1 Samueli 11 - Gourmanchéma Bible

¹ Amoni yaaba bado Nahasi den cua Isalele dogu Jabesi yu n ye Galaadi nni ki kpaa bi toanagili ki lindi u ki bua ki cuo u. Jabesi yaaba kuli den yedi Nahasi: «Cedi ti, ti baa tuo ki yaa tuuni apo.»

² Lanwani Amoni yua Nahasi den goa ki yedi ba: «N baa tuo ki cedi yi, ama se min fiadi yi jiennuni, ki teni Isalele yaaba kuli n le i fe.»

³ Jabesi nikpela den yedi o: «Pa ti dana lele tin soani a tonda Isalele diema nni kuli. Li yaa puoli oba kuli yaa cua ki baa todi ti, ti baa tuo ŋan diedi ti.»

⁴ A tonda den gedi ki ban pundi Sayula dogu Gibeya, ki togidi laa maama bi niba kuli kani, ke bi niba kuli den buudi boncianla.

⁵ Li sua ke Sayula da ñani u kuanu ki ŋua o ne puoli. O den yedi: «Be n pia bi niba ke bi buudi?» Bi den togidi o Jabesi yaaba n yedi yaala.

⁶ Sayula n den gbadi laa bonla, U Tienu Fuoma den diedi o ke o pali fii boncianla.

⁷ O den taa naakpakpaadi lie ki jia ba bonjenajena ki teni a tonda ke bi gedini Isalele diema nni kuli ki yedi: «Yua n kaa ŋoadi Sayula leni Samueli puoli, bi baa tieni o nani ban tieni i naa ne maama.» Li Miali Diedo den teni ke ti jawaanciandi cuo bi niba kuli ke bikuli den taani ki fii bu toabu po nani niyendo yeni.

⁸ Sayula den coadi ba Beseki dogu nni. Isalele yaaba den pundi tudakobitaa (300 000), Juda yaaba mo tudapiitaa (30 000).

⁹ Bi den yedi yaa tonda n den cuani u tondu yeni: «Yin ban waani Galaadi dogu Jabesi yaaba ke saala u yensicocolu bi baa baa mi *faabima.» A tonda n den gedini laa laabaalo, Jabesi yaaba pala den mangi.

¹⁰ Jabesi yaaba den yedi Amoni yaaba: «Saala ti baa ña ki cua yipo yin tieni ti yin bua maama.»

¹¹ Li dalieli Sayula den boagidi o toatieba toacaga taa. Lan den nagidi faama, bi den kua Amoni yaaba toanagili nni ki kpaani ba hali ki pundi u yensicocolu. Yaaba n den sani ki cia den yayadi hali ke oba kuli ki go den yegi leni o lielo.

¹² Isalele yaaba den yedi Samueli: «Ŋmenba n den yedi ke Sayula kan diedi ti yeni? Ban teni ti laa niba tin kpa ba.»

¹³ Sayula den yedi: «Bi kan ñani oba kuli miali yaa daali n tie na, kelima dinla Li Miali Diedo cuani mi faabima Isalele yaaba po.»

¹⁴ Samueli den yedi bi toatieba: «Cua mani tin gedi Giligali ki go doagidi ki kadi ke Sayula tie yudaano.»

¹⁵ Bi niba kuli den gedi Giligali ki go ban dini Sayula li bali Li Miali Diedo nintuali likani. Giligali yeni bi den padi i tuondi pada Li Miali Diedo nintuali. Sayula leni Isalele jaba kuli den mangi bi pala hali boncianla likani.