1 Samueli 10 - Gourmanchéma Bible

¹ Samueli den taa yaa tiagu n pia mi kpama ki wuli Sayula yuli po. O den gobini o ki yedi: «Li Miali Diedo gagidi ki dini a li bali ŋan tua o niba yudaano.

² A yaa ñani ne ki kuni ki ban pundi Selisa dogu yu n ye Benjamina tinga bianu, a baa le jaba lie Lasela kuli kani. Bi baa yedi a: ‹Ŋan den fii ki gedi ki baan lingi yaa ŋunbi yeni, bi laa ba. A baa naa go yagini o yama i ŋunbi wani yaa po. O yama di yagini yi yaa po yo, ke o buali o yuli wan baa tieni maama ki le o bijua.›

³ A yaa ñani lankani ki suagi liiga ki ban pundi Taboli ticianbu, a baa tuogi leni jaba taa ke bi caa Betela U Tienu diegu po. Bi siiga yendo baa yaa kubi ŋuabila taa, o lielo dupen bonba taa, o taalo mo duven dayuagu.

⁴ Bi baa fuondi a ki pa ŋa dupen ŋan ga.

⁵ Li yaa puoli a baa pundi Gibeya-Eloyimi, Filisiti yaaba n pia li toanagili naankani. A yaa kua laa dogu nni, a baa tuogi bi sawalipuaba bongoli ke bi ñani ban padi a pada yaa juali po. Yaaba n pua ti kogiditi leni a gangaana, leni ti kogidiciandi, leni yaaba n piebi mu yelimu baa yaa ye bi liiga. Bani U Tienu sawalipuaba yeni baa yaa pua sawali.

⁶ Wani Li Miali Diedo Fuoma baa kua a niinni ki diedi a ke a baa taani leni ba ki yaa pua sawali. O baa lebidi a ŋan tua nitoa.

⁷ Laa sinankeeninba kuli yaa tieni ki gbeni, ŋan tieni ŋan sua ke li pundi ŋan tieni yaala kelima U Tienu ye leni a.

⁸ Li yaa puoli ŋan kua n liiga ki gedi Giligali. N baa yuandi ki ŋoadi a lipo ki padi a padijuukaana leni i tuondi yaa pada U Tienu po. Ŋan guudi nni dana lele hali min cua ki waani a ŋan baa tieni yaala.»

⁹ Sayula n den jigidi ki baa paadi leni Samueli yaa yogunu, U Tienu den puni o yantiatoali. Laa sinankeeninba kuli den tieni laa daali.

¹⁰ Sayula leni o naacemo n den pundi Gibeya yaa yogunu, yaa nigoli n tie sawalipuaba den tuogi ba. U Tienu Fuoma den kua o niinni ke o moko den pua sawali bi siiga.

¹¹ Yaaba n den kpa bani o kuli n den laa ke o taani leni bi sawalipuaba ki pua sawali, bi den yedi biyaba: «Be n tieni Kisi bijua? Naani wani Sayula moko tie bi sawalipuaba siiga yua yoo?»

¹² Gibeya yaaba siiga yendo den goa ki yedi: «Ŋme tie bi baa?» Li tie lani yaa po ke bi pua mi kpanjama ki yieni: «Sayula moko tie bi sawalipuaba siiga yua yoo?»

¹³ Sayula n den pua sawali ki gbeni, o den gedi ban padi naani li juali po.

¹⁴ Sayula baa naataanjaga den yedi Sayula leni o naacemo: «Yi den gedi le?» Sayula den goa ki yedi: «Ti den gedi ki baan lingi i ŋunbi, ki naa laa ba, lanwani ti den gedi Samueli po.»

¹⁵ Sayula baa naataanjaga den goa ki yedi: «Togidi nni Samueli n den yedi yi yaala.»

¹⁶ Sayula den goa ki yedi o: «O den waani ti ke bi laa i ŋunbi.» Ama Sayula ki den waani o Samueli n yedi o yaala li bali po.

Bi toani tiatia ke o cuo Sayula wan tua o bado

¹⁷ Samueli den yini Isalele yaaba ke bi taani Mitisipa Li Miali Diedo nintuali.

¹⁸ O den yedi Isalele yaaba: «Li Miali Diedo, Isalele yaaba Tienu yedi mine: ‹N den ñani yinba Isalele yaaba Ejipiti diema niinni. N den faabi yi Ejipiti yaaba leni yaa nibuoli n den faligidi yi kuli yaa nuu nni.

¹⁹ Dinla yi yie ki ŋa mini yi Tienu, yua n faabi yi leni yi fala leni yi yepaama kuli, ki yedi nni: Dini tipo o bado. Lanwani yin nagini mani Li Miali Diedo nintuali ki sedi ki caligicaligi, yua kuli o buolu o buolu leni o diegu o diegu.› »

²⁰ Samueli den teni ke Isalele buoli kuli nagini ke U Tienu den gandi Benjamina yaa buolu.

²¹ O den teni ke Benjamina buolu nagini, yua kuli leni o niba, ke U Tienu gandi Matili yaa diegu. Laa diegu yaaba den nagini ke U Tienu gandi Kisi bijua Sayula. Bi den lingi o ki naa laa o.

²² Bi go den buali Li Miali Diedo ki yedi: «O nilo yeni cua ti siiga bii?» Li Miali Diedo den goa ki yedi: «Diidi, o wuo ti tiadi nni.»

²³ Bi den sani ki ban ñani o ti tiadi nni ki cuani o ke o sedi bi niba siiga. O den caadi bikuli li yuli.

²⁴ Samueli den yedi bi niba kuli: «Yi nua Li Miali Diedo n gandi yua? Yinba Isalele yaaba kuli siiga yua naani leni o kuli ki ye.» Bi niba kuli den kpaani ki yedi: «U Tienu n pa o bado li miafoagili.»

²⁵ Lanwani Samueli den waani bi niba kuli o bado n baa yaa die leni yaa bali. O den diani la li tili nni ki bili li Li Miali Diedo nintuali. Li yaa puoli o den cabi bi niba kuli ke yua kuli kuni o denpo.

²⁶ Sayula den kuni o denpo Gibeya. Bi nitianba den yegi leni o, U Tienu n den maadi leni yaaba yaa pala.

²⁷ Ama bi nibiadiba den ye yaaba n yedi: «Joo! One n baa faabi ti?» Bi den fali o kaa cuani opo paabu. Ama Sayula ki den taa la ki kuani o yama nni.