiatia ki bandi mini leni n bijua Jonatan siiga lan tie yua.» Bi den luni ke li cuo Jonatan.

⁴³ Sayula den yedi Jonatan: «Waani nni ŋan tieni yaala.» Jonatan den yedi o: «N bi tu ti siadi leni min kubi yaa gbiamu ki leni waamu. Mini nna, n baa kpe.»

⁴⁴ Sayula den goa ki yedi o: «Jonatan, a baa kpe. A yaa kpe, U Tienu n cuo nni o cuonbiadu.»

⁴⁵ Lane bi toatieba den yedi Sayula: «Bee? Jonatan kan kpe de! Wani yua n cuani tinba Isalele yaaba po laa faabicianma n kpe? Kalam! Hali Li Miali Diedo po, baa o yudi yuyengu kan baa tiipo, kelima leni U Tienu paalu yo ke o soani dinla.» Li tie yene ke bi toatieba den faabi Jonatan ke waa kpe.

⁴⁶ Lanwani Sayula den cedi ki naa go ŋoadi ki deli Filisiti yaaba. Bimo den kuni bi denpo bi diema nni.

⁴⁷ Sayula n den dini li bali Isalele yaaba diema nni, o den caa i kaani kuli ki togidi leni o yibalinba kuli bu toabu, bani Moabi yaaba, leni Amoni yaaba, leni Edomi yaaba, leni Tisoba badiba, leni Filisiti yaaba kuli. Wan den gedi naankani kuli, o den paadi ba.

⁴⁸ O den koani mi jama ki paadi Amaleki yaaba ki faabi Isalele yaaba yaaba n den fenli ba kuli nuu nni.

⁴⁹ Sayula bijaba den tie Jonatan leni Jisifi leni Malikisua. O den pia bisiaba lie: o bisakpelo den yi Melabi, o lielo mo Mikali.

⁵⁰ Sayula pua den tie Ahimaatisi bisalo ki yi Akinoami. O guudikaaba yudaano den yi Abineli, o den tie Sayula baa naataanu Neli yaa bijua.

⁵¹ Sayula baa Kisi leni Abineli yaa baa Neli den tie Abieli yaa bijaba.

⁵² Sayula bali bina kuli o den togidi leni Filisiti yaaba bu toabu. Sayula yaa den laa gbanmandaano yua pia papaali kuli, o den yen taa ki kuani o o ŋantaadi nni.