1 Korenti 10 - Gourmanchéma Bible

¹ N kpiiba mii bua ke yaala n den tieni ti yaajanba n yaa boani yi: Ku tawaligu den yiini bikuli po, bikuli den duodi mi ñincianma.

² Bikuli den baa mi *batisima Musa niinni ku tawaligu nni leni mi ñincianma nni.

³ Bikuli den di jeyenma yaama n ña U Tienu kani,

⁴ ki go ñu bonñokayenla yaala n ña u Tienu kani, kelima bi den ñu yaa tangu yaa ñima n ñani U Tienu kani, yaagu n den yegi leni ba. Laa tangu den tie Kilisiti.

⁵ Ama bi siiga boncianla ki den mangidi U Tienu pali, lani n teni ke bi den kpe mi fanpienma nni.

⁶ Lankuli tie tipo li bonbangikaala, ki bua ki tuodi ki bangi ti ke tin da bua yaala n bia nani bani yeni.

⁷ Yin da ŋoadi i *buli nani bi siiga bi tianba n den tieni maama. Nani lan diani maama: «Bi den kali ki dini ki go ñuni, lani n pendi bi den fii ki jeli ki ciaga.»

⁸ Tin da pa ti yula mi conconma mo nani bi siiga bi tianba n den puni bi yula mipo maama, ke piilie n niba tudataa (23 000) den kpe dayenli.

⁹ Tin da biigi o Diedo nani bi siiga bi tianba n den tieni maama ke i we ku ba.

¹⁰ Yin da yenbidi mo nani bi siiga bi tianba n den yenbidi maama, ke mi kuuma maleki den ku ba.

¹¹ Laa bonla kuli den baa bipo ki baa tie bi niba kuli po li bonbangikaala. U Tienu den teni ke likuli diani ki baa tie tipo i tundi, tinba yaaba n ye ŋanduna juodima dana siiga.

¹² Lani yaa po yua n tama ke o se wan fangi o yuli ki da baa.

¹³ Tulinmaba kuli kan cua yi kani kaa tie yaama n kpendi bi nisaaliba kuli po. U Tienu tie dugika, o kan tuo yaa tulinma n cie yi fidu bianu n cua yi kani. Ama mi biigima yaa cua yi kani, o baa ŋanbi yipo u sanu ke yin fidi ki juuni ki ña lienni.

¹⁴ Lani yaa po n buakaaba, yin sani mani ki foagidi leni i *buli ŋoadima.

¹⁵ N maadi leni yi kelima yi tie yanfodanba, yin biigi mani min maadi yaama na.

¹⁶ Li seli tadiñokaaga tin tuondi U Tienu yaaga yaa po, naani kaa tie mi taanyenma leni Kilisiti soama po kaa? Tin cabidi yaa dupen, naani tii tie mi taanyenma leni Kilisiti gbanandi po kaa?

¹⁷ Dupen tie yendo, tinba yaaba n yaba moko tie gbananyendi, kelima tikuli taani ki boagidi laa dupen yendo.

¹⁸ Kpaagi mani Isalele yaaba po. Bi yaa dini ti padijiedi, naani baa pia taanyenma leni U Tienu kaa?

¹⁹ N bua ki yedi be? Ke o bulo tie bonmoanla bi? Bi ke ban padi yaala o bulo tie bonmoanla bi? Kalam.

²⁰ N bua ki yedi ke yaaba n padi i buli yeni padi mu cicibiadimu po yo, baa padi U Tienu po ka. Mii bua ke yin yaa pia ŋantaado leni mu cicibiadimu.

²¹ Yi kan fidi ki ño o Diedo tadiñokaaga, ki go ño mu cicibiadimu yaa tadiñokaaga. Yi kan taani ki je o Diedo jiema, ki go taani ki je mu cicibiadimu mo yaa jiema.

²² Ti baa tieni yeni ki ñuni o Diedo li mutuoli bii? Ti pia u fidu ki cie o bi?

Tieni li bonla kuli U Tienu kpiagidi po

²³ Yi tua: «Liba kuli ki go kua» yeni, ama li bonla kuli ka ŋani, «Liba kuli ki go kua,» ama li bonla kuli ka todi.

²⁴ Oba kuli n da lingi o yuceli bebe yaa ŋamu, ama wan yaa lingi yaala n tie o lieba moko yaa po.

²⁵ Yi pia u sanu ki ŋmani yaa nandi n kuadi ki daaga nni kuli, ki da tuo yi pali siedi n yaa bangi liba kuli po,

²⁶ kelima li diani ki yedi: «O Diedo die ki tinga Leni yaala n ye ki niinni kuli.»

²⁷ Yua n ki daani yaa yini yi ke yin cua ki je leni o, ke yi bua ki gedi, je mani wan teni yi yaa jiema kuli, ki da buali kelima yi pali siedi po.

²⁸ Ama o nilo yaa yedi yi: «Yaa nandi n tie na tie padinandi,» da je mani kelima yaa nilo n waani yi la po, leni li pali siedi po.

²⁹ N baa yaa nilo n waani yi yeni yaa pali siedi, mii maadi yi yaa pali siedi ka. Be yaa po ke nitoa pali siedi baa bu leni min pia u sanu ki tieni yaala yaa po?

³⁰ N yaa tuondi U Tienu n jiema po, be yaa po ke bi baa jaligidi nni min tuondi U Tienu yaa jiema po?

³¹ Lani, yi yaa baa je, leni yi yaa baa ño, leni yin baa tieni yaala kuli, tieni mani likuli U Tienu yaa kpiagidi po.

³² Yin da tieni mani yaala n baa teni ke Jufinba leni yaaba n kaa tie Jufinba leni U Tienu n yini yaaba kuli n tuudi ki baa ti*tuonbiadi nni.

³³ N moko moandi ki tiendi yeni ki baa dagidi leni bi niba kuli min tiendi yaala kuli nni. Mii tiendi yeni ki bua ki lingi n yuceli ŋamu ka, n lingi yaaba n yaba yaa ŋamu po, ke ban baa ki tindi.