1 Samueli 13 - Gourmanchéma Bible

¹ Sayula den pia bina..., wan den dini li bali yaa yogunu. O den die Isalele yaaba ke li pundi bina lie.

² Sayula den gandi Isalele yaaba siiga jaba tudataa (3 000). Jaba tudalie (2 000) den ye leni o Mikimasi dogu leni yaa juana n ye Betela dogu. Tudili mo den ye leni Jonatan Gibeya dogu ki ye Benjamina diema nni. Sayula den cabi yaa toatieba n sieni ke yua kuli kuni ki ban kua o gbandieli nni.

³ Jonatan den paadi Filisiti toagoli yaali n den ye Geba, ke Filisiti yaaba den gbadi. Lane Sayula den teni ke bi piebi kakacinba mi diema kuli nni ki waani Ebilu yaaba yaala n tieni.

⁴ Lane Isalele yaaba den gbadi ke Sayula paadi Filisiti yaaba toagoli ke bani Filisiti yaaba pala fii Isalele yaaba po. Lani yaa po bi den yini bi toatieba kuli ki taani Sayula kani Giligali dogu nni.

⁵ Filisiti yaaba den taani ki baa tuogi leni Isalele yaaba. Bi den pia toateliti tudili leni tandanba tudaluoba (6 000). A taacenda den yaba nani yaa tanbiima n ye mi ñincianma boanjaali po yeni. Bi den cua ki kpaa bi toanagili Mikimasi Beti-Afeni dogu puoli.

⁶ Isalele yaaba n den laa ke Filisiti yaaba mabini ba ke folu ki ye, bi den wuoni ti joaloandi nni leni ti tuudi nni, leni ti tanlondi nni leni ti faliti nni leni ti luakuondi nni.

⁷ Bi tianba mo den sani ki duodi Judana ki gedi Gada diema leni Galaadi yaama nni. Sayula da den baa ye Giligali. Yaa toatieba n den ye leni o kuli den jie hali ki digibi.

Sayula tudi ke U Tienu ŋa o

⁸ Sayula den guudi dana lele, Samueli n den bili yaa bianu. Ama Samueli naa den cua Giligali. Lane, bi toatieba siiga bi tianba den yayadi ki foagidi leni Sayula.

⁹ Lane Sayula den yedi: «Taa mani li *padijuukaali leni i tuondi yaa pada ki cuani mani ne.» Bi den cuani ke o padi li padijuukaali.

¹⁰ Wan li padi ki gbeni yaa yogunu, Samueli den nagini ki pundi ke Sayula ñani ki tuogi o ki biali o.

¹¹ Samueli den yedi: «A tieni be?» Sayula den yedi: «Min laa ke bi toatieba yadi ki foagidi leni nni, ke amo naa cua ŋan den bili yaa daali, ke Filisiti yaaba mo taani Mikimasi,

¹² n bungi n yama nni ke Filisiti yaaba baa jiidi ki baa nni Giligali ne hali ke n daa mia Li Miali Diedo *ŋanbili. Lane ke n paagi n pali ki padi li padijuukaali.»

¹³ Samueli den yedi Sayula: «A tieni mi yanpiima, ŋaa kubi Li Miali Diedo a Tienu n den teni a yaa ñoabonli. Li Miali Diedo bi baa teni a bali n yaa ye Isalele yaaba po hali yaa yogunu kuli.

¹⁴ Ama moala a bali kan waagi. Li Miali Diedo gandi oba o pali n bua yua ki bili ke laa ja n baa tua o niba yudaano kelima ŋaa kubi Li Miali Diedo n bili apo yaala.»

Bu toabu boginma

¹⁵ Lanwani Samueli den fii Giligali ki gedi yaa dogu n ye Benjamina diema nni ki yi Gibeya. Sayula den coadi yaa niba n ye leni o. Bi den pundi nani jaba kobiluoba.

¹⁶ Sayula leni o bijua Jonatan leni yaa toatieba n den ye leni ba den kali Geba dogu ki ye Benjamina diema nni. Filisiti yaaba mo den kpaa bi toanagili Mikimasi.

¹⁷ Yaa toagoli n fenli den ñani Filisiti yaaba toanagili nni. Toagoyenli den tagini yaa dogu n ye Ofili yaa sanu ki cuubi Suali diema.

¹⁸ Li naa toagoli mo den tagini Beti-Odoni dogu yaa sanu, li toagotaali mo den tagini yaa sanu n ŋua Isalele diema tinbianu a juana yula po, Tiseboyima joaloangu ki goa mi fanpienma po.

¹⁹ Li den sua ke baa maayendo ki ye Isalele diema nni, kelima Filisiti yaaba den yedi: «Tin da tuo Ebilu yaaba n maa mu jugisiemu bi a kpaana.»

²⁰ Lanwani Isalele yaaba siiga ja kuli den yen gedi Filisiti yaaba po yo ki toadi o naakuuli leni o yali leni o ceceli leni o moaciegu.

²¹ A naakuuna leni a yala toadima dunga den tie kujapienyenli boagidima taa, boagidima lie. A cecela mo yaa toadima leni ban deli i naakpakpaadi leni yaala naadima den tie kujapienyenli boagidima taa siiga boagidiyenma.

²² Li tie lani yaa po ke bu toabu daali yaa toatieba n den ye leni Sayula leni Jonatan, oba kuli ki den pia jugisiega bi kpaanli. Sayula leni o bijua Jonatan bebe n den pia.

²³ Filisiti yaaba toagola siiga toagoyenli den cua ki kpaa bi toanagili Mikimasi juali mabidima kani.