1 Pieri 3 - Gourmanchéma Bible

¹ Yinba bi puoba mo, yin yaa miindi yi yula yi ciaba kani, ke bi siiga tianba yaa tuo U Tienu maama, yi tagi n tie maama n teni ban tuo ki daani, baa ke yii maadi ba maamaba kuli,

² ama kelima bi nua yi tagi n ŋani ki go pia li fangili maama.

³ Yi ŋamu n da ŋua yin sibidi yi gbanandi maama, ki piani yi yudi, ki go bobi yaa jafantiadi n tie wula leni yaa tiayiekaadi n ŋani ki pendi ka.

⁴ Ama lan yaa tie yaa ŋamu n wuo yi pala nni ki kan yindi, lani n tie mi dingima leni mi yansoangima, U Tienu n nua yaama ke mi pia mayuli boncianla.

⁵ Kelima yaa puoba n den ye hali yogu ki den bili bi suginma U Tienu kani den maani ki sibidi biba yene, ki miindi bi yula bi ciaba kani,

⁶ nani Sala n den tiendi maama. O den tuodi ki ŋua Abalahama maama ki yi o o diedo. Yi tie Sala puoliŋuani moala, yi yaa tiendi yaala n ŋani, kaa tuo ke jawaandiba kuli cuo yi.

⁷ Yinba bi podanba moko, yua kuli n yaa ye leni o pua leni mi yanfuoma, ki yaa faami ke bi tadi ki cie. Yin yaa jigindi ba, kelima bi moko taa leni yi ki baa U Tienu kani li *ŋanbili leni li miali. Yin yaa tiendi mani yeni ke liba kuli n da pigini yi jaandi.

Yaaba n tiendi mi teginma ki laadi fala lipo

⁸ N tundijuodike n tie ne. Yikuli n yaa pia mani yantiayenli leni yiyaba, ki yaa gba mani yiyaba po mi niñima, ki gbie leni mi buama yi kpiiba po, ki go yaa pia mi niñingbadima leni li yumiinli yiyaba po.

⁹ Yin da guani oba kuli o biadima, ki da sugi ki guani oba. Ama yin gaali, kelima U Tienu den yini yi lani yaa po ke yi mo n baa o kani li seli.

¹⁰ Kelima li diani: «Yua n bua ki yaa ye ki pia li pamanli, Ki go bua ki le yaa miali dana n ŋani, Wan kubi o lanbu leni mi biadima, Ki kubi o ñoacuuna mo leni i boandi maama.

¹¹ Wan foagidi leni yaala n bia ki yaa tiendi yaala n ŋani, Ki lingi mi yanduanma ki yaa ŋua ma.

¹² Kelima o Diedo nuni nua bi niteginkaaba, O tuba mo cengi bi jaandi. Ama o Diedo fii ki se yaaba n tiendi mi biadima po.»

¹³ Yi yaa pia li yankuali ki tiendi yaala n ŋani, ŋme baa waani yi fala?

¹⁴ Li pamanli ye leni yi baa bi yaa waani yi fala yin tiendi yaala n ŋani yaa yogunu mo. Yin da jie mani bi nisaaliba baa waamu, ki da yagi yi yama.

¹⁵ Yin yaa jigindi mani Kilisiti yi pala nni wani yua n tie o Diedo. Yin bogini mani ke yogunu kuli bi yaa buali yi yin pia yaa suginma, yin fidi ki doagidi ki waani ba.

¹⁶ Ama lan yaa tie leni mi dingima leni li fangili. Yaa pia mani yaa pali siedi n ŋani, lani, baa bi yaa sugidi yi ki kuli yi ke yi tie i tagili danba, yaaba n sugidi yin pia yaa tagiŋami Kilisiti nni yeni n le i fe.

¹⁷ Li yaa tie ke U Tienu n bua yin le fala, kelima yi tiendi yaala n ŋani, li cie yin le o kelima yi tiendi yaala n bia.

¹⁸ Kilisiti moko den laa fala yenma ti *tuonbiadi po ke li dagidi u yogunu kuli po. Wani yua n tiegi den kpe yaaba n ki tiegi po, ke wan gobidi ki gedini yi U Tienu kani. O den kpe ti gbanandi po, ama o den goa ki baa li miali kelima mi Fuoma po.

¹⁹ Li tie leni laa Fuoma yaa paalu po ke o den gedi ki ban waani U Tienu maama yaa naani ban ye li kpaadidieli nni.

²⁰ Hali yogu bi den fiini mi yiema U Tienu po, ke o den juuni leni ba ke li waagi. Li den tie Nowe n den kpie ku ñinbiaciangu yaa yogunu. Bi niba waamu, lan tie niba nii, yaaba n den kua ku ñinbiaciangu yeni niinni ki faabi leni mi ñima.

²¹ Mi ñima yeni den tie yaa *batisima n faabi yi moala yaa nannanli. Laa tie ke mi batisima ŋuudi ki ñani ti gbanandi*joagindi ka, li tie yaa nilo n puni o yuli U Tienu leni yaa pali siedi n ŋani. Yi baa ki faabi kelima Jesu Kilisiti fiima bi tinkpiba siiga yaa po.

²² Jesu kua tanpoli po ki ye U Tienu jienu, ki die malekinba, li bali danba leni tanpoli paaciami danba kuli.