1 Korenti 12 - Gourmanchéma Bible

¹ N kpiiba, yaala n tie U Tienu Fuoma paabu yaa po, mii bua lan yaa boani yi.

² Yi bani ke yin den tie nilanba yaa yogunu, yi den tuodi ke bi dia ki caani yi i buli yi n ki maadi po.

³ Lanwani n kadi ki waani yi ke U Tienu Fuoma n gobidi yua kuli kan yedi: Jesu tie ti solindi yua, oba kuli mo kan yedi: «Jesu n tie o Diedo,» kali U Tienu Fuoma Yua gobidi o.

⁴ Bu paabu buoli yaba, ama Fuoma Yua yendo n puuni likuli.

⁵ I todibuoli moko yaba ama o Diedo yua n die likuli tie yendo.

⁶ I tuonbuoli yaba, ama U Tienyendu n tuuni laa tuona kuli bi niba kuli nni.

⁷ Yua kuli baa U Tienu Fuoma doagidima li nitaanli kuli todima po.

⁸ O Fuoma puni niyendo mi yanfomaama. Mi Fuoma yenma yeni go puni nitoa mi bandima maama.

⁹ Mi Fuoma yenma yeni n puni niyendo li *dandanli, ki go puni nitoa mo wan yaa paagidi a yiama.

¹⁰ O puni niyendo ke o baa fidi ki yaa tiendi mi bancianma, ki go puni nitoa ke o baa fidi ki yaa wangi U Tienu maama, ki puni nitoa goga U Tienu Fuoma leni mu cicibiadimu gagidima paabu. O puni mi malanma paabu ki go puni nitoa mi malanma soaginma paabu.

¹¹ Laa Fuoma yenma n tuuni laa bonbuoli kuli, ki puuni nilo kuli oba nani wani oba n bua maama.

Gbananyendi leni ti buoli

¹² Kelima, nani ti gbanandi n tie yenma ki nan pia yaa gbananbuoli n yaba maama, ama baa ke ti buoli yaba yeni, tikuli taani ki tie gbananyendi. Li moko tie yene leni Kilisiti.

¹³ Tikuli den *batisi mi Fuoma yenma yeni yaa niinni, ke tin tua gbananyendi, lan tie Jufinba leni bi nilanba, lan tie i yonbi bi yaaba n die bi yula, U Tienu puni tikuli ke ti baa ki ñuni Fuoma yenma yaa kani.

¹⁴ Lani yaa po, ti gbanandi naa tie gbanan-buoyendu bebe ka ama gbananbuoli boncianla.

¹⁵ Li yaa tie ke li taali yedi: «Min ki tie nuu yeni, mii taa ti gbanandi nni,» lani kan teni ke li kaa taa ti gbanandi nni.

¹⁶ Li yaa tie ke li tubili mo yedi: «Min ki tie nunbu yeni, mii taa ti gbanandi nni,» lani kan teni ke li kaa taa ti gbanandi nni.

¹⁷ Li yaa tie ke ti gbanandi kuli bi tie nunbu bebe, mi gbadima bi baa ye le? Bi tikuli yaa bi tie tubili bebe, ti baa gba u nuulu lede?

¹⁸ Moamoani U Tienu bili gbananbuolu kuli uba uba ti gbanandi nni nani wan bua maama.

¹⁹ I gbananbuoli yeni kuli yaa bi tie gbanan-buoyendu bebe, ti gbanandi bi baa ye le?

²⁰ To, baa ke i gbananbuoli yaba, ti gbanandi tie gbananyendi.

²¹ Lanwani bu nunbu naa pia sanu ki yedi u nuu: «Mii pia leni a ŋantaado.» Li yuli mo naa pia sanu ki yedi a taana: «Mii pia leni yi ŋantaado.»

²² Ama yaa gbananbuoli n naani ke i tadi ki cie moko tie tiladi.

²³ Yaa gbananbuoli n kaa pia jigidi ti gbanandi nni, ti jigindi ti boncianla. Yaa gbananbuoli n kaa pia jawaama, ti tiani ipo ki kubi i leni li fangili,

²⁴ yaa gbananbuoli n pia mi jawaama mo, yii bua puginma. U Tienu den tagi ti gbanandi ki taani ti buoli, ki teni ke yaa gbananbuoli n kaa pia jigidi n baa ti jigidi ki pugini.

²⁵ O den tieni yeni ke mi paadima n da ye ti gbanandi nni, ama gbananbuoli kuli n yaa bua ki todi iyi yenma.

²⁶ Gbanan-buoyendu yaa laadi fala, i gbananbuoli kuli taani leni u laa fala nni. Gbanan-buoyendu yaa baa ti jigidi, i gbananbuoli kuli mangi i pala leni u.

²⁷ Yinba kuli taani ki tie Kilisiti gbanandi, yi siiga yua kuli tie o gbananbuoli.

²⁸ U Tienu kpa bili Kilisiti n yini yaaba siiga, bi tondiba, miliema bi mawangikaaba, mi taama bi bangikaaba. Li yaa puoli li pia yaaba n tiendi mi bancianma, tianba ke bi baa paagidi a yiama, tianba mi todima paabu, bi tianba mi gobidima paabu, tianba malanma maama paabu.

²⁹ Bikuli tie tondiba bi? Bikuli tie mawangikaaba bi? Bikuli tie bangikaaba bi? Bikuli tiendi mi bancianma bi?

³⁰ Bi bikuli baa a yiama paagima paabu yoo? Bi ki maadi mi malanma yoo? Bi ki fidi ki soagindi mi malanma yoo? Yeni ka.

³¹ Lanwani yin yaa bua mani yaa paabu n ŋani ki cie. N go baa waani yi yaa sanu n ŋani ki cie likuli.