အွန်လိုင်း သမ္မာကျမ်းစာ

Tõoma 8 - Farefare Ninkaré

¹ La Asolɩ daan sakɛ tɩ A'etɩɛnɩ kũm na masɛ mɛ. La daar-ẽŋa tɩ ba pɔsɛ nãmsra Azezi nẽr-kʋʋŋɔ n boe Zerizalɛm na halɩ, tɩ ba wuu zoe wɩrgɛ Zude, la Samaari so'olʋm pʋam, la Azezi Tõntõnɩba pia la ayi la mã'a n weege.

Azezi karẽnbiisi nãmsgɔ yelle

² Tɩ nẽr-sɛba n zotɩ Nawẽnnɛ daan dɩkɛ A'etɩɛnɩ sẽŋɛ ka laagɛ, dee kɛlla zozo'e a kũm na ĩyã.

³ La Asolɩ daan kɔ'ɔn nãmsra Azezi nẽr-kʋʋŋɔ la mɛ bɔɔra tɩ a sã'am ba wuu, kẽ'era yiɛ pʋam yõgra bʋraasɩ la pɔgsɩ botɩ ba tara ba sẽnna yʋ'ʋra.

Afilipi mõolɛ Nawẽnnɛ kõ-yẽlga Samaari

⁴ Tɩ Azezi karẽnbi-sɛba n daan wɩrgɛ la daan sẽnna zẽ'esɩ wuu mõola Nawẽnnɛ kõ-yẽlga.

⁵ Afilipi daan sẽŋɛ la Samaari tẽŋa ayɩla pʋam ka mõolɛ Krisi kõ-yẽlga la bɔ ba.

⁶ La nẽr-kʋʋŋɔ la daan selsrɩ Afilipi n tɔgrɩ ba se'em na mɛ sõŋa sõŋa, ban wõm dee yẽ ẽn ɩtɩ bõn-yãlma la.

⁷ La kʋlkã'arsɩ daan ẽn tĩi kaasɛ mɛ, yese dee basɛ ban tarɩ sɛba la. Tɩ nẽr-sɛba n de kɔɔrnɔ la wɔbsɩ zozo'e daan yẽ ĩmã'asʋm.

⁸ Tɩ tẽŋa la nẽrba tara sũ-yẽlga zozo'e.

⁹ La bʋraa n daan boe tẽŋa la pʋam tɩ a yʋ'ʋrɛ dɛna Asimõ. A daan de la tɩɩm dãana, tõnna tɩɩm tõoma botɩ Samaari so'olʋm nẽrba palẽŋa ẽgra. Dee pa'ala a mẽŋa tɩ ẽŋa de la nẽr-kãtɛ,

¹⁰ tɩ nẽrba wuu sakra a yetɔga sõŋa, bõnbɩ'ɩsɩ la bõnkɛgsɩ wuu yɛta tɩ: «Bʋra-ẽna de la sɛka tɩ ba wi'iri tɩ wẽnnɛ pãn-kãtɛ la n sige.»

¹¹ Ẽn tõm a tɩɩm tõoma botɩ nẽrba la palẽŋa ẽgra yuuge la, ba sakɛ ẽ mɛ sõŋa sõŋa.

¹² La Afilipi n mõolɛ Nawẽnnɛ so'olʋm yelle, la Azezi-krisi yʋ'ʋrɛ bɔ ba la, ba daan bɔ a yetɔga la sɩra mɛ, botɩ a mise ba ko'om pʋam, bʋraasɩ la pɔgsɩ.

¹³ Tɩ Asimõ mẽ sakɛ yetɔga la, botɩ ba mise ẽ ko'om pʋam, tɩ a dɩkɛ a mẽŋa lablɛ Afilipi, la ẽn yẽtɩ bõn-yãlma la yel-kɩrsɩ sɛba n ɩtɩ la, la ẽkɛ la a palẽŋa.

¹⁴ Azezi Tõntõnɩba la n daan boe Zerizalɛm na wõm mɛ tɩ Samaari dõma to'oge Nawẽnnɛ yetɔga mɛ, tɩ ba tõm Apɩyɛɛrɩ la Azã ba zẽ'am.

¹⁵ La ban paagɛ mĩ na, ba pʋ'ʋsɛ mɛ bɔ ba tɩ ba to'oge Nawẽnnɛ Sɩa.

¹⁶ Se'ere n soe la, ba daan põn mise ba la ko'om pʋam la Zuudãana Azezi yʋ'ʋrɛ, dee tɩ Nawẽnnɛ Sɩa nãn ka sige ba nẽra nẽra zuo.

¹⁷ Tɩ Apɩyɛɛrɩ la Azã dɩkɛ ba nu'usi paglɛ ba zuto, tɩ ba yãŋa to'oge Nawẽnnɛ Sɩa la.

¹⁸ Asimõ n yẽ tɩ Azezi Tõntõnɩba la n dɩkɛ ba nu'usi paglɛ ba zuto, tɩ ba to'oge Nawẽnnɛ Sɩa la, a daan boorɩ tɩ a bɔ ba la ligri,

¹⁹ yãŋa yele ba yetɩ: «Bɔ-ya mam pãn-ẽna wã tɩ nẽr-sɛka woo tɩ mam wʋn dɩkɛ m nu'usi paglɛ a zuo, a wʋn kɔ'ɔn to'oge Nawẽnnɛ Sɩa.»

²⁰ Tɩ Apɩyɛɛrɩ lerge ẽ yetɩ: «Fõn na fʋ ligri la wʋn sã'am, fõn tẽ'esɛ tɩ Nawẽnnɛ bɔ'a da'arɩ la ligri la ĩyã.

²¹ Fʋ nẽŋa ka boe yel-bãna pʋam, la fʋ ka tarɩ pʋrɛ mĩ, se'ere n soe la, fʋ sũure ka masɛ Nawẽnnɛ nifum.

²² Teege yɛm basɛ tõon-be'e-ẽna wã, dee sose Zuudãana, tɩ tã tɩ a basɛ fʋ tõon-be'ero tɩ fʋ tẽ'esrɩ fʋ sũurum na taalɛ.

²³ Mam yẽ tɩ fʋ tarɩ la sũ-toogo, tɩ tõon-be'ero lʋ fɔ.»

²⁴ Tɩ Asimõ lerge yetɩ: «Pʋ'ʋsɛ-ya Zuudãana bɔ ma tɩ bõn-sɛka tɩ ya yele mam na sɛla sɛla da paagɛ ma.»

²⁵ Apɩyɛɛrɩ la Azã daan tɔgɛ Zuudãana Azezi yetɔga la pa'alɛ nẽrba mɛ, dee daan lɛbra Zerizalɛm. La sore zuo, ba mõolɛ kõ-yẽlga Samaari tẽnsɩ zozo'e pʋam mɛ.

Afilipi la Etiopi bʋraa yelle

²⁶ Tɩ Nawẽnnɛ malɛka tɔgɛ bɔ Afilipi yetɩ: «Isge sẽŋɛ wẽntulle gɔbga bɔba, doose sorɔ-sɛka n ze'ele Zerizalɛm wɛ Gaza la, sorɔ-ẽŋa dolɩ la weego pʋam.»

²⁷ Tɩ a isge sẽŋɛ. La Etiopi bʋraa n daan dolɩ sore la, a de la nẽr-kãtɛ, a gu'uri la Etiopi pɔg-naba Akãndase bõntarsõm. A daan sẽŋɛ la Zerizalɛm ka pʋ'ʋsɛ Nawẽnnɛ,

²⁸ dee zẽa wiiri torko pʋam lɛbra kulla. A daan tarɩ la Nawẽnnɛ nõtɔ'ɔsa A'ezayi gõŋɔ karẽŋra.

²⁹ Tɩ Nawẽnnɛ Sɩa yele Afilipi yetɩ: «Sẽŋɛ lɛm torko wã.»

³⁰ Tɩ Afilipi zoe paagɛ, wõm tɩ a karẽŋrɩ la Nawẽnnɛ nõtɔ'ɔsa A'ezayi gõŋɔ. Tɩ Afilipi soke ẽ yetɩ: «Fõn wõnnɩ fõn karẽŋɛ se'em wã võorɛ mɛ bɩɩ?»

³¹ Tɩ a lerge yetɩ: «Mam wʋn ẽŋɛ la wãne wõm, tɩ nẽra sãn ka pa'alɛ mam?» Dee sose Afilipi yetɩ, a zom zĩ'ire ẽŋa zẽ'am. Tɩ a zom zĩ'ire.

³² Nawẽnnɛ gõŋɔ zẽ'e-sɛka tɩ a daan karẽŋrɩ la gʋlsɛ yele la wãna: «A ãn wʋ pesgo tɩ ba tarɩ wɛ tɩ ba kʋ, dee ãna wʋ pebila tɩ ba sɛɛrɩ a kõbrɔ tɩ a ka kaasra, dee mẽ põn ka ya'ara nõorɛ.

³³ Ba pɔ'ɔgɛ ẽ mɛ, ka di a sarɩya sõŋa. Tɩ nẽra ka bɔna wʋn tɔgɛ a yɩɩsɩ yelle, se'ere n soe la, ba yese a vɔm mɛ dũnia zuo.»

³⁴ Tɩ Etiopi bʋraa la soke Afilipi yetɩ: «Ãn yelle tɩ Nawẽnnɛ nõtɔ'ɔsa la tɔgrɩ wãna? A tɔgrɩ la a mẽŋa yelle bɩɩ, nẽra ayẽma yelle?»

³⁵ Tɩ Afilipi yãŋa dɩkɛ Nawẽnnɛ gõŋɔ la zẽ'e-sɛka tɩ a karẽŋɛ la pa'alɛ a võorɛ, dee doose bilam tɔgɛ Azezi kõ-yẽlga bɔ ẽ.

³⁶ La ban sẽnnɩ wɛ la, ba paagɛ la zẽ'a tɩ ko'om boe mĩ. Tɩ Etiopi bʋraa la yele Afilipi yetɩ: «Bɩsɛ, ko'om n wãna n boe kalam. Bẽm n wʋn gu mam ko'om misga?» [

³⁷ Tɩ Afilipi yele ẽ yetɩ: «Fʋ sãn bɔ Azezi sɩra la fʋ sũure wuu, fʋ tã wʋn to'oge ko'om misga mɛ.» Tɩ a lerge yetɩ: «Mam sakɛ tɩ Azezi-krisi de la Nawẽnnɛ Dayʋa.»]

³⁸ Dee botɩ torko la ze'ele. Tɩ Afilipi la ẽŋa sige ko'om na pʋam, tɩ Afilipi mise ẽ ko'om pʋam.

³⁹ La ban ze'ele ko'om na pʋam dɔɔra la, tɩ Zuudãana Nawẽnnɛ Sɩa zẽkɛ Afilipi fõrgɛ. Tɩ Etiopi bʋraa la ka le yẽ ẽ, dee lebe dɔla a sore la wɛ'ɛsa la sũ-yẽlga.

⁴⁰ Tɩ nẽrba yẽ Afilipi Azɔtɩ tẽŋam, tɩ a dɔla tẽnsɩ la wuu pʋam mõola Nawẽnnɛ kõ-yẽlga halɩ ka paagɛ Sezaare.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ