1 Korenti 5 - Gourmanchéma Bible

¹ I kaani kuli bi niba tua ke mi conconma ye yi siiga, yaa conconma buolu n kaa ye baa bi nilanba siiga. Lani n tie ke yi siiga o niyendo ye leni o baa pua.

² Ama baa yeni, yi gbengidi yi yula, kaa biidi yi pala ki mua nani i kumoe yeni ki ñani yi siiga yua n tieni laa cagindi.

³ Mini yaa po, baa ke n foagi leni yi n gbanandi nni, n ye leni yi n yantiali nni. N mali ki jia yua n tieni laa bonla yeni buudi nani n ye leni yi yeni.

⁴ O Diedo yeli nni leni o paalu po, yikuli yaa taani, ke n moko ye leni yi n yantiali nni,

⁵ yin teni laa nilo Sutaani, ke wan bolini o gbanandi ke o naano n tindi o Diedo Jesu n baa cua yaa daali.

⁶ Yin gbengidi yi yula maama, laa ŋani. Yii bani ke li*dabinli waamu bebe baa teni ti yonbudi kuli n pili yoo?

⁷ Yin ñani mani yi siiga li dabinkpeli, ki tua nani ti yonbupandi yaadi n ki pia dabinli yeni. Moamoani yi tie laa yonbudi, kelima Kilisiti yua n tie ti *Pendima jaanma pebiga padi no.

⁸ Lanwani tin jaani laa jaanma ke laa tie leni li dabinkpeli lani tie mi conconma, ama leni yaa dupen n ki pia dabinli lani n tie li papienli leni i moamoani.

⁹ N den diani yipo li tili ki waani yi ke yin da pia ŋantaado leni mi conconma danba.

¹⁰ Mii baa ke yin da pia ŋantaado baa kuli leni ŋanduna yaaba, yaaba n tie mi conconma danba, leni bi ŋaliŋabuaba, leni yaaba n bua ki yaa di bi lieba, leni yaaba n ŋua i buli, kelima li yaa tie yeni kali yin nan ña ŋanduna nni.

¹¹ Min den diani ki bua ki waani yi yaala tie line: yin da pia ŋantaado leni yua n yedi ke o tie yi kpiilo ki nan conbi, yaaka ki tie ŋaliŋabualo, yaaka yua n ŋua i buli, yaaka o nisugido, yaaka o dañogaado yaaka yua n bua ki yaa di o lieba. Yin da tuo baa ki taani ki je leni laa nibuolu.

¹² Naani li tie mini yaa ŋantaado yo ki jia ti buudi leni niinpo yaaba? Laa tie yi siiga nni yaaba yaa buudi ka ke yi baa jia?

¹³ Ama niinpo yaaba U Tienu baa jia leni ba ti buudi. Deli mani ki ñani o nibiado yi siiga.