1 Jan 2 - Gourmanchéma Bible

¹ N bibuadimu, n diani yipo yaala n tie na ke yin da tieni*tuonbiadi. Li yaa tie ke yua n tieni ti tuonbiadi, ti pia o*candanbaalo ti Baa U Tienu kani, Jesu Kilisiti o niteginka.

² Wani n tie i candanbaani padili ti tuonbiadi po. Laa tie ti yaa tuonbiadi bebe po ka, ama ŋanduna yaaba kuli yaa tuonbiadi po.

³ Yaala n baa doagidi ke ti bani U Tienu n tie line: Ti yaa kubi o *bali maama.

⁴ Yua n tua: «N bani o,» ki naa kubi o bali maama, o tie tuofaadaano, i moamoani naa ye o niinni.

⁵ Ama yua n kubi o maama, U Tienu buama ye o pali nni moamoani ki dagidi cain. Yeni, ti bani ke ti ye o niinni.

⁶ Li pundi ke yua n yedi ke o ye o niinni n yaa cuoni nani wani o Diedo n den cuoni maama.

U Tienu balimapanma

⁷ N buakaaba, mii diani yipo balimapanma ka, mi tie balimakpelima, yin pia yaama hali mi cilima. Mi balimakpelima yeni tie yin den gbadi yaa maama.

⁸ Baa yeni, n diani yipo balimapanma, yaama n doagidi Kilisiti niinni leni yi yaa niinni, kelima li *biigili pendi, mi yenmoanma yendi no.

⁹ Yua n tua ke o ye mi yenma nni, ki nan nani o kpiilo, o da ye li biigili nni.

¹⁰ Yua n bua o kpiilo, o ye mi yenma nni, tingbali bonla ki ye o niinni.

¹¹ Ama yua n nani o kpiilo ye li biigili nni. O cuoni li biigili nni kaa bani wan caa naankani, kelima li biigili teni ke o joa.

¹² N bibuadimu, n diani yipo kelima yi baa yi tuonbiadi sugili kelima Jesu yeli po.

¹³ Yinba bibaanba, n diani yipo kelima yi bani yua n ye hali mi cilima. Yinba bi jawaaba, n diani yipo kelima yi paadi o *Biado.

¹⁴ Yinba a biwaala, n den diani yipo kelima yi bani Baa. Bibaanba, n den diani yipo kelima yi bani wani yua n ye hali mi cilima. Bi jawaaba, n den diani yipo kelima yi pia u fidu, U Tienu maama mo ye yi niinni, yi go paadi o Biado.

¹⁵ Yin da bua mani ŋanduna leni yaala n ye lienni. Yua n bua ŋanduna, waa pia buama Baa po o pali nni.

¹⁶ Kelima yaala n ye ŋanduna nni kuli, ti gbanandi bonbuakaala leni o nuni bonbuakaala leni mi yema japaadi, laa ñani U Tienu kani, li ñani ŋanduna nni.

¹⁷ Ŋanduna pendi, o bonbuakaala moko pendi, ama yua n tiendi U Tienu yanbuama baa ye hali yaa yogunu kuli.

Kilisiti-yiekaaba maama fuuli

¹⁸ Yinba a biwaala, mi juodima yogunu nagini. Yi gbadi ke*Kilisiti-yieka baa cua. To, baa moala Kilisiti-yiekaaba ye boncianla. Lani yaa po ti bani ke mi juodima yogunu nagini.

¹⁹ Kilisiti-yiekaaba yeni den ñani ti siiga, ama baa den tie ti siiga yaaba. Kelima bi yaa den tie ti siiga yaaba, bi bi baa ye leni ti. Ama ban ñani ti siiga yeni doagidi ke bikuli naa tie ti yaaba.

²⁰ Ama yinba wani, yi baa U Tienu Fuoma Yua, yua n teni ke yikuli pia mi bandima.

²¹ Min den diani yipo yeni laa tie ke yii bani i moamoani ka, ama kelima yi bani i moamoani, ki go bani ke faamaba kuli ki ñani i moamoani kani.

²² Ŋme n tie o tuofaadaano, kali yua n nia ke Jesu ki tie*U Tienu n Gandi Yua? Wani n tie Kilisiti-yieka, wani yua n nia Baa leni Bijua.

²³ Yua n nia Bijua kuli, nia Baa moko, yua n tuo Bijua kuli o pia Baa moko.

²⁴ Yinba yaa po, li pundi yin den gbadi yaala hali mi cilima n yaa ye yi niinni. Li yaa tie ke yin den gbadi yaala hali mi cilima ye yi niinni, yi moko baa ye Bijua leni Baa niinni.

²⁵ Wani n niani ti yaala tie yaa miali n kan gbeni.

²⁶ N den diani yipo mi naa maama kelima yaaba n yaandi yaa po.

²⁷ Ama yinba wani, yin den baa mi Fuoma yaama yeni, ye yi niinni ke laa go tie tiladi ban go bangi yi. Kelima mi Fuoma yaama n bangi yi li bonla kuli ki tie moamoandaano kaa tie faadaano. Lani yaa po yin yaa ye o niinni nani wan bangi yi maama.

²⁸ Lanwani n bibuadimu, yin yaa ye o niinni, ke wan baa doagidi yaa yogunu, tin yaa pia li papaali, ke o goacuama daali tin da jie i fe.

²⁹ Yi yaa bani ke o tiegi, yin bandi mani ke yua n tiendi yaala n tiegi kuli tie wan mali yua.