1 Korenti 6 - Gourmanchéma Bible

¹ Yi siiga ŋme n baa tuo ki gedini o lielo ŋanduna yaaba, yaaba n ki daani bujiali kani? O yaa pia maama leni o lielo, waa baa gedini ma bi nigagidiŋanba kani?

² Yii bani ke bi nigagidiŋanba baa jia ti buudi leni ŋanduna yoo? Lanwani li yaa tie ke yi baa jia ti buudi leni ŋanduna yi baa gbali ki jia ti buwaadi bii?

³ Yii bani ke ti baa jia ti buudi leni malekinba yoo? Lanwani laa pia kuli tama ke ti baa fidi ki jia ti buudi yaa jamaano n tie na yaa maama po.

⁴ Lanwani yi yaa pia o naa jamaano yaa maama leni yiyaba, yi yen taa Kilisiti n yini yaaba n ki pia leni yaaba ŋantaado yene ban tua yi bujiaba.

⁵ N yedi yeni ki bua i fe n cuo yi. Naani yii pia yi siiga baa niyendo yua n pia mi yanfuoma ki baa fidi ki jia ti buudi o kpiiba siiga?

⁶ Naani yi siiga yua n pia mi maama leni o kpiilo baa gedini o ti buudi po, yaaba n kaa daani kani yo?

⁷ Baa yin pia ti buudi leni yiyaba yeni, li doagidi yi gbalima. Laa baa ŋani ki cie yin juuni leni yi kpiiba n tieni yi yaa bonbiadila kaa? Laa baa ŋani ki cie yin tuo ban je yi kaa?

⁸ Ama yinba n tiendi laa bonbiadila, ki di nitoaba, bani yaaba n tie yi kpiiba yeni.

⁹ Yii bani ke yaaba n ki tiegi kan ba biinu *U Tienu diema nni yoo? Yin da boandi yi yula. Yaaba n tiendi ti cagindi, leni i buli danba, leni mi conconma danba, leni yaaba n biidi bi yula, leni yaa jaba n taagi leni biyaba kuli,

¹⁰ leni a concona, leni bi ŋaliŋabuaba, leni a dañogaada, leni a nisugida, leni yaaba n di bi lieba, kuli kan baa biinu U Tienu diema nni.

¹¹ Yi siiga bi nitianba den tie laa nibuolu, ama U Tienu ŋuudi yi o gagidi yi ki puni yi li *moamoansaali o Diedo Jesu Kilisiti yeli po leni ti Tienu Fuoma tuonli po.

A gbanandi n yaa ye o Diedo kpiagidi po

¹² Bi tianba yi siiga tua: «Mii go kua liba,» ama li bonla kuli ka ŋani. N baa fidi ki yedi: «Mii go kua liba kuli,» ama n kan tuo liba kuli n diedi nni.

¹³ Yi go tua: «Mi jiema ye ku tugu po, ku tugu mo ye mi jiema po.» U Tienu baa ti bolini likuli yenma. Ama ti gbanandi naa ye mi conconma po ka, ti ye o Diedo yaa po, o Diedo mo ye ti gbanandi yaa po.

¹⁴ U Tienu, yua n den fiini o Diedo bi tinkpiba siiga, o go baa fiini ti mo kelima o paalu yaa po.

¹⁵ Yii bani ke yi gbanandi tie Kilisiti gbananbuoli ka yoo? Naani n baa taa Kilisiti gbananbuoli ki teni yin tua li poconconli gbananbuoli bi? Kalam.

¹⁶ Yii bani ke yua n taani leni li poconconli tua gbananyendi leni o kaa? Kelima li diani: Bani niba lie baa tua gbananyendi.

¹⁷ Yua n taabi o Diedo tua yendo leni o.

¹⁸ Yin sani ki foagidi mani leni mi conconma. Tuonbiatoadi kuli ye ti gbanandi niinpo, ama yua n puni o yuli mi conconma po, tudi o gbanandi po yo.

¹⁹ Yii bani ke yi gbanandi tie U Tienu Fuoma Yua dieli, yua n ye yi niinni, U Tienu n puni yi yua ke yii go die yi yula?

²⁰ Moamoani o da yi leni yaa dunga n pa. Lanwani yin yaa kpiagidi mani U Tienu yi gbanandi nni lani yaala n tie U Tienu n die yaali.