1 Jan 3 - Gourmanchéma Bible

¹ Diidi mani ki le U Tienu ti Baa n pia tipo yaa buacianma hali ki yini ti o bila. Ti tie yeni. Yaala n teni ke ŋanduna yaaba ki bani ti tie ke baa bani wani.

² N buakaaba, moala ti tie U Tienu bila. Tin baa tua yaala daa doagidi, ama ti bani ke o yaa doagidi yaa yogunu, ti baa tie nani wani n tie maama, kelima ti baa le o nani wan tie maama.

³ Yua n pia laa suginma kuli baa ŋanbidi o yuli, nani wani o Diedo n ŋani maama yeni.

⁴ Yua n tieni ti *tuonbiadi kuli miidi U Tienu *bali maama. Ti tuonbiadi tie li bali maama yaa miidima.

⁵ Yi bani ke wani o Diedo n den doagidi ki baa ñani tin yaa tuonbiadi. Tuonbiadiba kuli ki ye o niinni baa waamu.

⁶ Yua n ye o niinni kuli kan yaa tiendi tuonbiadi. Yua n tiendi ti tuonbiadi kuli daa laa o, waa bani o mo.

⁷ N bibuadimu, yin da tuo mani ke oba kuli n boandi yi. Yua n tiendi yaala n tiegi, o tiegi nani Kilisiti n tiegi maama.

⁸ Yua n tiendi ti tuonbiadi tie Sutaani yua, kelima wani Sutaani den tiendi ti tuonbiadi hali mi cilima ki pundi hali moala. U Tienu Bijua den cua ki doagidi o yuli, ki baa bolini Sutaani tuona.

⁹ U Tienu n mali yua kuli kaa tiendi tuonbiadi, kelima wani U Tienu miali buolu ye o niinni, o kan fidi ki yaa tiendi ti tuonbiadi kelima U Tienu mali o.

¹⁰ Line n doagidi U Tienu bila leni Sutaani yaa bila n paadi leni biyaba maama: Yua n kaa tiendi yaala n tiegi kuli, bi kaa bua o kpiilo kuli, waa tie U Tienu biga.

Yin yaa bua mani yiyaba

¹¹ Diidi yin den gbadi yaa maama hali mi cilima n tie na: Tin yaa bua mani tiyaba.

¹² Tin da tie mani nani Kayina yua n den tie o *Biado yua, ki den ku o waalo. Be yaa po ke o den kodi o? Kelima o tuona den bia, ke o waalo ya tiegi.

¹³ N kpiiba, ŋanduna yaaba yaa nani yi, lan da lidi yi.

¹⁴ Ti bani ke ti ñani mi kuuma nni ki kua li miali nni kelima ti bua ti kpiiba. Yua n kaa pia mi buama da ye mi kuuma nni.

¹⁵ Yua n nani o kpiilo kuli tie nikpalo, yi bani ke nikpaloba mo kuli ki pia yaa miali n kan gbeni o niinni.

¹⁶ Line n teni ke ti bani mi buama n tie yaala: Lan tie ke Jesu Kilisiti den puni o miali ti yaa po. Li pundi ti mo n yaa puuni ti miana ti kpiiba po.

¹⁷ O nilo yaa pia, ki nan nua ke o kpiilo luo, ke o pia opo i nunkuomi, U Tienu buama ye o niinni lede?

¹⁸ N bibuadimu, tin da pia mani mi buama tiyaba po leni mi maama bebe, ama tin yaa pia a tuona po leni i moamoani nni.

Ki yaa pia ti dugidi U Tienu nintuali

¹⁹ Lani yaa po ti baa bani ke ti tie i moamoani yaaba, ki go duani ti yama U Tienu nintuali.

²⁰ Lanwani baa ti pala yaa buni ki cuo ti, ti bani ke U Tienu cie ti pala ki go bani li bonla kuli.

²¹ N buakaaba, ti pala yaa buni ki cuo ti, ti pia li papaali U Tienu kani.

²² Tin miadi yaala kuli, ti baadi la o kani kelima ti kubi o bali maama, ki go tiendi yaala n mani opo.

²³ O bali maama n tie mine: Tin yaa daani o Bijua Jesu Kilisiti, ki yaa bua tiyaba nani wan bili tipo yaa bali maama n yedi maama.

²⁴ Yua n kubi li bali maama ye o U Tienu niinni, U Tienu mo ye o niinni. Lane ti bani ke o ye ti niinni kelima wan puni ti o Fuoma yaama yaa po.