1 Korenti 2 - Gourmanchéma Bible

¹ N kpiiba, min den cua yikani yaa yogunu ki wangi yi U Tienu moamoani yi duagi, mii den cua leni mi mabanma, bi leni mi yanfocianma ka.

² Kelima n den jagi ki sua ke laa tie tiladi min bandi bontoala kuli yi siiga, kali Jesu Kilisiti, ban den kpaa wani yua li*dapoanpoanli po yeni.

³ N den ye yi siiga leni ku tadingu ki digibi kelima ti jawaandi po.

⁴ N mawangima leni n bangima naa den ŋua bi nisaaliba mabanma ka. Ama li den tie leni *U Tienu Fuoma leni o paaciamu doagidima yaa po,

⁵ ke yi *dandanli n da se kelima bi nisaaliba yanfuoma po, ama U Tienu yaa paaciamu po.

U Tienu yanfuoma maama fuuli

⁶ Baa yeni, ti wangi yaa maama n tie mi yanfomaama yaaba kpeligi ki dagidi li dandanli po yaa siiga. Laa yanfuoma naa tie o naa jamaano yaama ka, laa tie ŋanduna bali danba yaaba n ye mi bodima sanu nni yanfuoma mo ka.

⁷ Ti wangi U Tienu yaa yanfuoma maame, yaama n duagi ki wuo bi nisaaliba po, U Tienu n den tuodi ki bili yaama ke man yaa tie tipo ti kpiagidi.

⁸ Ŋanduna bali danba siiga oba kuli naa den bani laa yanfuoma. Bi yaa den bandi ma, bi kan den kpaa ti kpiagiciandi Diedo li dapoanpoanli po.

⁹ Nani lan diani ki yedi maama: «Nunbu n daa laa yaala, Tubili n daa gbadi yaala, O nisaalo n daa kpaagi yaala mo, U Tienu tuodi ki ŋanbi lankuli Yaaba n bua o yaa po.»

¹⁰ U Tienu teni ke o Fuoma doagidi la tinba yaa po. Kelima o Fuoma bigidi li bonla kuli, baa U Tienu yanjaga ya n wuo ki ñua.

¹¹ Bi nisaaliba siiga ŋme bani o nisaalo pali tugu nni bonla, li yaa tie o nisaalo yantiaceli yaali n ye o niinni? Likuli yenma leni U Tienu. Oba kuli ki bani U Tienu pali tugu nni bonla, kali U Tienu Fuoma.

¹² Tinba, tii baa ŋanduna yantiali, ama ti baa yaa Fuoma n ñani U Tienu kani, ke tin fidi ki bandi U Tienu n puni ti yaala kelima o *ŋanbili po.

¹³ Tii maadi laa bonla nani mi nisaali-yanfuoma n bangi yaala ka, ama nani o U Tienu Fuoma n bangi ti yaame ki doagidi li moamoani yaaba n pia U Tienu Fuoma po.

¹⁴ Ama li nisaali-yantiali n die yua, kan fidi ki ga yaa bonla n ñani U Tienu Fuoma kani, kelima li tie opo yanluobonla. O kan bandi la kelima li bigidi leni U Tienu Fuoma Yua yaa yantiale.

¹⁵ U Tienu Fuoma Yua yantiali n diedi yua bigidi li bonla kuli. Ama oba kuli kan fidi ki biigi ki bandi wani.

¹⁶ Li diani: «Ŋme bani o Diedo yantiali? Ŋme baa fidi ki bangi o?» Ama, tinba ti pia Kilisiti yaa yantiali.