1 Korenti 11 - Gourmanchéma Bible

¹ Yin yaa ŋua mani n fuuli nani min ŋua Kilisiti fuuli maama.

Bi puoba yula yilima

² N pagi yi kelima yi tiani npo li bonla kuli nni, ki go ŋua min den bangi yi yaa bangima mo.

³ Baa yeni n bua yin bandi ke Kilisiti tie ja kuli yudaano, o ja mo tie o pua yudaano, U Tienu mo tie Kilisiti yudaano.

⁴ Yaa ja n jaandi bi ki wangi U Tienu maama ki ciibi kuli, o jigidi o yudaano.

⁵ Ama yaa pua n jaandi bi ki waani U Tienu maama ki naa yili, o jigidi o yudaano. Likuli yenma leni wan kuo o yudi.

⁶ O pua yaa kan yili, wan moagi o yudi. Ama i fe yaa pia o pua wan kuo o yudi, bi wan moagi ti, li pundi wan yili.

⁷ Laa pundi o ja n yaa ciibi, kelima o tie U Tienu nannanli leni o kpiagidi. O pua mo n tie o ja yaa kpiagidi.

⁸ Moamoani, o ja naa den ñani o pua niinni, ama o pua n den ñani o ja niinni.

⁹ U Tienu naa den tagi o ja kelima o pua po ka, ama o den tagi o pua kelima o ja yaa po.

¹⁰ Lani yaa po, leni malekinba yaa po, li pundi o pua n yili.

¹¹ Yaala n tie o Diedo nni yaa po, o pua yema kan dagidi se ja n yaa ye, o ja mo yema kan dagidi se pua n yaa ye.

¹² Kelima nani o pua n den ñani o ja niinni maama, likuli tie yenma leni moala, ja kuli mali kelima o pua po, ama li bonla kuli ñani U Tienu kani.

¹³ Yinba yiba n biigi mani ki le li yaa ŋani ke o pua n jaandi U Tienu kaa yili.

¹⁴ Naani mi tagima mani miba ki wangi ke o ja yaa pia ti yuciandi, ke li pia i fe?

¹⁵ Ama o pua wani yaa pia ti yuciandi, li tie opo ti kpiagidi, kelima U Tienu puni o ti yuciandi tin yaa tie opo nani li cabiyilikaali yeni.

¹⁶ O nilo yaa bua ki nia laa maama, wan bandi ke tinba leni U Tienu n yini yaaba kuli siiga, tii pia laa bogidili.

Ti Diedo jiema maama

¹⁷ Yaa maama n baa ŋua yaa po, mii pagi yi ba, kelima yi yaa taani laa ŋanbi yipo liba, li biidi yi bebe.

¹⁸ Min da baa kpa maadi yi yaala tie ke n gba ke yi yaa taani mi paadima ye yi siiga. N daani li waamu

¹⁹ kelima li tie tiladi ke mi paadima n yaa ye yi siiga, ke yaaba n se i moamoani nni n doagidi.

²⁰ Yi yaa taani, li naa tie o Diedo jiema po ka ke yi taani.

²¹ Kelima yi yaa kali ki baa je, yua kuli yen cili ki yaa di wani oba yaa jiema kaa gu o lieba, ke mi koma pia tianba, ke tianba mo ñu hali ki gaadi.

²² Yii pia yi denpo yin baa di ki go ñu naani yoo? Bi yi fali U Tienu n yini yaaba, ki fiagi bi siiga yaaba n ki pia liba yoo? Min yedi yi lede? Min pagi yi bi? N kan pagi yi lani yaa po.

²³ Kelima n den baa o Diedo kani min bangi yi yaala. Ban den janbi o yaa ñiagu, o den taa dupen

²⁴ ki tuondi U Tienu, ki cabidi ki yedi: «Line n tie n gbanandi yaadi n cabidi yipo. Yaa tiendi mani yeni ki tiani npo.»

²⁵ Ban den dini ki gbeni yaa yogunu, o den taa ki tadiñokaaga ki yedi: «Yaa tadiñokaaga n tie na tie o *ŋantaadipaano yua n kua kelima n soama yaa po. Yaa tiendi mani yeni ki tiani npo yin baa ñu yaa yogunu kuli.»

²⁶ Lanwani yaa yogunu kuli ke yi ŋmani dupen ki go ñuni ki tadiñokaaga nni na, yi wangi o Diedo kuuma, hali wan go baa cua.

²⁷ Lani yaa po yua n ŋmani o Diedo dupen ki go ñuni o Diedo tadiñokaaga nni kaa dagidi, o pia i tagili o Diedo gbanandi leni o soama po.

²⁸ Lanwani nilo kuli n kpa biigi o yuli, lani yaa puoli wan ŋmani laa dupen ki go ño laa tadiñokaaga.

²⁹ Kelima yua n ŋmani ki go ñuni ki naa laa ke o Diedo gbanandi ye lienni ŋmani ki go ñuni o yuli po ti buudi.

³⁰ Lani n teni ke a yiama leni a tadima yaba yi siiga, ke niba boncianla kpe.

³¹ Ti yaa den biigi ti yula, U Tienu kan bi bu leni ti.

³² Ama o Diedo bu leni ti ki tundi ti leni fala yeni, ke wan da ti taani ki bu ki cuo ti leni ŋanduna.

³³ Lani yaa po n kpiiba yi yaa taani ki baa je o Diedo jiema, yin guudi mani yiyaba.

³⁴ Mi koma yaa pia yua, wan kpa je o denpo ki nan cua, ke yin da taani yi nitaanli nni ki cuani yi yula po ti buudi. N baa ŋanbi yaa maama n sieni kuli n yaa ti cua yaa yogunu.