1 Samueli 12 - Gourmanchéma Bible

¹ Samueli den yedi Isalele yaaba kuli: «Diidi mani, n den tuo yin yedi nni yaala kuli ki dini yipo o bado.

² Moala diidi mani, o bado yua baa yaa gobidi yi. Mini wani di kpeligi ke n yudi mo pendi, n bijaba mo ye yi siiga. N den gobidi yi hali n jawaama yogunu ki pundi hali dinla.

³ To, mini nna. Yin doagidi mani ki waani Li Miali Diedo leni wan gandi yaa bado nintuali min tieni yaa tagili. N fie ŋme yaa naatonle? N fie ŋme yaa ŋunbo yo? N boandi ŋme? N mabini ŋme? N ga ŋme yaa kane li suuli ki pii n nuni ke min da le o tagili? N baa guani yi likuli.»

⁴ Bi den goa ki yedi: «Ŋaa boandi ti, ŋaa mabini ti, ŋaa ga oba kuli nuu nni liba mo.»

⁵ Samueli go den yedi ba: «Li Miali Diedo leni wan dini yua li bali tie siedinba ke yii laa n kani tagiliba kuli.» Bi den goa ki yedi: «Bi tie siedinba likuli po.»

U Tienu ŋanbidi yaaba n fangi o po

⁶ Lanwani Samueli den yedi bi niba kuli: «Li Miali Diedo tie n siedo, wani yua n den puogi Musa leni Alono ke bi ñani yi yaajanba Ejipiti nni.

⁷ Lanwani moala yin nagini mani Li Miali Diedo nintuali min bu leni yi. N baa tiadi yi wan tieni yipo yaa*ŋanbili kuli, yinba leni yi yaajanba.

⁸ Jakobo leni o niba n den kua Ejipiti nni ke bi den ti faligi ba, bi den mua ki mia U Tienu. O den soani Musa leni Alono ke bi ñani bani yi yaajanba Ejipiti nni ki cuani ba nekanba.

⁹ Ama bi den yuandi ki sundi Li Miali Diedo bi Tienu po. Lanwani o den teni ke Hasoli dogu yaa guudikaaba yudaano Sisela, leni Filisiti yaaba leni Moabi bado tuogi leni ba bu toabu ki paadi ba.

¹⁰ Lanwani bi didi den mua ki mia Li Miali Diedo ki yedi: ‹Ti tieni ti *tuonbiadi kelima ti ŋa fini Li Miali Diedo ki ŋoadi i *buli *Baali leni *Asitate. Ama ŋan go ga ti ti yibalinba nuu nni, lanwani ti baa yaa ŋua ŋa.›

¹¹ Lanwani Li Miali Diedo den soani Jelubaali leni Bedana leni Jefite leni Samueli, ki faabi yi yi yibalinba yaaba n den gaani ki lindi yi nuu nni. Lanwani yi den ye leni mi yanduanma.

¹² Ama yin den laa ke Amoni yaaba bado Nahasi tuogi leni yi bu toabu, yi den yedi nni: ‹A-a, ti bua ki baa o bado wan yaa die ti.› Yi den yedi yeni baa ke Li Miali Diedo yi Tienu den tie yi bado.

¹³ Lanwani yi bado nne, yin den gandi yua, yi den mia o bado ke Li Miali Diedo puni yi o.

¹⁴ Yi yaa fangi Li Miali Diedo ki ŋua o, yi yaa tuo wan yedi yaala ki naa yie o *balimaama, yi yaa taabi o, yinba leni yi bado yua n die yi, li bonla kuli baa yaa cuoni yipo bonŋanla.

¹⁵ Ama yi yaa tuo ki ŋua Li Miali Diedo yedima, yi yaa yie o balimaama, wani Li Miali Diedo nuu baa mabini yi nani wan den mabini yi yaajanba maama yeni.

U Tienu doagidi Isalele yaaba tudima

¹⁶ Moala yin sedi mani ne ki le Li Miali Diedo n baa tieni yaa bancianma yi nintuali.

¹⁷ Tii ye *ŋalikama ceyogunu kaa? Ki taaga n ki go mi yaa yogunu. N baa jaandi ki mia Li Miali Diedo, o baa soani ki taaga leni i tatantani. Lani yi baa bandi ke yi tudi boncianla Li Miali Diedo nintuali leni yin mia ban dini yipo o bado.»

¹⁸ Lanwani Samueli den jaandi ki mia Li Miali Diedo ke o soani ki taaga leni i tatantani laa daali. Bi niba kuli den jie Li Miali Diedo leni Samueli hali boncianla.

¹⁹ Bi niba kuli den yedi Samueli: «Mia Li Miali Diedo a Tienu tinba a naacenba po ke tin da kpe. Kelima tin mia ban dini tipo o bado yeni, ti tieni ti tuonbiadi ki pugini tin tieni yaa tuonbiadi kuli po.»

²⁰ Samueli den yedi bi niba: «Yin da jie mani. Li tie moamoani ke yi tieni laa biadima kuli. Ama yin da ŋa mani Li Miali Diedo. Yin yaa ŋua o mani leni yi pala kuli.

²¹ Yin da ŋoadi mani o puoli, kelima yi yaa ŋuadi o puoli, yi baa ŋoadi yaala n tie fanma fanma, yaala n kan todi yi, ki kan faabi yimo kelima li tie fanma fanma.

²² Kelima Li Miali Diedo yeli n pia yaa kpiagiciandi yaa po, o kan ŋa yi, kelima o den jagi o yama po ke yi baa tua o yaa niba.

²³ Mini mo, Li Miali Diedo n faabi nni min da tieni opo yaa tuonbiadi n tie na, lani n tie ki cedi ki kan yaa jaandi ki miadi o yipo. N baa yaa bangi yi yaa sanu n ŋani ki go tiegi.

²⁴ Bonyenla bebe n ye, yin yaa fangi mani Li Miali Diedo ki ŋua o moamoani leni yi pala kuli ki yaa faami wan den tieni yipo yaa bancianma po.

²⁵ Ama yi yaa tiendi mi biadima, yi baa bodi, yinba leni yi bado.»